Navalnyja hulni: bi-ponh i fłankiboł

«Siońnia zamiest «Žyhuloŭskaha» budzie «Abałoń», — radasna apaviaščaje natoŭp hulcoŭ i zaŭziataraŭ bir-ponhu Illa Budnik, arhanizatar turnira. Udzielniki reahujuć na navinu zadavolenym rovam.

Sam Illa padhledzieŭ hetuŭ hulniu padčas svaich pajezdak ŭ Amieryku. Pahulaŭ, spadabałasia, uciahnuŭsia: «Navučyŭsia tam hulać na viečarynach, pryvioz ideju siudy, zrabiŭ karekcyju hulni pad našych ludziej. Dva stały sami zładzili, chacia možna było i kupić za $ 250».

Hulnia, jak vyciakaje z nazvy, — fajny miks z nastolnaha tenisu i litrabołu. Karaciej, uva što jašče hulać na radzimie Samsonava i Karatkieviča? «Na namalavanyja trykutnički staviać płastykavyja stakančyki, u jakija nalivajecca 100–150 hram piva, — tłumačyć praviły Illa. — Tvaja zadača — trapić šarykam u stakančyki praciŭnika. Vam patrapili — vy vypili. Kali traplajuć abodva čałavieki ŭ šklanku, adzin šaryk viartajecca. Kali traplajecie ad stała — vypivajuć dva stakančyki. Kali źbiŭ svoj posud — ličy, što ŭ jaho patrapili. Kali źbiŭ šarykam šklanačku supiernika — ličy, što pramazaŭ».

Fanaty bir-ponha źbirajucca kožnyja dva tydni ŭ bary «Piŭnaja historyja». Kamanda składajecca z dvuch čałaviek, zvyčajna źbirajecca ad 10 da 16 par, hulni iduć da dvuch paražeńniaŭ, dalej — pa alimpijskaj sistemie. Płata za ŭdzieł — 100 tysiač z kamandy. Pieramožcam idzie treć sabranych hrošaj, astatniaje — bank dla zakupak «raschodnaha materyjału» i apłaty arendy. Srebrany pryzior udzielničaje ŭ nastupnym čempijanacie biaspłatna.

Uvieś čas mučaje rytaryčnaje pytańnie: meta hulni — navalić supiernika abo navalicca samomu? Illa tłumačyć: «Tut nie atrymajecca nie napicca. Kab nie napicca samomu, treba nievierahodna dobra hulać. Adnak tych, chto prajhrali, pa sutnaści niama. Tamu što taja kamanda, što paciarpieła parazu, dapivaje ŭvieś ałkahol na stale».

Usio hatovaje da pačatku. Illa nahadvaje ŭdzielnikam, što kateharyčna zabaronienaja łajanka — «kali rviecca z dušy, vybieh na vulicu, pakryčaŭ, potym viartajsia». Usie ŭdzielniki zhodnyja, turnir pačynajecca.

Za viečar, pa słovach arhanizatara, vyžłuktvajecca 40–50 litraŭ. Sam pivas, kab trochi zekanomić, zakupajuć u dyskaŭnterach. «Ciapier usie buchajuć, kudy ni pluń, — kaža Illa. — Tut ty heta robiš chacia b ź niejkaj cikavaściu. U Amierycy heta ŭvohule sport, z ułasnym čempijanatam i pryzavym fondam u 50 tysiač dalaraŭ».

Hradus viesiałości ŭvieś čas narastaje. Dziaŭčyny na vysokich abcasach ščyra abdymajucca ź nieznajomymi mužykami ŭ kambiniezonach. Sapraŭdy, ałkahol — heta sacyjalnaja zmazka. I hetak na praciahu 3–5 hadzinaŭ. Čempijonami hetaha turnira stała kamanda «Džyhurdziaź», adnak heta nie tak istotna. Hałoŭnaje — uvajści ŭ «historyju» moža kožny. Ci atrymajecca vyjści adtul na svaich dvaich — inšaje pytańnie.

Flunkyball

Hulnia nacyjanalnaja niamieckaja, albo «Ałkaharadki»

Patrebnyja: niekalki pustych butylek, adzin kidalny snarad, minimum adna butelka piva na čałavieka.

Cotnaja kolkaść hulcoŭ i adzin sudździa šukajuć roŭnuju placoŭku i dzielać jaje na dźvie častki. Pasiaredzinie — mišeń (adna ci niekalki butelek, dla ŭstojlivaści napoŭnienych vadoj). Dźvie kamandy zajmajuć svaje miescy nasuprać adna adnoj, na adlehłaści piaci mietraŭ ad centra. Kožny hulec atrymoŭvaje butelku piva, jakuju stavić pierad saboj. Pa žerabi vyłučajeca kamanda «A», jakaja pieršaja kidaje «snarad», namahajaś źbić jak maha bolš mišeniaŭ. Kamanda «B» kidajecca ich padymać. Pakul jany heta robiać, kamanda «A» pje svajo pivo. I naadvarot. Pieramahajuć tyja, chto pieršyja vypjuć. Za ŭsie praviny, jakich bolš čym zorak letniaj nočču, jość ałkaštrafy. «Usio roŭna sumna? Hrajcie hołymi», — rajuć metry fłankibołu.

Looping Louie

Adzin z prykładaŭ nieźličonaj kolkaści nastolnych hulniaŭ. Hastełu pryśviačajecca.

Patrebny: nabor hulni, čatyry čałavieki (albo čatyry ruki), ałkahol.

Samalocik, jaki pracuje ad batarejek, pa kole zachodzić u ataku na čatyry bazy hulcoŭ. Jaho meta — źbić vašyja fiški. Vaša meta — adšturchnuć aerapłan ad svajoj bazy, dla čaho treba cisnuć na maleńkuju piedalku. Kali ŭ vas chałodnaja hałava i ŭmiełyja ruki, možna sprabavać nakiroŭvać lotčyka na bazy inšych hulcoŭ. Mahčymy miortvyja pietli i bočki. U kaho raniej za ŭsich vybjuć fiški — prajhraŭ, jon pje. Pieramožca moža pić z salidarnaści da hora inšych. I potym usie razam za mir va ŭsim śviecie. Usio roŭna sumna? Hrajcie hołymi.

Vikinh

Prostaja, šumnaja, nieintelektualnaja, viasiołaja. Dla ŭsich stadyjaŭ apjanieńnia.

Patrebnyja: čatyry i bolš hulcoŭ, ałkahol.

Hulcy siadajuć u koła, i chtości pieršym pieratvarajecca ŭ «vikinha» — padymaje vialikija palcy da vušej, kab atrymaŭsia šałom z rahami. Pry hetym nieabchodna harłanić bajavy klič «u-u-u» i pahroźliva pakačvać «šałomam». Vikinh robić tak na praciahu niekalkich siekundaŭ, i raptoŭna pakazvaje na nastupnaha vikinha. Uvaha! Hulcy abapał pavinny «kiravać łodkaj»: toj, što sprava ad vikinha, viasłuje ŭ pravy bok, toj, što źleva — u levy bok (bo vikinh u łodcy!). Toj, chto prapuścić svaju čarhu być vikinham, ci zbłytaje nakirunak viesłavańnia — pje.

• 0
• 0
• 0
• 0
• 0
• 0
• 0
• 0