Rubiel na čornym rynku znoŭ źnižajecca

U abmieńnikach valuty pa-raniejšamu niama. U valutčykaŭ kurs składaje 5200—6000 za dalar proci ŭčarašnich 5000—5800.

Bieznajaŭnyja pazabiržavyja apieracyi praktyčna spynilisia paśla taho jak Nacbank ustanaviŭ vierchniuju hranicu ich 5030 rubloŭ. Reč u tym, što jašče ŭčora banki pravodzili hiešefty pa 6500—7200, i ciapier pradpryjemstvy, ułaśniki valuty, prosta vyčekvajuć.

U toj ža čas kurs dalara na čornym rynku najaŭnaj valuty ŭ Minsku źlohku ŭźniaŭsia ŭ aŭtorak da 5200—6000. U paniadziełak jon składaŭ 5000—5500 (kupla) i 5300—5800 (prodaž).

U Vilni kurs rubla zaznaŭ anałahičnyja tendencyi. Uviečary paniadziełka dalar u vilenskim abmieńniku Citadele možna było pradać za 4660 rubloŭ, a na 11.00 aŭtorka ŭžo za 4870. U toj ža čas pradavali dalary ŭ aŭtorak za 5770 (uviečary paniadziełka było 5420 rubloŭ).

U roźničnych prodažach niekatoryja napałochanyja krušeńniem rubla handlary vystaŭlajuć navat kurs 8000—10000. Takim čynam jany schilajuć klijentaŭ da bolš nadziejnaha raźliku ŭ dalarach. Ale bolšaść vykarystoŭvaje na siońnia realistyčny kurs pieraliku 5500—6000 za dalar.

Bolšaść ekśpiertaŭ schilajecca da taho, što Nacbanku nie ŭdasca ŭtrymać kurs na ŭzroŭni 5000. A ŭpartaje datrymańnie takoha kursu zachavaje raniejšy deficyt valuty na lehalnym rynku i pryviadzie da roskvitu čornaha rynku.

Psichałahična takaja situacyja vyklikaje dadatkovy cisk na rubiel. Ludzi i pradpryjemstvy čakajuć dalejšaj devalvacyi i ŭ vyniku nakručvajuć jaje sami.

Kurs u abmieńnikach u aŭtorak zastavaŭsia ŭ miežach dazvolenych 5030 rubloŭ. Nahadajem, što ŭ paniadziełak Nacbank aficyjna devalvavaŭ rubiel prykładna na 60%. Pry hetym jon pakinuŭ mahčymaść devalvacyi jašče na 12% (da 5600 rubloŭ) da kanca hoda. Pa kursie 5000 u abmieńnikach zastajecca pa-raniejšamu pusta.

Premjer-ministr Biełarusi Michaił Miaśnikovič u minułuju piatnicu pryznaŭ, što kredyt ad JeŭrAzES składzie ŭsiaho miljard dalaraŭ i jaho budzie niedastatkova, kab stabilizavać kurs. Jon zajaviŭ, što patrebnyja dadatkovyja miery finansavaha i ekanamičnaha charaktaru. Jon abiacaŭ pryniać ich 23—24 maja.

Rezkaje padzieńnie rubla na čornym i bieznajaŭnym rynkach adbyłosia pamiž 15 i 20 maja, kali stała jasna, što kryzis budzie nasić praciahły charaktar.

Nacbank pa-raniejšamu nie maje srodkaŭ dla valutnych interviencyj. U toj ža čas devalvacyjnyja čakańni zastajucca vysokimi.

• 0
• 0
• 0
• 0
• 0
• 0
• 0
• 0