Viktoryja Azaranka vyjšła ŭ treci kruh bujnoha tenisnaha turniru ŭ Taronta
Biełaruskaja tenisistka Viktoryja Azaranka (4-y numar suśvietnaha rejtynhu) vyjšła ŭ treci kruh adzinočnaha razradu bujnoha turniru Rogers Cup u Taronta (Kanada) z pryzavym fondam 2 młn. 50 tysiač dołaraŭ ZŠA. «Pasiejanaja» na turniry pad 4-m numaram, pieršy kruh Azaranka prapuściła, a ŭ druhim lohka abyhrała kanadku Stefani Dziubua (108) — 6:0, 6:0.
U trecim kruzie Azaranka siońnia sustreniecca ź ispankaj Maryjaj Chase Marcinies Sančes (37), jakaja prabiłasia ŭ asnoŭnuju sietku z kvalifikacyi i ŭ pieršym kruzie abyhrała 14-ju «siejanuju» rasijanku Anastasiju Paŭlučenkavu.
Jašče adna biełaruskaja tenisistka Volha Havarcova (105) u adzinočnym razradzie startavała z kvalifikacyi, ale ŭžo ŭ pieršym kruzie paciarpieła paražeńnie ad italjanki Albierty Bryjanci (56) — 1:6, 5:7.
Viktoryja Azaranka i Volha Havarcova taksama hulajuć i ŭ parnym razradzie.
Duet Azaranki i rasijanki Maryi Kirylenki atrymaŭ 4-y numar «pasievu» i ad pieršaha kruha byŭ vyzvaleny. U druhim ža kruzie biełaruska-rasijskaj pary siońnia adbudziecca matč z Anaj Ivanovič (Sierbija) i Andrea Pietkavič (Hiermanija).
Volha Havarcova i Čya-Juń Čuań z Tajvania ŭ pieršym kruzie abyhrali rasijska-francuzskuju paru Maryja Kandraćjeva/Safi Lefieŭr — 6:3, 7:5. U druhim kruzie Havarcova i Čuań siońnia zhulajuć suprać polskaha dueta Kłaudzia Jans-Ihnacik/Alicyja Rasolska.
Adznačym, što letaś Rogers Cup prachodziŭ na kortach Manreala. Viktoryja Azaranka dajšła da paŭfinału, dzie ŭstupiła rasijancy Viery Zvanarovaj, a Volha Havarcova ŭžo ŭ pieršym kruzie prajhrała bielhijcy Janinie Vikmajer.
Kamientary