U Rasii źnikajuć biełaruskija hastarbajtary

Hancaŭčanie masava adpraŭlajucca na zarobki za miažu, pry hetym nie zaŭsiody kłapociacca ab svajoj biaśpiecy. U vyniku niekatoryja ź ich hublajucca na prastory čužoj krainy. Niadaŭni vypadak tamu paćviardžeńnie:

žychara v. Chatyničy Aleha Navumika, jaki pajechaŭ na zarobki ŭ Maskoŭskuju vobłaść, ciapier šukaje jaho maci.

Taćciana Navumik źviarnułasia z zajavaj u Hancavicki RAUS u minułuju piatnicu, 6 studzienia, u 16.00. Jana raskazała, što syn Aleh, 1977 h.n., jaki pražyvaŭ razam ź joj, adpraviŭsia na zarobki ŭ Maskoŭskuju vobłaść jašče 13 krasavika 2011 hoda. Da 31 śniežnia 2011 hoda žančyna padtrymlivała suviaź, jakaja potym źnikła, i ciapier miescaznachodžańnie Aleha nieviadoma.

«U śniežni, 19-ha, ja patelefanavała, kab pavinšavać syna z dniom naradžeńnia. Paprasiła, kab pryjechaŭ damoŭ, — raskazała žurnalistu Taćciana Mikałajeŭna. — Jon adkazaŭ mnie, što pakul nie atrymaŭ raźlik».

31 śniežnia, pa telefonie žančyna pačuła ad Aleha, što jon hladzić televizar i čakaje zvanka — ź im pavinny raźličycca. Heta była apošniaja hutarka maci z synam. Ciapier joj prychodzicca «razmaŭlać» tolki z aŭtaadkazčykam ci čuć 2–3 doŭhija hudki, zatym — karotkija.

Taćciana Mikałajeŭna źviazvałasia z dahiestancam Sadu, ź jakim pracavaŭ jaje syn. Toj adkazaŭ, što ŭžo 26 śniežnia jon byŭ na Radzimie. Małdavanin Vałodzia, ź jakim Aleh pracavaŭ raniej, skazaŭ, što apošni raz bačyŭ kalehu 31 śniežnia.

Zaniepakojenaja maci ŭ adkaz na prapanovu aŭtaadkazčyka pakinuć paviedamleńnie, pakidała ich dvojčy. «Aleh, kali łaska, kali čuješ mianie, adhuknisia. Mahčyma, ty čaho pakryŭdziŭsia, dyk choć što-niebudź skažy!» — havorycca ŭ adnym ź ich. U druhim Taćciana Navumik prosić nieviadomych, u rukach jakich pa niejkaj pryčynie akazaŭsia synaŭ telefon, skazać joj pra heta.

Taćciana Mikałajeŭna vychavała traich synoŭ, dvoje ź ich žyvuć i pracujuć na Hancaŭščynie. A za treciaha, ź jakim ciapier zhubiłasia suviaź, balić duša. «Ja ŭžo nie viedaju, što mnie rabić i jak mnie być», — pieražyvaje jana.

Na žal, heta sumnaja žyćciovaja historyja — nie adzinkavaja ŭ Hancavickim rajonie. Mnohija hadami jeździać na zarobki ŭ inšyja krainy, najčaściej — u Rasiju. Ź ciaham času prytuplajecca pačućcio biaśpieki. Miž tym, zaŭvažaje supracoŭnik «haračaj linii» pa biaśpiečnamu vyjezdu i znachodžańniu za miažoj Natalla Zdolnik, trapić u składanuju situacyju značna praściej, čym my dumajem. «Kaniečnie, lepš zaścierahčysia ad niebiaśpieki da pajezdki, čym šukać paratunku, kali ŭžo trapiš u biadu ci vierniešsia damoŭ ni z čym, — zaŭvažyła Natalla Uładzimiraŭna. — 

Nam možna patelefanavać pa numary 8-801-201-5555, i my dapamožam pajezdku zrabić jak maha biaśpiečniejšaj. Zvanok ź luboha kutka Biełarusi, sa stacyjanarnaha abo mabilnaha telefona (Vełkom, MTS) biaspłatny».

