Letaś pa padtrymku dziaržpresy vydatkavali 54 młn. jeŭra.
Dakumient byŭ pryniaty pałataj pradstaŭnikoŭ 19 śniežnia, uchvaleny savietam respubliki 20-ha i ŭklučany ŭ Nacyjanalny rejestr pravavych aktaŭ 30 śniežnia 2011 hoda.
Ahulnaja suma, adviedzienaja ŭ biudžecie na srodki masavaj infarmacyi, składaje 491 678 422 tys. rub., albo kala 45 z pałovaj młn jeŭra (pa kursie na kaniec śniežnia — pačatak studzienia).
Bolšaja častka hetych hrošaj pryznačana na patreby telebačańnia i radyjoviaščańnia — 366 270 390 tys. rub., albo kala 34 młn jeŭra.
Na pieryjadyčny druk i vydaviectvy adviedziena 52 895 489 tys. rub. — kala 5 młn jeŭra.
I, narešcie, 72 512 543 tys. rub. (kala 7 młn. jeŭra) davodzicca na «inšyja pytańni ŭ halinie ŚMI».
«Letaś na ŚMI ŭ dziaržbiudžecie było vydatkavana kala 54 młn. jeŭra, — nahadvaje namieśnik staršyni Biełaruskaj asacyjacyi žurnalistaŭ Andrej Bastuniec. — Sioleta my bačym peŭnaje źnižeńnie biudžetnaha finansavańnia, što całkam tłumačalna va ŭmovach ekanamičnaha kryzisu. Ale na fonie trochrazovaha padzieńnia kursu biełaruskaha rubla hetaje źnižeńnie niaznačnaje…»
Nahadajem, što ŭ listapadzie 2011 h. ministr infarmacyi Aleh Pralaskoŭski acaniŭ dziaržaŭnuju padtrymku dziaržaŭnych ŚMI ŭ 2012 hodzie jak «istotnuju». «My zmahli adstajać u biudžecie mnohija pazicyi», — zaznačyŭ jon tady, nie ŭdakładniajučy abjomaŭ budučaha finansavańnia. Razam z tym ministr dadaŭ, što «pytańnie samaakupnaści drukavanych ŚMI z paradku dnia nie zdymajecca».
Što da «telebiudžetu», to, niahledziačy na istotnuju pieravahu nad vydatkami na drukavanyja ŚMI, jaho pamiery ŭsio roŭna nie całkam zadavalniajuć patreby biełaruskaj teleindustryi. Naprykład, staršynia Biełteleradyjokampanii Hienadź Davydźka dniami zaznačyŭ, što «navat samyja piesimistyčnyja finansavyja prahnozy akazalisia ŭ dva razy lepšymi za realnaść», i što da kanca 2013 hodu ŭvieś prybytak Biełteleradyjokampanii pojdzie na vypłatu adsotkaŭ pa kredytu, uziatamu na nabyćcio pierasoŭnaha televizijnaha kompleksu «Aleksandryna». «Ničoha, spravimsia, — paabiacaŭ kiraŭnik BT. — Na zarpłatu supracoŭnikam u nas jość hrošy. Nie chapaje srodkaŭ na techničnaje raźvićcio i pieraasnačeńnie, jakoje płanavali ažyćciavić za košt prybytku».
Ciapier čytajuć
Babaryka pra siabie ŭ 2020-m: Heta nie naiŭnaść. Nie dumaju, što takoha kryvažernaha scenara niechta čakaŭ25
Kamientary