STV pakazała pryznańni Lichavida, «Navušnika» i apošnich zatrymanych pa spravie 19 śniežnia

U siužecie taksama fihuravali Statkievič, Michalevič, Chalip i Radzina.

27 sakavika prahrama «Niadziela» na telekanale STV była pryśviečanaja fihurantam spravy 19 śniežnia. U joj havaryłasia pra vyniasieńnie abvinavačvańnia Andreju Sańnikavu, pra toje, što inšy fihurant spravy, taksama eks-kandydat, Mikoła Statkievič skončyŭ znajomicca z materyjałami kryminalnaj spravy.

Viadučy pieradačy padkreśliŭ, što Statkievič «padisaŭ pratakoł, nie vykazaŭšy sumnieńniaŭ u dakazalnaści svajoj viny».

Statkievič jašče nie adnojčy zhadvaŭsia ŭ siužecie. STV prademanstravała kadry apieratyŭnych zdymak z udziełam Mikity Lichavida, vyrak pa spravie jakoha budzie vyniesieny 29 sakavika.

«Statkievič skazaŭ, što my idziom brać rezidencyju Prezidenta. Ja padumaŭ, što heta tryźnieńnie varjata. Brać rezidencyju! Tam achovy, jak u jadziernaj šachcie, tam mucha nie pralacić!» — pryvodzić słovy Lichavida STV.

U siužecie prahučali taksama pryznańni apošnich zatrymanych pa spravie 19 śniežnia Dzianisa Husielcava, Alaksieja Šarstova i Vitala Macukieviča. Apošni paprasiŭ prabačeńnia ŭ paciarpiełych i ŭsiaho biełaruskaha naroda.

U niadzielnaj pieradačy padkreślivałasia, što apazicyjnyja resursy nazyvali apošnich zatrymanych pravakatarymi ad śpiecsłužbaŭ. U siužecie jany admaŭlali heta. Uśled za imi ŭ kadry źjaviŭsia i «Navušnik», pra jakoha šmat pisali ŭ siecivie paśla padziej 19 śniežnia.

Uładzimir Chamičenka pałumačyŭ čamu trymaŭsia za vucha: «Nu, heta niapraŭda. Usio. Stopudova. Ja ni ź jakoj nie sa śpiecsłužby. U mienia vucha balić. Paspaŭ ja na bietonie vucham hetym, paśla hetaha ja vyjšaŭ — u mianie vucha zabaleła».

Taksama ŭ siužecie nahadali pra pryznańni Alesia Michaleviča pra katavańni ŭ turmie KDB i pra jaho ŭcioki ŭ Čechiju. U jakaści kontrarhumientaŭ STV pryviało słovy Arcioma Breŭsa adrazu ž paśla vyzvaleńnia ŭ zale suda pra toje, što ŭ turmie było narmalna.

Nie abminuli ŭ siužecie i vystupleńnie Łukašenki pierad čarhovaj hrupaj rasijskich žurnalistaŭ. Było ahučana telefanavańnie Iryny Chalip u momant zatrymańnia i słovy Łukašenki pra toje, što heta było insceniroŭkaj. Nibyta potym jana patelefanavała maci i paprasiła pakarmić syna. Hety aŭdyjofajł STV čamuści nie ahučyła.

Karespandenty «Staličnaha telebačańnia» nie palenavalisia źjeździć u Kobryn, kab adšukać siarod mieścičaŭ tych, chto viedaje apazicyjnuju žurnalistku Natallu Radzinu. Nie adšukali.

Naprykancy pieradačy ŭ čarhovy raz pieraličyli hrošy Zachadu vydzielenyja na padtrymku biełaruskaj apazicyi.

• 0
• 0
• 0
• 0
• 0
• 0
• 0
• 0