MZS Litvy: My hatovyja padtrymlivać dyjałoh i supracoŭnictva ź Biełaruśsiu

Ministerstva zamiežnych spraŭ Litvy prakamientavała zajavy biełaruskaha boku ab sprobach siłavoha ŭcisku na Biełaruś, u tym liku i z vykarystańniem ABSIE.

«Z času zaniaćcia pasady staršyni ABSIE ŭ studzieni 2011 hoda Litva ŭklučyłasia ŭ intensiŭny dyjałoh ź Biełaruśsiu. U Vienie, Minsku i Vilniusie staršynia ABSIE, Biuro ABSIE pa demakratyčnych instytutach i pravach čałavieka (BDIPČ) i pradstaŭnik ABSIE pa pytańniach svabody ŚMI pastajanna zaprašali Biełaruś pahłyblać dyjałoh i supracoŭnictva i zastajucca adkrytymi dla hetaha», — zajavili BiełaPAN u adździele presy Ministerstva zamiežnych spraŭ Litvy.

U litoŭskim źniešniepalityčnym viedamstvie adznačyli, što ceniać damoŭlenaść pamiž BDIPČ i Biełaruśsiu, na padstavie jakoj dva pradstaŭniki BDIPČ ABSIE mohuć nazirać za sudami pa spravie ab masavych biesparadkach 19 śniežnia ŭ Minsku.

«My čakajem poŭnaha vykanańnia hetaha rašeńnia, — padkreślili ŭ MZS. — My taksama nahadvajem ab liście pradstaŭnika ABSIE pa pytańniach svabody ŚMI Duńji Mijatavič ad 5 krasavika 2011 hoda, u jakim jana nahadvaje ŭładam Biełarusi, što sa studzienia nie atrymała adkazu na svaju prośbu naviedać Biełaruś».

Pry hetym MZS Litvy miarkuje, što isnuje «dastatkova instrumientaŭ ABSIE, jakija mahli b dapamahčy Biełarusi ŭ vykanańni jaje abaviazacielstvaŭ». «My zrabili mnostva prapanoŭ Biełarusi, u pryvatnaści ab supracoŭnictvie z ABSIE z zachavańniem prysutnaści Arhanizacyi ŭ Biełarusi, i ab dapamozie ŭ ažyćciaŭleńni abaviazacielstvaŭ krainy ŭ ABSIE. My hatovyja padtrymlivać dyjałoh i supracoŭnictva ź Biełaruśsiu», — adznačyli ŭ pres-słužbie.

Litva jak staršynia ABSIE supracoŭničaje z usimi krainami — udzielnicami ABSIE i zaprašaje Biełaruś «pracavać u damoŭlenych farmatach, u poŭnaj miery pavažać mižnarodnaje prava i abaviazacielstvy ABSIE, pryniatyja ŭ Chielsinki, Paryžy, Stambule i Astanie».

«My źviartajem uvahu na inicyjavany 6 krasavika 2011 hoda 14 krainami ABSIE Maskoŭski miechanizm — niezaležnuju misiju mižnarodnych ekśpiertaŭ, jakoj daručana ŭstanavić fakty, dać spravazdaču i padrychtavać rekamiendacyi, źviazanyja z prezidenckimi vybarami ŭ Biełarusi 19 śniežnia 2010 hoda. Maskoŭski miechanizm praduhledžvaje spravazdaču eśpiertaŭ, na jakuju Biełaruś maje prava dać adkaz. Nadalej Pastajanny saviet ABSIE razhledzić spravazdaču i adkaz na jaje i prymie rašeńnie adnosna dalejšych dziejańniaŭ», — padkreślili ŭ adździele presy.

Nahadajem, 7 krasavika na bryfinhu ŭ Minsku pres-sakratar MZS Biełarusi Andrej Savinych zajaviŭ: «Ministerstva zamiežnych spraŭ kanstatuje, što asobnyja krainy Zachadu praciahvajuć palityku siłavoha ŭcisku na Respubliku Biełaruś, sprabujuć zadziejničać lubyja dastupnyja srodki. Hrupa dziaržaŭ, manipulujučy najaŭnymi pracedurnymi prabiełami, jakija majucca ŭ dakumientach ABSIE, vystupiła ź inicyjatyvaj ab nakiravańni ŭ našu krainu „misii dakładčyka“, nie majučy dla hetaha padstaŭ».

Takim čynam, kanstatavaŭ jon, «advolnaja, u duchu dvajnych standartaŭ, interpretacyja dakumientaŭ ABSIE, dyskryminacyjnyja inicyjatyvy i błokavaje myśleńnie supiarečać kaštoŭnaściam arhanizacyi i razburajuć jaje rolu jak klučavoha forumu pa pytańniach ahulnajeŭrapiejskaj biaśpieki i supracoŭnictva».

«Siońnia my atrymali vidavočnaje paćviardžeńnie, — adznačyŭ jon, — što dziejnaje staršynstva ABSIE i krainy Zachadu nie zacikaŭlenyja ŭ abjektyŭnym i raŭnapraŭnym dyjałohu».

Pres-sakratar taksama zajaviŭ, što rašeńnie Biełarusi ab zakryćci Ofisa ABSIE ŭ Minsku źjaŭlajecca kančatkovym i nijakija pieramovy pa hetym pytańni z zachodnimi partniorami nie viaducca.

Prapanova ab nakiravańni misii mižnarodnych ekśpiertaŭ była zroblena ŭ ramkach schiemy ABSIE, viadomaj taksama jak «Maskoŭski miechanizm». Hetaja schiema była ŭchvalena ŭsimi členami ABSIE, uklučajučy Biełaruś, dla stymulacyi vykanańnia i pavahi pravoŭ čałavieka, asnoŭnych svabod i asnoŭ demakratyi, viaršenstva zakona praz dyjałoh i supracoŭnictva.

• 0
• 0
• 0
• 0
• 0
• 0
• 0
• 0