Na chutary ŭ biełarusaŭ žyvie dzik Fimka — lubić «Śnikiersy» i raŭnuje da inšych
U biełarusaŭ źjaviŭsia novy internet-lubimčyk — dzik Fimka. Jon žyvie na chutary ź ludźmi, hulaje pa lesie, kupajecca ŭ race i staŭ sapraŭdnaj zorkaj TikTok.
Fimku padaryli siamji, kali jamu byŭ usiaho miesiac, raskazvaje «Anłajnier». Haspadary kažuć, što jon «vyras u lubovi i nie viedaje, što takoje ahresija».
Ciapier jamu hod, jon važyć kala 140 kh, ale ŭ budučyni moža dasiahnuć i 300 kh.
Asablivuju papularnaść dzik atrymaŭ dziakujučy videa, jakija zdymaje Michaił (syn haspadara). U kamientarach ludzi pytajucca: «A Fimka ŭvohule viedaje, što jon dzik?»
Fimka pavodzić siabie amal jak sabaka: vilaje chvastom, lubić uvahu i navat chavajecca pamiž noh haspadara, kali ŭ lesie niešta jaho napałochaje. Pry hetym jon vielmi kryŭdlivy: kali jaho łajać, moža demanstratyŭna syści abo naškodzić u adkaz. Adnojčy, naprykład, źjeŭ usie ružy ŭ dvary. A jašče raŭnuje da inšych chatnich hadavancaŭ.
Jaho lubimyja łasunki — čarnicy, kareńčyki i… Snickers. Praŭda, šakaład jamu dajuć vielmi redka. Ale varta tolki skazać słova «śnikiers», jak stomleny Fimka adrazu znachodzić siły biehčy dalej.
Dzik šmat jeść.
«Kašu lubić, asabliva aŭsianuju, u dzień pa dva pački źjadaje. Varym jamu krupy, u kožnuju porcyju dadajom pa 4‑6 jajek. A tak i miasa, i rybu, i tvaroh dajom… Sabačy korm jeść z zadavalnieńniem. Kabany ž ŭsiajednyja. Małako jamu padabajecca: kali pje, až prycmokvaje», — raskazvaje haspadar Uładzimir.
Žartujuć, što Fimka jak ekskavatar — pastajanna pierakopvaje ziamlu ŭ pošukach smakaty.
Asobnaja luboŭ Fimki — vada. Jon z zadavalnieńniem kupajecca ŭ race, za što atrymaŭ mianuški Račnaja śvinka i Ichtyjandr. Padčas kupańnia kabančyk litaralna atrymlivaje asałodu ad žyćcia.
Haspadary adznačajuć, što ŭtrymlivać kabana niaprosta: patrebna šmat času, ciarpieńnia i sił. Ale dla ich Fimka — paŭnavartasny člen siamji.
Ciapier čytajuć
Dziadok raskazaŭ, jak pavodziŭ by siabie ŭ siońniašniaj Biełarusi i što budzie dalej3
Kamientary