Prajezd u mietro chočuć zrabić daražejšym, čym u aŭtobusie? Rychtujem sustrečnyja prapanovy.
Minharvykankam płanuje zrabić prajezd u mietro daražejšym, čym u naziemnych vidach transpartu. Čynoŭnikaŭ nie spyniaje navat admova Minekanomiki, jakoje zaviarnuła ich prapanovy.
Kab pavyšeńnie cenaŭ nie było hulnioj u adny varoty, vykažam niekalki prapanovaŭ pa ŭdaskanalvańni pracy mietrapalitena.
Prajaznyja dakumienty
U minskim mietro ich usiaho try vidy: na miesiac, paŭmiesiaca i na dekadu. Ich dziejańnie stroha pryviazana da kalendara. A čamu b nie zrabić, jak u Polščy — prajazny na 1 dzień, na 3, na 12 i h.d.? Čym bolšy termin dziejańnia prajaznoha — tym jon tańniejšy. I kab jon pačynaŭ dziejničać z momantu pahašeńnia.
Turnikiety
Daŭno para źmianić prasłaŭlenyja jašče ŭ savieckim multfilmie «Nu, pačakaj!» pahroźlivyja prystasavańni na bolš humannyja i sučasnyja. Nadakučyła ŭvieś čas rychtavacca da ŭdaru pa kaleniach na vychadzie ź mietro ŭ rajonie čyhunačnaha vakzała. Za prykład možna ŭziać Kijeŭ, dzie na mnohich stancyjach užo dziejničajuć biaśpiečnyja turnikiety.
Eskałatary na Kastryčnickaj
Rekanstrujavanaja ŭ 2008-m stancyja zajmieła na vychadzie na pierasadačny vuzieł čatyry eskałatary zamiest troch. Tady kazali, što heta pavinna vyrašyć prablemu vielizarnych čerhaŭ kala eskałataraŭ. Ale, padajecca, natoŭpy nikudy nie źnikli. Tak, praca eskałataraŭ padparadkoŭvajecca strohamu hrafiku, ale ci lahčej ad taho pasažyram? Stajańnie ŭ natoŭpie ŭ padziemcy samo pa sabie małapryjemnaje, a paśla padziej 11 krasavika adklučany «nie ŭ hadzinu pik» eskałatar vyhladaje ździekam.
Kamientary