«Maŭklivaja» akcyja ŭ Breście: Stajańnie pierarasło ŭ šeście i sutyčki ź milicyjaj +fota

Uviečary 6 lipienia na centralnaj płoščy Bresta znoŭ sabralisia ludzi.

18.45 Dostup na płošču Lenina volny. Mietaličnyja turnikiety stajać u baku, pad damami i nie zastupajuć ruchu. Na vulicy K. Marksa byŭ zaŭvažany aŭtazak z supracoŭnikami milicyi ŭ čornym.

19.00 Na płoščy bližej da fantana sabrałasia kala 100 čałaviek. Siarod tych, chto sabraŭsia zaŭvažanyja supracoŭniki milicyi ŭ cyvilnym, jakija prysutničali i na minułych «maŭklivych» akcyjach. Pakul ludzi nie apładzirujuć. Pa papiarednim płanie apładysmienty pavinny zahučać za piać chvilin da zakančeńnia akcyi, h.zn. ŭ 19.25. Pa niepaćvierdžanaj infarmacyi, u Leninskim RAUS ŭžo znachodzicca Viktar Klimus, staršynia Bresckaj haradskoj arhanizacyi partyi BNF.

19.20 Kolkaść tych, chto sabraŭsia pavialičyłasia da 120-130 čałaviek.

19.14 Aŭto, što jeduć mima, sihnalać u znak padtrymki. Ludzi na płoščy razmaŭlajuć, jaduć maroziva. Pavodle acenak našaha karespandenta, ludziej sabrałasia značna mienš, čym u minułuju i pazaminułuju sierady.

19.15 Telefon Viktara Klimusa nie adkazvaje, pravaabaroncam pra jaho miescaznachodžańnie ničoha nie viadoma. Ludziej na płoščy pastupova prybyvaje.

19.20 Akcyja nosić charaktar niazmušanych znosin dvuch sotniaŭ bieraściejcaŭ na centralnaj płoščy. Za čas akcyi nichto jašče ni razu nie plaskaŭ. Zatrymańni taksama nie byli zaŭvažanyja.

19.27 Ludzi pačynajuć intensiŭna apładziravać.

19.30 Ludzi rynulisia na vuł. Puškinskuju, dzie supracoŭniki milicyi sprabujuć zatrymać maładoha čałavieka. Milicyjanty špurnuli chłopca na ziamlu, ludzi sprabujuć vyrvać jaho ŭ ich. Jany kryčać: «Adpuścicie čałavieka! Adpuścicie dzicia!» Supracoŭnik u cyvilnym sarvaŭ bedž u našaha karespandenta z sumki. Na prośbu viarnuć bedž z nadpisam «Presa», milicyjant zapatrabavaŭ ścierci fatahrafii i pasprabavaŭ vyrvać ftokamieru.

Kala kinateatra «Mir» adbivajuć jašče adnaho zatrymanaha. Jamu ŭdajecca źbiehčy.

19.32 Ludziej kala 300. Jany iduć kałonaj pa vuł. Puškinskaj ŭ bok vuł. Savieckaj.

19.35 Ludzi iduć i plaskajuć u ładki. «My chočam padbadzioryć siabie apładysmientami», — kažuć udzielniki akcyi. Napieradzie majačyć milicejski UAZik. Aŭto sihnalać u znak padtrymki.

19.36 Naš karespandent paskardziŭsia na dziejańni supracoŭnikaŭ milicyi ŭ cyvilnym supracoŭnikam u formie. Jany sprabavali admachnucca ad jaho. Ale paśla pradjaŭlenaj fatahrafii skazali: «Raźbiaremsia paźniej». Kala 350 čałaviek idzie pa Savieckaj i plaskaje ŭ ładki.

19.40 Kala niedabudavanaha centra «Dzidas Pieršyja» kałona spyniłasia, napieradzie vidać, što la pomnika 1000-hodździu vystrailisia ŭ liniju supracoŭniki UUS u formie.

19.44 Kałona ŭsio-tki rušyła na milicyjantaŭ. Pamiž imi i ścianoj doma na vuł. Savieckaj možna pracisnucca i ŭsie ŭdzielniki akcyi imknucca tudy. Amal usie ludzi tudy prajšli. Supracoŭniki milicyi nie zatrymlivajuć hramadzian.

19.45 Na vuł. Hohala stajać 2 aŭtobusa, 2 aŭtazaki i milicejski UAZ. Ludzi sabralisia kala pomnika 1000-hodździa i rychtujucca pierasiekčy prajeznuju častku.

19.48 Prykmietna paradziełaja kałona ruchajecca da CUMu. Pavodle acenak vidavočcaŭ, idzie ŭ kałonie 50-60 čałaviek razroźnienymi kampanijami. Jany znoŭ apładzirujuć.

19.50 Pastupajuć paviedamleńni ab zatrymańni Viktara Čajkoŭskaha, pradstaŭnika RHA «Pierśpiektyva».

19.52 Znoŭ pačalisia zatrymańni — jak minimum troch čałaviek. Sprabujuć zatrymać i našaha karespandenta, ale jon vyślizhvaje. Jon naziraje za vielmi hrubym zatrymańniem maładoha čałavieka supracoŭnikami ŭ cyvilnym. Ludzi sprabavali jaho adbić, ale ničoha nie atrymałasia.

19.53 Supracoŭniki milicyi papiaredžvajuć ab adkaznaści za parušeńnie zakanadaŭstva.

19.55 Ludzi zaklikajuć da sumleńnia milicyjantaŭ: «Vy ž pavinny abaraniać nas, pravaparadak!» Jany sprabujuć daviedacca, što za ludzi ŭ cyvilnym, jakija pravodzili vielmi hrubaje zatrymańnie i pra los čatyroch zatrymanych. «Čamu milicyja staić i hladzić, jak nieviadomyja zapichvajuć ludziej u mašyny?» — aburajucca ŭdzielniki akcyi.

19.56 Nie atrymaŭšy adkazu na svaje pytańni ad milicyjantaŭ, vidavočcy zatrymańnia pačynajuć plaskać u dałoni.

19.58 Pa słovach vidavočcaŭ, kala CUMa staić u čakańni aŭtazak.

20.02 Mienš sotni ludziej vychodziać da CUMu. Tam jany bačać pryparkavanyja kala ŭniviermaha aŭtazak, UAZ i «Haziel». Ludzi spynilisia pad hadzińnikam.

20.10 Ludzi pastupova razychodziacca. Možna skazać, što akcyja zaviaršajecca.

20.15 Aŭtazak źjechaŭ. Na placoŭcy pad hadzińnikam na viežy CUMa staić kala 30 čałaviek, a pa pierymietry — kala dziasiatka supracoŭnikaŭ u formie. Karespandent viartajecca ŭ redakcyju.

20.30 Pa dadzienych pravaabaroncy Ramana Kiślaka, u Leninski RAUS dastaŭlena šaściora zatrymanych. Siarod ich kaardynatar niezarehistravanaj arhanizacyi «Maładaja Biełaruś» Jury Bacuk, staršynia Maskoŭskaj rajonnaj arhanizacyi indyvidualnych pradprymalnikaŭ Svabodnaha prafsajuza Biełaruskaha Stanisłaŭ Fićko. Zaraz da RAUS padjechaŭ jašče adzin aŭtazak.

20.36 Raman Kiślak paviedamlaje pra jašče adnaho zatrymanaha — aktyvista «Maładych demakrataŭ» Maksima Chlabca.

21:26 Siamiora zatrymanych

• 0
• 0
• 0
• 0
• 0
• 0
• 0
• 0