Luksavy minski restaran Veras i Kolas, u jakim pracujuć zornyja šef-kuchary Navicki i Čaryjeŭ, krucić ryzykoŭnyja apieracyi
Mnohija biełarusy vučacca hatavać pa videa hetych charyzmatyčnych kucharaŭ ź miljonnymi aŭdytoryjami, a chto sam nie choča, toj jedzie na hatovaje ŭ «Vieras i Kołas» abo ŭ «Hości». Tym časam finansavaja spravazdačnaść TAA «Čybus», jakomu naležyć ustanova, pakazała nieardynarnuju stratehiju ŭłaśnikaŭ.
«Veras i Kolas» na Surhanava — adno z samych hučnych restarannych adkryćciaŭ minułaha hoda ŭ stalicy: pad tysiaču kvadratnych mietraŭ płoščy, čatyry zały, try šef-kuchary ź Minska, Maskvy i Italii, rabota da 5‑j ranicy. Akuratnaja intehracyja biełaruskaj movy ŭ ajdentyku ŭstanovy, i sama ideja — spałučeńnie biełaruskaj, italjanskaj i ahulnasłavianskaj kuchniaŭ. Vializnaje mieniu na 90 pazicyj.
Na adkrytaj kuchni «Vierasa i Kołasa» razharnulisia znakamityja kuchary Dźmitryj Navicki i Nurjahdy Čaryjeŭ. Ich videa vam abaviazkova padsoŭvali ałharytmy sacsietak, kali vy cikaviciesia kulinaryjaj.
U chłopcaŭ bolš čym pa paŭmiljona fałovieraŭ na kožnaj z papularnych płatform, jany — ambasadary brenda. A mižziemnamorski kirunak viadzie italjaniec Marka Jakieta, jaki byŭ pracavaŭ u luksavych restaranach Maskvy i Jeŭropy.
Zakładvaŭ ustanovu restaratar Dzianis Adamovič, jaki taksama viadzie prajekt «Malevič» i restapab «Hości». U jaho — 21,82% akcyj TAA «Miedyja povad», jakomu i naležyć u vyniku restaran (sam restaran isnuje jak TAA «Čybus», u jakim usie 100% akcyj naležać TAA «Miedyja povad»). Jašče 78,18% — Irynie Koval-Safronienka, byłoj mieniedžarcy likvidavanaha Jeŭrabanka.
Kuchary robiać svaju spravu z dušoj, a ŭłaśniki ŭstanovy pačali hulniu, jakaja moža stać abo prykładam fantastyčnaj udačy, abo chrestamatyjnaj ovierryzykaj.
Hałodnyja hulni restarataraŭ
AAT «Čybus», jakomu naležyć «Veras i Kolas», dziejničaje z 2019 hoda. Dzianis Adamovič sa svajoj partniorkaj uvajšoŭ (vykupiŭ) tudy praz TAA «Miedyja povad» tolki pry kancy 2022 hoda.
Na toj momant «Čybus» byŭ ścipłym, stratnym pradpryjemstvam: vyručka 676 tysiač, straty 24 tysiačy, admoŭny kapitał — 112 tysiač rubloŭ. U kiravańni pradpryjemstva było Cafe 35 na vulicy Varanianskaha.
Ź pierachodam da novych ułaśnikaŭ «Čybus» papior: u 2023 vyručka 902 tysiačy, u 2024 — 1,24 miljona… Čysty prybytak staŭ bolšy za vyručku — 1,59 miljona i 1,13 miljona rubloŭ adpaviedna, chacia kafe ŭsio tak ža ŭ minusach (minus 109 tysiač i minus 645 tysiač pa asnoŭnaj dziejnaści adpaviedna). Jak tak?
Jak vynikaje z buchhałtarskaj spravazdačy, ułaśniki kampanii ŭ dadatak da kuchni pačali handlavać kaštoŭnymi papierami.
Pra heta ž jak pra niečakanaje adkryćcio razvažaŭ i sam Dzianis Adamovič u rekłamnym tekście brokiera «Ajhienis» dla vydańnia Probusiness.io.
«Razumieńnie nieabchodnaści inviestycyj pryjšło zusim nie z dumki pra toje, što na hetym možna zarabić. […] My vyrašyli kožny tydzień zabirać z vyručki 15% i adkładvać ich. My razumieli, što prosta pakidać ich na rachunku — nie varyjant. […] My źviarnuli ŭvahu na ablihacyi i inviestavańnie.
U vyniku vybrali «Ajhienis» — jany prapanavali nieabchodnuju nam schiemu nabyćcia ablihacyj. […]
Zasvoiŭšy hetuju stratehiju, my pačali dadatkova inviestavać srodki, pryznačanyja dla inšych rehularnych vydatkaŭ. Kali dazvalajuć liški, my taksama inviestujem dla dadatkovaha prybytku», — kazaŭ Adamovič.
