Hienprakuratura: Kryminalnaja sprava na biznesoŭca Šaŭcova zaviedziena

U Hienieralnaj prakuratury BiełaPAN paćvierdzili najaŭnaść kryminalnaj spravy ŭ dačynieńni da staršyni rady dyrektaraŭ ZAT «Biełzamiežbud», kiraŭnika naziralnaj rady ZAT «Trastbank» Viktara Šaŭcova.

Rasśleduje spravu MUS, adnak tam situacyju nie kamientujuć. Artykuł, na padstavie jakoha raspačata kryminalnaja sprava, nie nazyvajecca. Nieviadoma taksama, ci zatrymany biźniesmien.

Pavodle nieaficyjnaj infarmacyi, Šaŭcova zatrymali ŭ siaredzinie kastryčnika — na pačatku listapada.

Šaŭcoŭ uvachodzić u dziasiatku najbolš upłyvovych biełaruskich biźniesmienaŭ.

* * *

23 listapada pieršy vice-premjer Uładzimir Siamaška na prośbu prakamientavać infarmacyju ab zatrymańni Šaŭcova zajaviŭ: «Nie mahu kamientavać, bo heta prerahatyva peŭnych orhanaŭ». Razam z tym jon zaznačyŭ, što «Biełzamiežbud» źjaŭlajecca zakrytym akcyjaniernym tavarystvam, jakoje było stvorana śpiecyjalna dla realizacyi biełaruskich prajektaŭ u Vieniesuele. «Pačynali jany vielmi ciažka, tamu što zamaŭlali našy prajekty (dla budaŭnictva žyłych damoŭ i pradpryjemstvaŭ), a potym davodziłasia ich adaptavać da vieniesuelskich umoŭ. Ale ŭ mianie da ich pretenzij jak da budaŭničaj arhanizacyi niama. Jany budujuć i vykonvajuć usie damoŭlenaści ŭ termin», — zajaviŭ Siamaška.

Jon nazvaŭ «Biełzamiežbud» «udałym kanhłamieratam». Pradpryjemstva «było stvorana pravilna i funkcyjanavała paśpiachova», miarkuje pieršy vice-premjer.

ZAT «Biełzamiežbud» było stvorana ŭ 2007 hodzie z udziełam «Trastbanka». Kampanija realizuje najbujniejšyja budaŭničyja prajekty ŭ Vieniesuele, Amanie, Saudaŭskaj Aravii, Aŭstryi, Arhiencinie, Hiermanii, Karei, AAE.

ZAT «Trastbank» źjaŭlajecca adnym z najstarejšych pryvatnych bankaŭ u Biełarusi: byŭ stvorany ŭ 1994 hodzie i nazyvaŭsia tady «Infabank». Pierajmienavany ŭ lutym 2005 hoda paśla palityčnaha skandału. Minfin ZŠA abvinavaciŭ «Infabank» u «admyvańni hrošaj dla režymu Sadama Chusiejna», zaroblenych u vyniku ździełak, jakija ažyćciaŭlalisia ŭ abchod prahramy AAN «Nafta ŭ abmien na charčavańnie» i z vykarystańniem niezakonnych nadbavak i zavyšanych kantraktaŭ. «Infabank» tady aficyjna adchiliŭ usie abvinavačańni, adnak chutka źmianiŭ nazvu.

Z 2001 hoda akcyjanieram «Infabanka» z dolaj 35% źjaŭlaŭsia Livijski arabski zamiežny bank, jaki vyjšaŭ sa składu ŭłaśnikaŭ biełaruskaha banka ŭ 2008 hodzie.

Letam hetaha hoda Šaŭcoŭ za dabračynnuju dziejnaść byŭ udastojeny vyšejšaj uznaharody Biełaruskaj pravasłaŭnaj carkvy — ordena śviatoha Kiryła Turaŭskaha, a jaho žonka Alena — miedala Jefrasińni Połackaj.

• 0
• 0
• 0
• 0
• 0
• 0
• 0
• 0