Nacyjanalny bank kateharyčna abviarhaje paviedamleńni, što źjavilisia ŭ ŚMI, pra zabaronu kamiercyjnym bankam pradavać nasielnictvu najaŭnuju zamiežnuju valutu praz abmiennyja punkty.
Nacyjanalny bank Biełarusi kateharyčna abviarhaje paviedamleńni, što źjavilisia ŭ ŚMI, pra zabaronu kamiercyjnym bankam pradavać nasielnictvu najaŭnuju zamiežnuju valutu praz abmiennyja punkty.
«Absalutnaja bolšaść bankaŭskich abmiennych punktaŭ buduć ažyćciaŭlać apieracyi jak pa kupli, tak i pa prodažy valuty», — havorycca ŭ kamientary Nacbanka ŭ suviazi ź listom, jaki byŭ razasłany bankam 23 žniŭnia.
U liście Nacbanka, nahadajem, utrymlivałasia rekamiendacyja ažyćciaŭlać u abmiennych punktach, raźmieščanych na rynkach i ŭ handlovych centrach, tolki kuplu najaŭnaj zamiežnaj valuty z nastupnym nakiravańniem hetaj valuty na prodaž nasielnictvu na sacyjalna značnyja patreby.
Jak tłumačyć Nacbank, list byŭ padrychtavany ŭ adpaviednaści sa zvarotam Asacyjacyi biełaruskich bankaŭ i nakiravany ŭ adras tolki šaści sistemaŭtvaralnych bankaŭ krainy. «Nazvanaje rašeńnie źviazanaje, pierš za ŭsio, ź nieabchodnaściu ŭparadkavańnia situacyi vakoł abmiennych punktaŭ, raźmieščanych u bujnych handlovych centrach i na rynkach. Manitorynh pakazvaje, što ŭ hetych miescach nazirajucca čerhi z hramadzian, jakija nabyvajuć valutu, — havorycca ŭ kamientary. — Pry hetym u čerhach praktyčna prysutničajuć adny i tyja ž asoby, jakija ź vialikaj dolaj vierahodnaści nabyvajuć zamiežnuju valutu dla nastupnaha jaje prodažu na nierehulavanych siehmientach valutnaha rynku».
Akramia taho, ličać u Nacbanku, «najaŭnaść čerhaŭ kala abmiennych punktaŭ nie tolki pieraškadžaje narmalnaj pracy piersanału handlovych centraŭ i rynkaŭ, ale i stvaraje značnyja niazručnaści dla ich naviednikaŭ».
U suviazi z hetym bujnym biełaruskim bankam, jakija majuć punkty abmienu valuty na terytoryi handlovych centraŭ i rynkaŭ, dadziena prava sumiesna z kiraŭnictvam hetych handlovych abjektaŭ vyznačycca — ci chočuć jany vykarystać prapanavany ŭ liście Nacbanka režym pracy abmiennych punktaŭ, i ŭ jakich kankretnych abmiennych punktach.
«Usie astatnija abmiennyja punkty krainy, heta značyć absalutnaja bolšaść, buduć ažyćciaŭlać apieracyi jak pa kupli, tak i pa prodažy valuty», — padkreślivajecca ŭ kamientary hałoŭnaha banka krainy.
Kamientary