Niaklajeŭ: Biełaruskija ŭłady znoŭ stali hulać u libieralizacyju
«Heta rašeńnie — hulni spadara Łukašenki. Prymajučy jaho, jon zychodziŭ z taho, što bolš vyhadna».
Tak prakamientavaŭeks-kandydat u prezidenty Biełarusi Uładzimir Niaklajeŭ rašeńnie Ministerstva infarmacyi adklikać svaje iski ŭ sud ab spynieńni vypusku niedziaržaŭnych haziet «Naša niva» i «Narodnaja vola».
«Heta rašeńnie — hulni spadara Łukašenki. Prymajučy jaho, jon zychodziŭ z taho, što bolš vyhadna.Z adnaho boku, možna zabaranić haziety, u jakich jość stabilny pastajanny čytač, ale jakija ŭsio ž nie majuć značnaha raspaŭsiudžańnia i ŭpłyvu na ŭsiu Biełaruś. Ź inšaha — možna narvacca na mižnarodny skandał, jaki b raspačaŭsia paśla zakryćcia haziet. Tamu było vyrašana dać im pracavać dalej», — skazaŭ palityk.
Na dumku Niaklajeva, uładam, «viadoma, chaciełasia b haziety zakryć». «Ale situacyja — źniešniaja, ekanamičnaja, unutrypalityčnaja — hetaha zrabić nie dazvalaje, vymahaje padparadkavacca patrabavańniam Jeŭrasajuza, ZŠA i Rasii, kab dabracca da miljardaŭ, jakija mohuć vyratavać hetuju ŭładu, jakaja ŭžo ŭsim nadakučyła».
«Pavarot da libieralizacyi jak da hulni niepaźbiežny, — miarkuje Niaklajeŭ. —
Ale treba razumieć: hety režym nikoli nie demakratyzujecca. Zachady, jakija jon vymušany rabić, ukazvajuć na vidavočnyja prykmiety jaho słabaści.Kali treskajecca fundamient, buduć treskacca i ścieny».
Lidar Abjadnanaj hramadzianskaj partyi Anatol Labiedźka taksama ličyć, što ŭ situacyi z «Narodnaj volaj» i «Našaj nivaj» ułady pakazali svaju słabaść. «Adklikańnie iskaŭ ab spynieńni vypusku haziet śviedčyć pra toje, što ŭłada siońnia nie nastolki mocnaja, kab razdavać naprava i naleva aplavuchi i pry hetym nie zadumvacca ab nastupstvach svaich dziejańniaŭ», — skazaŭ Labiedźka ŭ kamientaryi BiełaPAN.
Ciapier čytajuć
Zorka brejkdansu ź Viciebska atrymaŭ 11 hadoŭ turmy ŭ Kitai. Što zdaryłasia?4
Kamientary