Bobu Dyłanu -- 70 hadoŭ

Siońnia spaŭniajecca 70 hadoŭ amerykanskamu śpievaku, kampazytaru i paetu Bobu Dyłanu, adnoj sa znakavych postaciaŭ suśvietnaj kultury XX stahodździa.

Za minułyja 50 hadoŭ aktyŭnaj muzyčnaj karjery Bob Dyłan zapisaŭ amal tysiaču pieśniaŭ. Šmat ź ich vykonvalisia inšymi śpievakami pa ŭsim śviecie, na movach tak roznych jak katalonskaja i esperanta abo iślandzkaja i kchmerskaja.

Pavodle vebsajtu, admysłova pryśviečanaha vykanańniam pieśniaŭ Boba Dyłana inšymi, na śviecie prahučała nia mienš čym 32 tysiačy roznych vykanańniaŭ jahonych kampazycyj. U čym sakret takoj niezvyčajnaj papularnaści Boba Dyłana?

Śviatasłaŭ Vakarčuk, lider ukrainskaha hurta «Akijan Elzy», skazaŭ, što najbolšaj zasłuhaj Dyłana było pavyšeńnie značeńnia piesiennych tekstaŭ:

«Pa-mojmu, najbolšaje dasiahnieńnie Boba Dyłana zaklučajecca ŭ tym, što jon navučyŭ muzykaŭ pisać teksty. Jon navučyŭ uvieś śviet słuchać teksty. Pierad im tekst papularnych pieśniaŭ byŭ, chutčej za ŭsio, dapaŭnieńniem da pryhožaj melodyi, prosta pryhožym naboram zapaminalnych słovaŭ. Paśla Boba Dyłana muzykanty, asabliva rok-muzykanty, stali dumać, što praz muzyku, praź śpieŭ, praz hitaru možna pieradavać niečakanyja, palityčnyja i sacyjalnyja dumki. Naprykład, paznajomiŭšysia z Dyłanam, Poł MakKartni i Džon Lenan pačali źviartać vialikuju ŭvahu na svaje teksty, asabliva Lenan».

Padobnaj dumki prytrymlivajecca i kirhiski rokier, Bakit Kydykbajeŭ:

«Bob Dyłan źmianiŭ charaktar rok-muzyki. Heta jahony vialiki ŭkład. Kali navat na Zachadzie ŭ 1960-ja hady ludzi ŭsprymali rok-muzyku jak lohki, papularny žanr, Bob Dyłan pačaŭ vykarystoŭvać u pieśniach mocnyja słovy z mocnym značeńniem».

Alaksandru Andrys, rumynski folk-śpiavak i kampazytar, pierakłaŭ šmat jakija teksty pieśniaŭ Dyłana na rumynskuju movu i ŭ 1999 hodzie zapisaŭ albom ź jahonymi pieśniami. Andrys pryhadvaje, jak pieršy raz pačuŭ Dyłana na Radyjo Svabodnaja Eŭropa ŭ časy režymu Nikałaje Čaŭšesku ŭ Rumynii:

«Pieršaj pieśniaj Dyłana, jakaja zrabiła na mianie sapraŭdy mocnaje ŭražańnie, była „A Hard Rain's A-Gonna Fall“, pierš za ŭsio tamu, što jana była nievierahodna doŭhaja, što nie było čymści zvyčajnym u toj čas. I pa-druhoje, jaje słovy sapraŭdy niešta značyli. Z druhoha boku, viadoma, my mieli pieśniu „Hey, Jude“ Bitłz, jakaja taksama była vielmi doŭhaj, ale jaje słovy nia mieli istotnaha značeńnia».

U svaje 70 hadoŭ Dyłan praciahvaje pracavać vielmi aktyŭna jak kampazytar i jak vykanaŭca. U siarednim, jon daje 150 kancertaŭ na hod, i praciahvaje zapisvać albomy z novym materyjałam.

Apošnija studyjnyja albomy Dyłana — «Together Through Life» i «Christmas in the Heart» — byli vydadzienyja ŭ 2009 hodzie.

U krasaviku sioleta Dyłan upieršyniu vystupiŭ u Pekinie.

• 0
• 0
• 0
• 0
• 0
• 0
• 0
• 0