Nasielnictva prosiać nie chvalavacca i kažuć, što kalarovy śnieh absalutna biaśpiečny.
Pamarančavy, abo žoŭty, abo ržavy śnieh z oliŭnymi plamami j zatchłym pacham vypaŭ u Tomskaj, Omskaj i Ciumienskaj abłaściach Rasiei.
«Śnieh nie niasie niebiaśpieki dla ludziej. Śnieh maje pieravyšeńnie metału ŭ čatyry razy i z‑za akiśleńnia nabyvaje taki koler. Chutčej za ŭsio, heta pradukt metalurhii», — skazaŭ kiraŭnik MNS Rasiei pa Ciumienskaj vobłaści.
Ekolahi ŭsturbavanyja: «U kožnym razie, ničoha dobraha nasielnictvu tych rajonaŭ, dzie vypaŭ śnieh z žoŭtym adcieńniem, niama,» — skazaŭ u piatnicu člen‑karespandent rasiejskaj akademii navuk Alaksiej Jabłakaŭ. «Chutčej za ŭsio, heta mohuć być vykidy z naftapierapieracoŭčych pradpryjemstvaŭ albo z zavodaŭ pa vytvorčaści mineralnych uhnajeńniaŭ. Štości takoha kštałtu. Heta prykmieta vielmi drennaj ačystki vykidaŭ albo jakich‑kolviek avaryj na pradpryjemstvach,» — skazaŭ Jabłakaŭ.
Ekolah paviedamiŭ, što, pavodle jahonaj acenki, «nastupstvy vykidaŭ byvajuć doŭhaterminovymi, jany mohuć vyjavicca praz adzin‑dva hady, navat praź piać hadoŭ, i adbicca na zdaroŭi dziaciej i darosłych». «Treba terminova pravodzić hłybokija analizy i prymać prafilaktyčnyja zachady, u tym liku pa ačystcy pitnoj vady», — skazaŭ Jabłakaŭ.
Heta nia pieršy pamarančavy śniehapad u Rasiei. Letaś kalarovyja sumioty namiało na Sachalinie i ŭ rasiejskim Prymorji. Tady heta śpisali na piaski Manholii, praź jakuju cyklon išoŭ na Rasieju.
A ŭ amerykanskim Kałarada letašniaj viasnoj vypaŭ śnieh ružovaha koleru. Samyja cikaŭnyja paspatali jaho — na smak śnieh byŭ padobny da kavuna. Taki koler nadali śniehu miascovyja vodaraści, jakija vyrablajuć čyrvony pihment i biaśpiečnyja dla spažyvańnia, viadoma, va ŭmieranych dozach.
Fota lenta.ru
Kamientary