Trymajcie kišeniu šyrej!

Jak žychar Oršy Vasil Haŭryłaviec sprabavaŭ damahčysia ad dziaržavy indeksacyi svajho bankaŭskaha ŭkłada paśla devalvacyi, i što z hetaha atrymałasia.

Toje, jak «łapuchnulisia» biełarusy, jakija pavieryli dziaržavie i zrabili na pačatku hetaha hoda ci jašče raniej bankaŭskija ŭkłady ŭ biełaruskich rublach, raskazvać nie treba. Ale ž vieryli…

Naprykład, u listapadzie 2010 hoda Alaksandr Łukašenka ŭ svajoj pieradvybranaj prahramie abiacaŭ: «Buduć zabiaśpiečany stabilnaść kursa biełaruskaha rubla, absalutnaja zachavanaść pryvatnych układaŭ, dastupnaść bankaŭskaha kredytu…»

Vybary prajšli. U sakaviku hetaha hoda ŭžo Nacyjanalny bank Biełarusi vydaje pres-reliz: «U suviazi sa źjaŭleńniem u apošni čas pravakacyjnych čutak ab mahčymaj rezkaj devalvacyi nacyjanalnaj valuty, jakija atrymali šyrokaje raspaŭsiudžvańnie dziakujučy asobnym ŚMI i sietcy Internet, Nacyjanalny bank paviedamlaje, što hetyja čutki nijakim čynam nie adpaviadajuć rečaisnaści. Akramia taho, źmianieńni abmiennaha kursa biełaruskaha rubla, jakija vychodziać za ramki paramietraŭ, što ŭstanoŭleny Asnoŭnymi nakirunkami hrašova-kredytnaj palityki Respubliki Biełaruś na 2011 hod, nie płanujucca i pravodzicca nie buduć… U dany momant dla zabieśpiačeńnia ŭstojlivaści nacyjanalnaj valuty Nacyjanalny bank vałodaje ŭsimi nieabchodnymi jak manietarnymi instrumientami, tak i zołatavalutnymi reziervami. Ich uzrovień całkam dastatkovy dla padtrymańnia stabilnaści biełaruskaha rubla…»

Voś takija «łasunki» ludziam abiacali, ale na vychadzie atrymaŭsia poŭny «pšyk». Biełaruskija rubli abiascenilisia ŭ adnosinach da dołara amal u try razy, vyraśli ceny, a adpaviedna «pahareli» i bankaŭskija ŭkłady ŭ biełaruskich rublach. Žychar Oršy Vasil Haŭryłaviec spraviadliva vyrašyŭ, što dziaržava, «jak harant stabilnaści i spraviadlivaści», pavinna adkazvać za svaje słovy, i źviarnuŭsia ŭ Nacyjanalny bank pa pytańni indeksacyi svajho ŭkłada.

— Ja pavieryŭ, što moj rublovy ŭkład nie «zharyć», ale atrymlivajecca, što mianie elemientarna padmanuli, — kaža jon.

Adkaz z Nacyjanalnaha banka Vasilu Haŭryłaŭcu pryjšoŭ u žniŭni za podpisam namieśnika staršyni praŭleńnia Nacbanka S.Dubkova. I zaraz spadar Haŭryłaviec užo viedaje, chto vinavaty ŭ jaho niaščaściach. Akazvajecca, što… suśvietny kryzis! Voś tolki niekatoryja vytrymki z adkazu aršancu:

«…Suśvietny finansavy kryzis abumoviŭ paharšeńnie ŭmoŭ funkcyjanavańnia nacyjanalnaj ekanomiki, što adbiłasia na eksparcie ajčynnych tavaraŭ i pryviało da skaračeńnia valutnaj vyručki, rostu zapazyčanaściaŭ i inšych niehatyŭnych tendencyj. Na praciahu niekalkich hadoŭ Nacyjanalnamu banku sumiesna z Uradam udavałasia padtrymlivać stabilnaść biełaruskaha rubla, vysoki ŭzrovień zarobkaŭ i žyćcia nasielnictva. Ale va ŭmovach pieravyšeńnia popytu nasielnictva na impartnuju pradukcyju i skaračeńnia popytu na tavary ajčynnaj vytvorčaści z boku zamiežnych partnioraŭ, rostu cen na enierhanośbity ŭ krainie pačaŭ adčuvacca niedachop zamiežnaj valuty. Situacyja jašče bolš pahoršyłasia z-za rostu ažyjatažnaha popytu z boku nasielnictva na zamiežnyju valutu, u tym liku — dla pakupki lehkavych mašyn. Dla zadavalnieńnia ŭzrosłaha popytu na zamiežnuju valutu byli zatračany značnyja zołatavalutnyja reziervy dziaržavy.

…Nacyjanalny bank pryniaŭ usie miery, jakija zaležali ad jaho, pa stabilizacyi situacyi na ŭnutranym valutnym rynku. U hetaj situacyi pasłableńnie biełaruskaha rubla akazałasia vymušanaj mieraj, jakaja nakiravana na karekciroŭku źniešnich i ŭnutranych dysbałansaŭ ekanomiki, bo ŭstojlivaść nacyjanalnaj hrašovaj adzinki zaležyć ad efiektyŭnaści ŭsioj ekanomiki, jaje kankurentazdolnaści, tempaŭ rostu vytvorčaści pracy (u paraŭnańni z zarobkam), prybytku ad realizacyi tavaraŭ i pasłuh jak unutry krainy, tak i na źniešnich rynkach i mnohich inšych faktaraŭ.

Źviartajem Vašu ŭvahu na toj fakt, što suma źbieražeńniaŭ u biełaruskich rublach, jakija znachodziacca na bankaŭskich układach (depazitach), nie źmienšyłasia, a źmianiŭsia valutny ekvivalent układaŭ u vyniku źmianieńnia kursa biełaruskaha rubla ŭ adnosinach da zamiežnych valut. Adnak varta ŭličvać, što pakupnickaja zdolnaść hrašovych srodkaŭ na ŭnutranym rynku aceńvajecca z ulikam uzroŭniu inflacyi. Padtrymańnie pakupnickaj zdolnaści źbieražeńniaŭ, jakija davieryli bankam, ažyćciaŭlajecca šlacham pracentnaj palityki».

Dalej Vasilu Haŭryłaŭcu rastłumačyli, što Nacyjanalny bank pastajanna pavyšaje staŭku refinansavańnia, kab kampiensavać inflacyjnyja straty, ale naprykancy dadali:

«Razam z tym dziejučaje zakanadaŭstva nie ŭtrymlivaje norm, jakija rehłamientujuć abaviazacielstvy dziaržavy pa abaronie źbieražeńniaŭ nasielnictva ad źmianieńnia kursa biełaruskaha rubla ŭ adnosinach da zamiežnych valut i zachavańni suadnosnaha ekvivalentu ŭ zamiežnaj valucie».

Voś z hetaha, jak mnie padajecca, i treba było pačynać. Hałoŭnaja fraza va ŭsim hetym adkazie — «zakanadaŭstva nie ŭtrymlivaje norm, jakija rehłamientujuć abaviazacielstvy dziaržavy pa abaronie źbieražeńniaŭ nasielnictva ad źmianieńnia kursa biełaruskaha rubla ŭ adnosinach da zamiežnych valut». A «suśvietny finansavy kryzis», jak i vajna, usio śpiša. I nichto nikomu nie pavinien…

• 0
• 0
• 0
• 0
• 0
• 0
• 0
• 0