Pačałasia rekanstrukcyja pałaca Ahinskaha ŭ Zaleśsi
U siadzibie Ahinskaha, što ŭ Smarhonskim rajonie Hrodzienskaj vobłakci, “z nula” adnoviać kryło pałaca i pabudujuć hazavuju kacielniu.
Rekanstrukcyja raspačałasia ŭ mai. Za miesiac budaŭniki zrabili fundamient pad kryło pałaca. Hienieralny padradčyk – budaŭniča-mantažny trest №41. Subpadradčyk – AAT “Biełrestaŭracyja”. Pa słovach hałoŭnaha inžyniera “Biełrestaŭracyi” Uładzimira Zmuško, pradpryjemstva budzie vykonvać stalarnyja raboty.
Rekanstrukcyja pavinna zaviaršycca ŭ 2012 hodzie. Za 2011 hod zapłanavana adnavić kryło pałaca, prybudavać da jaho hazavuju kacielniu. Aŭtanomnaje aciapleńnie dazvolić zimoj pracavać unutry pałaca.
Krajaznaŭca, daśledčyk žyćcia Michała Kleafasa Ahinskaha, staršy navukovy supracoŭnik muzieja ŭ Zaleśsi Siarhiej Vieramiejčyk raskazaŭ, što ŭ adnoŭlenym kryle pałaca budzie ciaplica.
Prajekt finansujecca z respublikanskaha i abłasnoha biudžetaŭ. Płanujecca nie tolki adnavić pałac Ahinskaha, ale i dobraŭparadkavać terytoryju kala jaho. Hrošy na dobraŭparadkavańnie parkavaj zony pakul što nie vydzielenyja.
Na dumku Siarhieja Vieramiejčyka, najbolšaj uvahi patrabuje centralnaja častka z kałonami, jakaja biez umacavańnia moža zavalicca.
Ciapierašniaja restaŭracyja – druhaja ŭ najnoŭšaj historyi Biełarusi. Pa słovach Siarhieja Vieramiejčyka, pieršaja sproba była zroblenaja ŭ 90-ch hadach XX stahodździa. Tady adrestaŭravali kapličku, pamianiali dachi, stalarku, uźviali młyn i adnavili altanku Amielii. Z taho času pałac stajaŭ na kansiervacyi.
***
Siadziba Ahinskaha składajecca z pałaca, kaplicy, parku, aficyny (nadvornaja pabudova) i haspadarčych pabudoŭ. Źjaŭlajecca pomnikam architektury kłasicyzmu i sadova-parkavaha mastactva. Rodavy majontak Ahinskich ź pieršaj pałovy XVIII stahodździa, kali hetu majomaść nabyŭ Marcyjan Ahinski (1672-1750), kaštalan, a zatym viciebski vajavoda, pradzied Michała Kleafasa Ahinskaha. Michał Kleafas Ahinski (1765-1833) pasialiŭsia ŭ Zaleśsi ŭ 1802 hodzie. Jon mierkavaŭ pasialicca ŭ Zaleśsi nazaŭsiody, tamu, adrazu jak pryjechaŭ, pačaŭ ramont i pierabudovu siadziby, rearhanizacyju jaje ŭ novy pałacava-parkavy ansambl. Da 1815 hoda raboty byli ŭ asnoŭnym zavieršanyja. Dziakujučy malunkam Leanarda Chodźki, možna śćviardžać, što jana prastajała bieź vialikich źmienaŭ da mižvajennaha pieryjadu. Heta taksama paćviardžaje malunak Napaleona Ordy, zrobleny kala 1877 hoda, a taksama fatahrafii 1914 i 1939 hadoŭ.
Kamientary