Śpiecyjalist padkazała samyja ahulnyja praviły biaśpiečnaha vyjezdu za miažu — u metach turyzmu, znajomstva z zamiežnikam ci zarobkaŭ.

Varta viedać karysnyja numary telefonaŭ u krainie pryznačeńnia. Naprykład, u Rasii možna źviarnucca ŭ hramadskuju arhanizacyju — kaalicyju «Anioł», dzie dapamohuć. U inšych krainach taksama jość arhanizacyi, jakija mohuć akazać padtrymku biełarusam, adkryty haračyja infarmacyjnyja linii i kansultacyjnyja centry pa abaronie pravoŭ i intaresaŭ paciarpiełych. Pry nieabchodnaści praktyčnuju dapamohu akažuć u biełaruskim pasolstvie ci konsulstvie.

Abaviazkova treba zrabić dźvie ksierakopii pašparta: adnu pakinuć doma svajakam, druhuju — uziać z saboj i zachoŭvać asobna ad aryhinała. Kali pašpart ukraduć, adbiaruć ci zhubicca, kopija sasłužyć dobruju słužbu.

Pierad pajezdkaj

varta adkryć rouminh ci nabyć kartku dla sms-paviedamleńniaŭ. Sa svajakami damovicca, jakaja kodavaja fraza budzie abaznačać, što zdaryłasia niepryjemnaść.

Zastajecca spadziavacca, što Aleh Navumik znojdziecca.

Jak paviedamlaje «Chartyja'97», usiaho za śniežań minułaha i studzień hetaha hoda u vyšuk zajaŭlenyja piaciora žycharoŭ Bresta, jakija pajechali pracavać u Rasiju. Hieahrafija pajezdak vialikaja: Maskoŭskaja vobłaść, Kalininhrad, Sočy.

* * *

Karysnyja telefony:

8-801-201-5555 — «haračaja linija» pa biaśpiečnym vyjeździe i pierabyvańni za miažoj;

+37516-221-8888 — «haračaja linija» pa biaśpiečnym vyjeździe i pierabyvańni za miažoj, na jakuju možna zvanić ź inšych krain;

8-107-495-783-5865 — kaalicyja «Anioł» u Rasii;

8017-218-52-64 — «haračaja linija» pa pytańniach zamiežnaj pracoŭnaj mihracyi ŭpraŭleńnia zamiežnaj pracoŭnaj mihracyi, biežancaŭ i prytułku Departamienta pa hramadzianstvu i mihracyi MUS Ministerstva MUS Respubliki Biełaruś;

8017-218-52-61 — namieśnik načalnika Alaksandr Cichanavič Tatura, akazny za ździajśnieńnie administracyjnych pracedur u śfiery zamiežnaj pracoŭnaj mihracyi ŭpraŭleńnia zamiežnaj pracoŭnaj mihracyi, biežancaŭ i prytułku Departamienta pa hramadzianstvu i mihracyi MUS Respubliki Biełaruś.

Parady Prahramy «Ła Strada»

Pierad pajezdkaj varta ŭpeŭnicca, što firma isnuje

Ahulnaja lehalnaja pracedura afarmleńnia dakumientaŭ składajecca z afarmleńnia pracoŭnaha kantrakta, zvarotu ŭ pasolstva i adkryćcia rabočaj vizy.

Uvažliva čytajcie kožny punkt u kantrakcie! Inšy raz sustrakajecca dziŭnaja fraza «usie hrošy zachoŭvajucca na rachunku arhanizacyi-najmalnika i buduć vypłačany paśla zakančeńnia rabot» i prypiska, što kali vy parušyli praviły (jakija mienavita — nie ahavorvajecca), to na vas buduć nakładvacca štrafy. Padpisaŭšy taki kantrakt, vy ryzykujecie zastacca biez hrošaj.

Byvaje i tak, što kantrakt — idealny, adnak

klijenta vusna papiaredžvajuć, što pałavina punktaŭ tut «dla pryhažości».

Važna pravieryć lehalnaść pasrednickaj firmy.

Załoh biaśpieki mihranta — infarmiravanaść! Za miažu treba vyjazdžać, papiarednie sabraŭšy maksimalny pakiet infarmacyi i patrebnych kantaktaŭ u krainie naznačeńnia.

• 0
• 0
• 0
• 0
• 0
• 0
• 0
• 0