Jak paviedamiŭ, pradstaŭlajučy dakumient, staršynia KDB Vadzim Zajcaŭ, novaja redakcyja nie maje pryncypovych adroźnieńniaŭ ad dziejnaha zaraz zakona.
«Dakumient nie daje supracoŭnikam orhanaŭ dziaržbiaśpieki niejkich novych pravoŭ, a tolki ŭdakładniaje i kankretyzuje ich paŭnamoctvy», — skazaŭ jon.
Kiraŭnik KDB paviedamiŭ, što istotnuju praŭku zaznaŭ artykuł, jaki rehłamientuje prymianieńnie zbroi, śpiecyjalnych srodkaŭ i fizičnaj siły, tamu što ŭ dziejnym zakanadaŭstvie jon maje adsyłačny charaktar.
Nieabchodna zaznačyć, što pastupleńnie zakonaprajekta ŭ pałatu pradstaŭnikoŭ było nieadnaznačna ŭspryniata biełaruskimi pravaabaroncami, jakija zajavili, što supracoŭniki śpiecsłužbaŭ faktyčna nadzialajucca nieabmiežavanymi paŭnamoctvami.
Zhodna z zakonaprajektam, supracoŭniki orhanaŭ dziaržbiaśpieki
zmohuć «uvachodzić bieśpieraškodna, pry nieabchodnaści z paškodžańniem pryład dla zamykańnia i inšych pradmietaŭ u luby čas sutak u žyłyja pamiaškańni ci inšyja zakonnyja ŭładańni fizičnych asob», a taksama ŭ pamiaškańni i inšyja abjekty dziaržorhanaŭ, arhanizacyj(akramia pamiaškańniaŭ i abjektaŭ dypłamatyčnych, konsulskich, inšych pradstaŭnictvaŭ zamiežnych dziaržaŭ, mižnarodnych arhanizacyj, na jakija raspaŭsiudžvajecca dziejańnie dypłamatyčnaha imunitetu, i pamiaškańniaŭ, u jakich pražyvajuć supracoŭniki hetych pradstaŭnictvaŭ, arhanizacyj i ich siemji).
Hetyja praniknieńni i ahlad pamiaškańniaŭ apraŭdanyja «pry pieraśledzie asob, jakija padazrajucca va ŭčynieńni złačynstva, abo pry najaŭnaści dastatkovych padstaŭ mierkavać, što tam učyniajecca ci ŭčyniena złačynstva ci znachodzicca asoba, jakaja chavajecca ad orhanaŭ, što viaduć kryminalny praces», havorycca ŭ zakonaprajekcie.
Akramia taho, pavodle dakumienta, supracoŭniki orhanaŭ dziaržbiaśpieki
majuć prava «prymianiać fizičnuju siłu, u tym liku bajavyja pryjomy baraćby, padručnyja srodki dla spynieńnia złačynstvaŭ i inšych pravaparušeńniaŭ, zatrymańnia asob, jakija ich učynili ,kali niehvałtoŭnyja sposaby nie zabiaśpiečvajuć vykanańnia ŭskładzienych na ich słužbovych abaviazkaŭ».
Pry hetym supracoŭniki orhanaŭ dziaržbiaśpieki nie niasuć adkaznaści za ŭron, pryčynieny z prymianieńniem fizičnaj siły, vykarystańniem zbroi, śpiecsrodkaŭ, bajavoj i śpiecyjalnaj techniki, kali ich dziejańni byli «va ŭmovach abhruntavanaj prafiesijnaj ryzyki ci krajniaj nieabchodnaści».
Adkaznaść dla ich taksama nie praduhledžana, kali nie byli pieravyšanyja «miežy nieabchodnaj abarony ci miery, nieabchodnyja dla spynieńnia złačynstvaŭ i zatrymańnia asob,a taksama kali jany dziejničali pa abaviazkovym zahadzie ci rasparadžeńni, addadzienych va ŭstanoŭlenym paradku, za vyklučeńniem učynieńnia imi naŭmysnaha złačynstva pa zaviedama złačynnym zahadzie».
Supracoŭnikam orhanaŭ dziaržbiaśpieki taksama dazvolena prymianiać «naručniki, humovyja pałki, srodki źviazvańnia, śpiecyjalnyja chimičnyja rečyvy, śviatłohukavyja pryłady adciahvajučaha dziejańnia, pryłady dla adkryvańnia pamiaškańniaŭ, pryłady dla prymusovaha spynieńnia transpartnych srodkaŭ i inšyja śpiecyjalnyja srodki, u tym liku słužbovych žyvioł», u pryvatnaści, u vypadku «spynieńnia masavych biesparadkaŭ i hrupavych parušeńniaŭ hramadskaha paradku abo dziejańniaŭ, skiravanych na paškodžańnie i (ci) źniščeńnie majomaści».
Zhodna z prajektam zakona, «ab ranieńni ci śmierci asoby z pryčyny prymianieńnia fizičnaj siły, śpiecyjalnych srodkaŭ, bajavoj i śpiecyjalnaj techniki, prymianieńnia (vykarystańnia) zbroi» orhany dziaržbiaśpieki pavinny «nieadkładna infarmavać prakurora».
Kamientary