U pracesie inviestavańnia abarotnych srodkaŭ u ablihacyi biznesmieny vyvučyli i takija składanyja finansavyja miechanizmy, jak REPA kaštoŭnych papier.
REPA — heta pazyka hrošaj pad zastavu ablihacyi ź jaje nastupnym vykupam i płataj za čas karystańnia. Heta amal što łambard, tolki ź niuansam: ablihacyja — nie hadzińnik, jaje zabiaruć tolki kali nie vierniecie hrošaj.
Ujavicie, kab na atrymanyja pad zakład hrošy kupić jašče ablihacyj, a potym pad ich zastavu ŭziać jašče hrošaj, a potym na ich kupić jašče ablihacyj, a potym pad ich zakład uziać jašče hrošaj… to možna zarabić na pazityŭnaj roźnicy pamiž canoj karystańnia hrašyma «łambarda» i prybytkovaściu samich ablihacyj.
U 2023 hodzie kampanija prakruciła praź siabie 19,8 miljona rubloŭ papier, jakija jana «pradała», i 18,1 miljona — jakija «kupiła». Roźnica 1,7 miljona dazvoliła pakryć straty ad asnoŭnaj dziejnaści i zarabić źvierchu.
U 2024‑m situacyja była taja samaja: 22,1 miljona suprać 20,3 miljona z čystym plusam 1,8 miljona. Faktyčna, asnoŭnaj dziejnaściu staŭ trejdzinh, a Cafe 35 — zboku.
Moža być, mienavita na ŭdała inviestavanyja hrošy Adamovič i Koval-Safronienka i adkryli šykoŭny Veras i Kolas u 2025-m. Na zakupku abstalavańnia dla kuchni, załaŭ, bara i inšaha pajšło 208 tysiač rubloŭ žyvych hrošaj, a astatniaje — u lizinh.
Pośpiechi na biržy paŭtaralisia, kanjunktura była spryjalnaja. Restaran daŭ pradprymalnikam brend, pavyšaŭ davier, što dazvalała pryciahvać bolš srodkaŭ.
U 2025‑m abaroty kampanii vyraśli ŭ razy. Ciapier papieraŭ pradali ŭžo na 339,9 miljona rubloŭ, a kupili na 362,7 miljony. Admoŭny ruch rynku kaštavaŭ trejdaram 22,8 miljony.
Stolki ŭłasnaha kapitału dla ryzyki ŭ kampanii nie było, usio jaje abstalavańnie (bolšaja častka jakoha ŭ lizinhu) kaštuje mienš za paŭtara miljona rubloŭ. TAA «Čybus» staŭ hłyboka stratnym. Ale kampanija praciahnuła trejdzinh ź vidavočnym raźlikam adyhracca.
Na 30 červienia 2026 hoda na bałansie kampanii kaštoŭnych papier na 617 miljonaŭ rubloŭ.
Z ulikam ich charaktaru (REPA) heta aznačaje, što, pa sutnaści, usia hetaja suma — heta abaviazak, doŭh. Jak u nievialikaha banka.
Jak kampanija pryjšła da takoj ličby — nieviadoma. U struktury źjaviłasia pazyka na 155 miljonaŭ rubloŭ, padrabiaznaści jakoj nidzie nie raskryty.
TAA «Čybus» raźmiaščaje ŭłasnyja ablihacyi
Letam i vosieńniu 2026‑ha TAA «Čybus» abviaściła ab raźmiaščeńni ablihacyj jašče na 100 miljonaŭ rubloŭ. Zapłanavanyja dva praśpiekty emisii. Staŭka — 10% hadavych z pahašeńniem u 2035 hodzie.
Pa pieršym vypusku kupon płaciać štokvartalna, pa druhim — raz na hod. Pieršaja vypłata tolki 25 kastryčnika 2027 hoda.
Ablihacyi ŭžo pačali tarhavacca dla kvalifikavanych inviestaraŭ.
Ni toj, ni druhi vypusk ničym nie zabiaśpiečanyja. Kredytny rejtynh kampanii nie prysvojvaŭsia. Ablihacyi depazitarnyja, što značyć, što pry bankructvie ich uładalniki stajać u čarzie paśla ŭładalnikaŭ lubych inšych ablihacyj toj ža kampanii.
Pradstaŭnik uładalnikaŭ ablihacyj nie pryznačaŭsia. Arhanizatar abodvuch vypuskaŭ — «Ajhienis», na jakim «Čybus» i nahandlavaŭ u šmatmiljonny minus.
