Budučy «Piekin» u centry Minska ŭžo razzłavaŭ miascovych

U parku 40-hodździa Kastryčnickaj revalucyi płanujecca ŭźviadzieńnie hatelnaha kompleksu «Piekin». Vakoł hetaha prajekta ŭžo razharelisia žarści: miascovyja žychary abaraniajuć park i źviartajucca da čynoŭnikaŭ.

— My stukajemsia ŭ instancyi sa śniežnia minułaha hoda, jak tolki daviedalisia, što prajekt budaŭnictva hatela «Piekin» uchvaleny, — kaža hramadskaja aktyvistka, žycharka rajona Ludmiła Hajkoŭskaja. — Namieśnik kiraŭnika administracyi Leninskaha rajona Uładzimir Liciecki zapeŭnivaŭ nas, što «pad siakieru» pojdzie niekalki drevaŭ u rajonie hramadskaj prybiralni z kraju parka, što nichto sam park vysiakać nie stanie. Ale my prosta žachnulisia, kali ŭbačyli, jakuju terytoryju abnieśli płotam. Heta praktyčna ŭvieś park! Kali ž my stali na darozie dryvasiekaŭ z «Minskzielenbuda», źjavilisia ludzi ŭ cyvilnym. Skazali, što jany ź Leninskaha RUUS, i kali tut budzie parušacca paradak, to vinavatyja mohuć trapić na «sutki».

Na dapamohu miascovym žycharam pryjšli ekołahi.

— Paśla pieršaj vysiečki byli nakiravanyja listy ŭ administracyju prezidenta, kiraŭnictvu Leninskaha rajona, u ŚMI i Ministerstva pryrody, — dzielicca aktyvistka ekałahičnaha tavarystva «Zialonaja sietka» Maryna Dubina. — Ministr rasparadziŭsia stvaryć kamisiju, jakaja pavinna razabracca ŭ kanfliktnaj situacyi. Ale, jak bačycie, 5 studzienia vysiečka znoŭ adnaviłasia.

Pavodle dadzienych na kaniec minułaha tydnia, u parku śpiłavana 30 drevaŭ.

— Častku maładych drevaŭ pieranosim ŭ inšy rajon, pierasadžvajem. A tyja, što paznačanyja kryžam, — «pad piłu», — raskazaŭ adzin z pracaŭnikoŭ «Minskzielenbuda». — My naohuł nie vielmi razumiejem, navošta tak kalečyć park. Tut, pa-dobramu, treba ŭsio dobraŭparadkavać. Nie tak užo šmat namahańniaŭ dla hetaha treba prykłaści, i budzie vydatny park. U centry Minska takich praktyčna niama…

Rabotniki «Minskzielenbuda» da abaroncaŭ parka staviacca łajalna.

— My robim toje, što nam skazali, — kažuć jany. — A žančyny pad bienzapiłu kidajucca, jak nienarmalnyja.

Abaroncy parka śćviardžajuć, što hramadskaha abmierkavańnia budaŭnictva hatela nie było.

— Usie dumali, što budoŭla zakranie terytoryju, dzie ciapier raźmieščanaja byłaja hramadskaja prybiralnia. Ale nijak nie ŭvieś park, — adznačajuć jany. — My chočam, kab ułady nas pačuli i razabralisia ŭ situacyi. Čamu nielha pabudavać hatel, da prykładu, na terytoryi zavoda imia Kirava?

Sapraŭdy, praz darohu ad parka razburajucca karpusy zavoda. Na płatach nadpisy: «Ruki preč ad parka!»

5 studzienia vysiečka niečakana adnaviłasia.

— My adrazu kinulisia na abaronu drevaŭ. Paźniej pryjechali čynoŭniki z administracyi Leninskaha rajona. Jany skazali, što było pryniataje rašeńnie paskoryć vysiečku. Nam pakazali prajekt zabudovy, pavodle jakoha ad parka nie zastaniecca i traciny, — narakajuć abaroncy.

Pad kalektyŭnym zvarotam, jaki dasłali ŭ administracyju prezidenta, padpisałasia 412 žycharoŭ, jakija žyvuć na prylehłych da parka vulicach. Siarod ich jość vieterany vajny i alimpijskija čempijony.

Žychary rajona źviartajuć uvahu na toje, što park 40-hodździa Kastryčnika maje i histaryčnaje značeńnie.

— Tut 16 lipienia 1944 adbyŭsia znakamity parad partyzan, — kažuć abaroncy parka, demanstrujučy knihu «Pamiać». — Siońnia nam udałosia prypynić vysiečku drevaŭ, ale my razumiejem, što jana moža adnavicca ŭ luby momant, i siły ŭ nas moža nie chapić. My taksama ludzi, nam treba chadzić na pracu, vieści chatniuju haspadarku… I my suprać taho, kab na terytoryi našaha vydatnaha parka stajaŭ hatel.

• 0
• 0
• 0
• 0
• 0
• 0
• 0
• 0