Nie praciahnuli kantrakt paśla vasiamnaccaci hadoŭ pracy

Viktar pracavaŭ na Homielskim vinarobnym zavodzie ekśpiedytaram i kładaŭščykom. U kastryčniku letaś jamu nie praciahnuli kantrakt. Pa słovach mužčyny, spačatku jaho vyklikaŭ da siabie dyrektar zavoda Siarhiej Kraŭčanka. I skazaŭ, što miesca ekśpiedytara patrabujecca dla rabotnika, jaki paciarpieŭ na vytvorčaści. Viktaru ž prapanavali pajści na miesca taho čałavieka — ślesaram.

Admaŭlacca nie vypadała, chacia novaje miesca i było panižeńniem. Viktar adpraviŭsia prachodzić miedycynskuju kamisiju. A tam vyśvietliłasia, što ŭ jaho hipiertanija. I pracavać ślesaram jon nie moža. Pakul doŭžyłasia abśledavańnie, paŭtornyja analizy — 31 kastryčnika mužčynu zvolnili.

Sp. Račkoŭ adznačaje, što jaho miesca addali byłomu ślesaru, jaki paciarpieŭ padčas vybuchu na zavodzie 24 žniŭnia.

Račkova ŭ vyniku ŭ prakuratury papiaredzili ab adkaznaści za raspaŭsiudžvańnie chłuślivaj infarmacyi. Apytali rabotnikaŭ, dyrektara. Nichto nie paćvierdziŭ vybuch. A śviedki Viktara — rabotniki zavoda, zvolnienyja paśla 24 žniŭnia, — nie zacikavili prakuraturu. Mužčyna adznačaje, što navat da zapisaŭ kamier źniešniaha nazirańnia nie źviarnulisia. A na ich, jon upeŭnieny, pavinna być zafiksavana, jak u voknach na trecim paviersie vylatała šyba, jak spałochanyja ludzi vybiahali na vulicu. Z AUS Čyhunačnaha rajona Homiela nakont kamier prysłali adkaz: «Vyniać dadzienuju infarmacyju [z kamier] nie bačycca mahčymym z-za adsutnaści śpiecyjalnaha abstalavańnia». Zvolnienaha rabotnika taki adkaz aburaje. «Jakoje im patrebna abstalavańnie? Fłeška, dysk?»

Paśla zvalnieńnia žychar Homiela pačaŭ pierapisku ź dziaržorhanami: abłvykankam, Kamitetam dziaržkantrolu, Departamientam inśpiekcyi pracy. Zrazumieła, farmalna zakon nie parušany.

Mužčyna sprabavaŭ pracaŭład-kavacca ŭ inšych miescach. Ale praz prablemy sa zdaroŭjem jon mocna abmiežavany ŭ vybary. U adnoj firmie znajšoŭ vakansiju kładaŭščyka. Prajšoŭ sumoŭje. Ale praz dva dni pierazvanili i skazali, što nie voźmuć.

Viktar razumieje, što viarnucca na vinarobny zavod užo nie zdoleje. Kali b i ŭziali nazad, pracavać spakojna nie dali b. Ale svaimi skarhami choča damahčysia nazaležnaha rasśledavańnia ŭsich parušeńniaŭ, u ich ukazanych. Bo pisaŭ jon i pra złoŭžyvańni kiraŭnika pradpryjemstva. Jon choča tolki, kab usio było pa zakonie. I kab jaho prykład staŭ padstavaj dla peŭnych źmianieńniaŭ u adnosinach pracadaŭcy-najmalnika.

***

Dyrektar zavoda: Zrabicie zapyty ŭ tyja struktury

Redakcyja patelefanavała dyrektaru Homielskaha vinarobnaha zavoda Siarhieju Kraŭčanku.

«Naša Niva»: Z čym źviazana, što Račkovu nie praciahnuli kantrakt?

Siarhiej Kraŭčanka: Apošniaja jaho praca — ekśpiedytar. Heta pieravozka ŭ asnoŭnym śpirtu. Da jaho byli zaŭvahi. U 2010 jon byŭ sumnieŭnym čałaviekam. Ja na adzin hod praciahnuŭ jamu kantrakt. A letaś vyrašyŭ nie praciahvać.

«NN»: Jakija byli zaŭvahi?

SK: Zachavanaść materyjalnych kaštoŭnaściej.

«NN»: Za im byli zaŭvažanyja rastraty?

SK: Tak. Nie hrašovyja. Materyjał — śpirt charčovy. Tam — 200 hramaŭ, tam — paŭlitra.

«NN»: Pravierki pravodzili ci zapisy ŭ pracoŭnuju knižku rabili?

SK: Nie… Kali być paśladoŭnym, ja jamu ŭsio-tki prapanavaŭ zastacca. Pracavać na rastarcy. Ale jon jak pajšoