Pieravod ksiandza Łašuka vyklikaŭ niezadavolenaść parafijan

Vierniki prasili pakinuć a. Ihara Łašuka na raniejšym miescy. Ich zvarot nie padtrymała katalickaje duchavienstva.

Vierniki źviarnulisia ŭ Minska-Mahiloŭskuju archidyjaceziju z prośbaj pakinuć ksiandza Ihara pry parafii Sv. Jana Chryściciela ŭ Minsku. «Zdajecca, nie tak šmat u Biełarusi śviataroŭ, jakija b ... zmahli raspačać pabudovu novaha kaścioła, jak a.Ihar Łašuk. Miarkujem, što praź jahony prykład słužeńnia Bohu i ludziam, kaściolnaja supolnaść u Sierabrancy pavialičvajecca hod ad hoda. Dziakujučy jaho niazhasnaj enierhii kaściolny kompleks parafii Sv. Jana Chryściciela dabudoŭvajecca. I my na prykładzie probašča a. Ihara taksama imkniemsia spryčynicca da adnaŭleńnia našych śviatyniaŭ».

Adkaz jany atrymali ad nastajaciela ordena Salezijancaŭ Dona Boska, da jakoha naležyć ksiondz Ihar, Džuzepe Pielicary. U im havarycca, što «pieravod na inšaje miesca — heta zvyčajnaja sprava ŭ žyćci kožnaha salezijanca. U nas niama pastajanstva miescaprybyvańnia, jak u starych manašaskich ardenaŭ. Zarok pasłuchmianaści nie nadta lohki ŭ vykanańni. Jon patrabuje achviaraŭ nie tolki dla manacha, jaki jaho daje, ale i dla tych, chto manacha lubić».

Z 1 žniŭnia ksiondz Ihar Łašuk pryznačany nastajacielem ryma-katalickaj parafii ŭ v. Bahdanava Vałožynskaha rajona.

Sam ksiondz nie viedaje pryčynu pieravodu. I, zhodna z zarokam, padparadkujecca voli nastajaciela.

Ihar Łašuk naradziŭsia 30 sakavika 1966 hoda ŭ v. Makašy Niaśvižskaha rajona. Jon vyznačyŭsia svajoj pracaj pa stvareńni katalickich parafij i viartańni šerahu chramaŭ viernikam. Pakinuŭšy vučobu ŭ Hrodzienskim sielskahaspadarčym instytucie, pačaŭ pracavać zakrystyjaninam u Niaśvižskim farnym kaściole. U 1988-1989 hodzie arhanizavaŭ parafiju Svsv. Piatra i Paŭła ŭ v. Novy Śvieržań Staŭbcoŭskaha rajona, arhanizavaŭ viartańnie kaścioła i parafii Sv. Jana Chryściciela ŭ p. Snoŭ Niaśvižskaha rajona. Vypusknik Londskaj salezijanskaj duchoŭnaj sieminaryi. U 1990 hodzie vydaŭ pieršy paśla Druhoj suśvietnaj vajny «Karotki Katechizm dla biełarusaŭ-katolikaŭ» na biełaruskaj movie.

U 1993 hodzie atrymaŭ śviatarskija paśviačeńni. Pracavaŭ vikaryjem u parafii Biezzahannaha Začaćcia Najśviaciejšaj Panny Maryi ŭ Lidzie. Tam zasnavaŭ parafiju Sv. Jana Boska ŭ pasiołku Maładziožnym (nazva parafii paźniej była źmieniena). U Minsku stvaryŭ parafii Śviatoha Ducha i Božaha Cieła. U 1996 byŭ pryznačany probaščam parafii Śviatoha Jana Chryściciela ŭ Minsku. Pry im pačałosia budaŭnictva kaścioła ŭ Minsku, upieršyniu za 100 apošnich hadoŭ.

• 0
• 0
• 0
• 0
• 0
• 0
• 0
• 0