Milinkievič vykanaje abaviazki ministra zamiežnych spraŭ Biełarusi

Siońnia ŭ Bracisłavie pačynajecca sustreča ministraŭ zamiežnych spraŭ krain Vyšahradzkaj hrupy — Polščy, Słavakii, Čechii i Vuhorščyny. Specyjalnaje zaprašeńnie na jaje atrymaŭ lider ruchu «Za svabodu» Alaksandar Milinkievič.

Taksama ŭ Bracisłavie 2–4 sakavika adbudziecca mižnarodnaja kanferencyja pa biaśpiecy «Globsec-2011». Jaje ŭdzielniki abmiarkujuć sytuacyju ŭ Biełarusi.

Abmiarkoŭvać biełaruskuju sytuacyju na «Globsec-2011» buduć u farmacie słuchańniaŭ pad nazovam «Biełaruś paśla vybaraŭ: ci spracujuć sankcyi?». Alaksandar Milinkievič napiaredadni vyletu ŭ Bracisłavu asabliva adznačyŭ: heta kanferencyja vychodzić daloka za miežy padobnych mierapryjemstvaŭ:

«Tam buduć ministry zamiežnych spraŭ vystupać, eŭrakamisar Fiule, mnoha ekspertaŭ, analitykaŭ. Heta vielmi surjoznaja kanferencyja, jakaja šmat u čym vyrašaje, što budzie realizavacca adnosna Biełarusi ŭ palitycy Eŭraźviazu».

Zacikaŭlenaść losam Biełarusi u krain Vyšahradzkaj hrupy prajaviłasia na jubilejnym samicie hetaha miždziaržaŭnaha ab`iadnańnia. Jany 15 lutaha pryniali zvarot da biełaruskich uładaŭ. U dakumencie ŭtrymlivajecca zaklik vyzvalić palitźniavolenych, spynić pieraśled niezaležnych srodkaŭ masavaj infarmacyi i apazycyi, stvaryć umovy dla praviadzieńnia demakratyčnych vybaraŭ.

I biezumoŭna, anijakich inšych acenak, čym tyja, jakija siońnia daje Brusel aficyjnamu Miensku, być tut nia moža. Bolš taho, siabry Vyšahradzkaj hrupy staviacca ža Biełarusi bolš žorstka, čym niekatoryja siabry Eŭraźviazu

Alaksandar Milinkievič upeŭnieny: i hetym razam čalcy Vyšahradzkaj hrupy zojmuć adzinuju pazycyju, tym bolš, što jany ŭsie ŭvachodziać u Eŭraźviaz:

«Ja dumaju, u dačynieńni da Biełarusi pazycyja va ŭsich krain Eŭraźviazu identyčnaja. Heta va „Uschodnim partnerstvie“ nie ŭsie krainy na adnolkavych pazycyjach. A što tyčycca krain Eŭraźviazu, to ja tut nie baču roźnicy».

Mižnarodny ahladalnik Raman Jakaŭleŭski ličyć, što Vyšahradzkaja hrupa budzie prytrymlivacca ahulnych dla Eŭraźviazu padychodaŭ da Biełarusi:

«I biezumoŭna, anijakich inšych acenak, čym tyja, jakija siońnia daje Brusel aficyjnamu Miensku, być tut nia moža. Bolš taho, siabry Vyšahradzkaj hrupy staviacca ža Biełarusi bolš žorstka, čym niekatoryja siabry Eŭraźviazu. Ja maju na ŭvazie, naprykład, Italiju albo Partuhaliju. A imknucca jany hetaj rehijanalnaj hrupoŭkaj havaryć adnym hołasam».

• 0
• 0
• 0
• 0
• 0
• 0
• 0
• 0