«U bližejšyja try hady Emitent płanuje raspracavać strukturavanuju stratehiju, nakiravanuju na maksimizacyju prybytku i ŭtrymańniu łajalnaści haściej va ŭmovach rastučych vydatkaŭ i źmieny spažyvieckich zvyčak. Hetaja stratehija ŭklučaje niekalki klučavych etapaŭ:
1. Markietynh i pryciahnieńnie aŭdytoryi.
— Utrymańnie klijentaŭ: raspracoŭka prahram łajalnaści, piersanalizavanych prapanoŭ i śpiecyjalnych farmataŭ (naprykład, siezonnyja mieniu abo hastraviačery).
— Ličbavizacyja: prasoŭvańnie praz łakalny pošuk (Local SEO), intehracyja z ahrehatarami dastaŭki i raźvićcio ŭłasnych sistem anłajn-zakazu.
2. Maštabavańnie i farmaty.
— Adkryćcio novych łakacyj: vybar pamiaškańniaŭ z vysokim trafikam paśla detalovaha analizu kankurentaŭ i metavaj aŭdytoryi.
— Dyviersifikacyja biznesu: razhlad zapusku Dark kitchen, kiejterynhu abo adkryćcia punktaŭ farmatu «kitchen to go».
3. Finansavaje płanavańnie i kantrol vydatkaŭ.
— Aptymizacyja vydatkaŭ: va ŭmovach rostu cen na pradukty i arendnych stavak krytyčna važna rehularna pierahladać finansavuju madel.
— Kiravańnie fondam apłaty pracy: aŭtamatyzacyja pracesaŭ dazvalaje trymać fond apłaty pracy na aptymalnym uzroŭni biez škody dla servisu.
— Analiz fudkostu: rehularny ŭlik ruchu resursaŭ i karekciroŭka mieniu dla padtrymańnia metavaj maržynalnaści.
U jakaści krynic finansavych srodkaŭ dla realizacyi płanaŭ emitenta buduć vykarystany ŭłasnyja srodki emitenta, pazykovyja srodki, atrymanyja ŭ vyniku emisii ablihacyj, bankaŭskija kredyty. Mahčyma vykarystańnie inšych vidaŭ finansavych resursaŭ», — heta z apisańnia biźnies-płana ŭ praśpiekcie emisii.
Zvyčajna, hrošy na rynku prosiacca pad paśpiachovy prajekt, kab jaho maštabavać chutčej, čym kankurenty. I voś «Čybusu» naležyć vypłačvać 10 miljonaŭ rubloŭ u hod tolki za karystańnie srodkami (pry ŭmovie, što ŭsie akcyi pradaducca).
Tym časam sam restaran, pry ŭsioj svajoj papularnaści, z momantu adkryćcia prybytkovym pakul tak i nie staŭ. Za 2025 hod pry vyručcy 3,25 miljona rubloŭ jon prynios 2,4 miljona strataŭ. Za pieršaje paŭhodździe 2026‑ha — 1,8 miljona strataŭ pry vyručcy 2,9 miljona.
Faktyčna hrošy prosiacca pad stratnuju madel, a sam restaran i jaho sacsietki, a taksama imiony kucharaŭ słužać vitrynaj dla pryciahnieńnia sta miljonaŭ.
Pry hetym parušeńnia zakonu ŭ tym, što robiać ułaśniki TAA «Čybus», niama.
Praź niedaraźvity finansavy rynak u Biełarusi niedaraźvitaja i jurydyčnaja baza (nu abo naadvarot), u vyniku čaho mahčymyja jašče i jašče bolš ryzykoŭnyja apieracyi.
Sapraŭdy, zvyčajnaje tavarystva z abmiežavanaj adkaznaściu ŭ Biełarusi moža vypuścić niezabiaśpiečanyja depazitarnyja ablihacyi pry ŭmovie farmiravańnia minimalnaha statutnaha fondu. U «Čybusa» jon jość — choć heta ŭsiaho 30 tysiač rubloŭ.
I aŭdyt taksama nieabaviazkovy. Jon robicca abaviazkovym tolki pry vyručcy bolš za 21 miljony rubloŭ, vyličanaj pa pradadzienych tavarach i pasłuhach. «Čybus», takim čynam, nie abaviazany jaho prachodzić, tamu što pry svaich sotniach miljonaŭ abarotu pa finansavaj dziejnaści, pa asnoŭnaj dziejnaści («dziejnaść restaranaŭ») nie padpadaje pad minimalny paroh.
Realnaść takaja, što, kab zakryć dzirku 25 miljonaŭ rubloŭ pry isnym pamiery partfiela, «Čybusu» treba, kab rynak zrušyŭsia na 4,1% u plusavy bok. Kab takoje zdaryłasia, patrebnaja vialikaja ŭdača.
Kamientary