Supracoŭnik Google: Prajekt S.O.P.A. kapijuje samaje drennaje, što ŭžo pracuje ŭ Kitai

Jeŭraradyjo zapytałasia ŭ supracoŭnika kampanii Google pra toje, jak S.O.P.A. paŭpłyvaje na sieciva i što takoha strašnaha jon utrymlivaje.

18 studzienia kiraŭnictva anhielskaj viersii sajta wikipedia.org adklučyła svoj partał na 24 hadziny. Zroblena heta było na znak pratestu, bo ŭ hety dzień prachodziła pasiedžańnie Kanhresa ZŠA, na jakim musili abmiarkoŭvać zakonaprajekt Stop Online Piracy Act. Jeŭraradyjo vyrašyła zapytacca ŭ supracoŭnika kampanii Google Ihara Machańka pra toje, jak S.O.P.A. ža moža paŭpłyvać na sieciva i što takoha jon utrymlivaje.

Ihar Machaniok: «Zakonaprajekty S.O.P.A. dy P.I.P.A., kali buduć pryniatyja, to buduć dziejničać tolki na terytoryi ZŠA. Ideja hetych zakonaŭ u tym, što dla kampanij, jakija ličać, što niejkija sajty parušajuć ich intelektualnyja pravy, stanie vielmi prosta zabaranić hetyja sajty dla amierykanskich karystalnikaŭ. Pry hetym mietady zakryćcia prapanujuć absalutna drakonaŭskija. Naprykład, prapanujuć abaviazać pošukavyja miechanizmy i sajty, što źmiaščajuć spasyłki (kštałtu Google ci Wikipedia), nie źmiaščać spasyłki na partały, jakija, pavodle peŭnych kampanij, parušajuć ich pravy. Taksama hety zakon budzie patrabavać ad internet-kampanij, kab jany praviarali kantent na lehitymnaść da taho, jak toj budzie raźmieščany ŭ internecie. Ale heta zrobić praktyčna niemahčymym pracu takich servisaŭ, jak YouTube ci Wikipedia. Vialikaja kolkaść kampanij, u tym liku i Google, vykazalisia suprać hetych zakonaprajektaŭ, bo jany ŭdarać pa internecie.

— Na vašuju dumku, zakon usio ž budzie pryniaty? Možna niejak heta sprahnazavać?

— Za apošnija dni niekatoryja deputaty, jakija raniej vykazvalisia za hety zakonaprajekt, ad jaho admovilisia. A niekatoryja prapanujuć pierahledzieć zakon u bolš miakki bok, kab jon utrymlivaŭ mienš radykalnych źmienaŭ. Prablema ŭ tym, što jon usio roŭna moža być pryniaty ŭ niejkaj formie. Łobi hetaha zakonaprajekta vielmi mocnaje, bo jaho padtrymlivajuć amal usie bujnyja kampanii, jakija zajmajucca hukazapisam, stvareńniem filmaŭ i h.d. Akramia taho, jość zakonaprajekt P.I.P.A., jaki razhladajecca ŭ Sienacie. Pra jaho ŭvohule ničoha pakul nie zrazumieła, bo ja nie čuŭ, kab za apošni čas jakija-niebudź sienatary admaŭlalisia ad hetaha zakonaprajektu. Ja b skazaŭ, što pakul usio ŭ pracesie.

— Ale kali jon usio ž budzie pryniaty, ci paŭpłyvaje heta na jeŭrapiejskaje zakanadaŭstva? Nu i na Biełaruś. Ci paŭpłyvaje jon na biełaruski internet?

— Hetyja zakony kapijujuć usio samaje drennaje, što ŭžo pracuje ŭ niekatorych krainach, takich jak Kitaj, Iran, Siryja, Uźbiekistan i h.d. Naprykład, Kitaj — vydatny prykład krainy, dzie vielmi dobra pracuje internet-cenzura. Tam vielmi prosta zakryć peŭnyja sajty dla dostupu kitajskich karystalnikaŭ. U Biełarusi pakul nie ŭsio tak drenna, ale my viedajem, što jość ukaz № 60, jaki ŭsich pastaviŭ u dziŭnaje stanovišča. Ja skažu, što kali S.O.P.A. dy P.I.P.A. buduć pryniatyja, to heta adčuje ŭvieś śviet, bo web-sajty, jakimi karystajecca ŭvieś śviet, — ci amierykanskija kampanii, ci kampanii, jakija pavinnyja padparadkoŭvacca zakonam ZŠA. Naprykład, praca YouTube, Wikipedia, Twitter, Facebook budzie vielmi mocna źmienienaja, kali prymuć hetyja zakony. Tamu našmat važniejšyja praktyčnyja nastupstvy hetaha zakona, čym, skažam, jurydyčnyja chvali pa ŭsim śviecie. Praktyčny vynik budzie zaŭvažny paŭsiul. Pra toje, ci dumaje Jeŭrasajuz pra niejki padobny zakon, ja b skazaŭ, što pakul ničoha ŭ hetym kirunku nie pradbačycca. Nasamreč navat byli pryniatyja takija rašeńni, što svaboda dostupu da internetu praz prablemy z kapirajtam nijak nie moža być abmiežavanaja.

• 0
• 0
• 0
• 0
• 0
• 0
• 0
• 0