Miadźviedzieŭ zajaviŭ, što ŭdar rasijskaha bieśpiłotnika pa rumynskim domie nievypadkovy, i papiaredziŭ, što buduć inšyja
Namieśnik staršyni Rady biaśpieki Rasii Dźmitryj Miadźviedzieŭ vybuchnuŭ u dziaržmiesiendžary Max hrubaj tyradaj na adras Jeŭrapiejskaha Sajuza paśla taho, jak rasijski bieśpiłotnik urezaŭsia ŭ žyły dom u rumynskim horadzie Hałac. Siarod inšaha jon nazvaŭ krainy ES «udzielnikami vajny» suprać Rasii i paabiacaŭ, što padobnyja incydenty na terytoryi Jeŭropy buduć praciahvacca, piša The Moscow Times.
«Jeŭraimpatenty raskryčalisia nakont traplańnia niejkaha bieśpiłotnika ŭ rumynski žyły dom. Usim krainam ES treba zatknucca na hetuju temu. Jeŭrapiejskija dziaržavy — pramyja ŭdzielniki vajny z Rasijaj. Tak, jany vajujuć rukami banderaŭcaŭ, ale jakaja nam roźnica?», — napisaŭ Miadźviedzieŭ.
Jon dadaŭ, što «jeŭrapiejskija BPŁA, zapčastki da ich, inšaje ŭzbrajeńnie, nie kažučy ŭžo pra raźvieddanyja, kožny dzień biaruć udzieł u atakach na našu krainu», a za «terakt u Starabielsku naŭprost adkazvaje roznaja dreń typu ursułak, miercaŭ, makronaŭ, starmieraŭ i astatniaj pohani».
«Tamu niachaj padrychtujucca: heta budzie adbyvacca i dalej. Idzie vajna! I hramadzianie dziaržaŭ ES, jak nasielnictva vajujučych krain, nie zmohuć spać spakojna. Asabliva ŭ tych miescach, dzie raźmieščanyja vytvorčaści BPŁA dla patreb banderaŭskich farmavańniaŭ. Tak što zavalicie chlabała. Heta pakul kvietački!», — reziumavaŭ były prezident Rasii.
Incydent, na jaki adreahavaŭ Miadźviedzieŭ, adbyŭsia minułaj nočču. Rasijski bieśpiłotnik urezaŭsia ŭ žyły šmatpaviarchovik na ŭschodzie Rumynii. Pavodle danych miascovych uładaŭ, u kvatery na 10‑m paviersie ŭspychnuŭ pažar, paciarpieli dva čałavieki — u tym liku 14‑hadovy padletak. Paśla ŭdaru pradstaŭniki NATA pryniali rašeńnie pravieści ekstrannaje pasiadžeńnie, paviedamiŭ prezident Finlandyi Alaksandr Stub.
«Rasija pierachodzić čarhovuju miažu ŭ svajoj ahresiŭnaj vajnie», — napisaŭ Stub u X.
Asudzili heta i inšyja lidary krain NATA i Jeŭrasajuza, uklučajučy kiraŭnicu Jeŭrakamisii Ursułu fon der Lajien i kiraŭnicu jeŭradypłamatyi Kaju Kałas.
Hiensiek NATA Mark Rute zajaviŭ, što aljans «hatovy abaraniać kožny dziujm terytoryi sajuźnikaŭ» i praciahnie naroščvać «hatoŭnaść da strymlivańnia» ad dronaŭ. Dziejańni Rasii jon nazvaŭ «nieabdumanymi».
Ciapier čytajuć
U dzień pačatku Pieciarburhskaha ekanamičnaha forumu USU nanieśli dziasiatak udaraŭ pa naftavym terminale ŭ porcie horada i bazie Bałtfłota ŭ Kranštacie31
Kamientary
[Zredahavana]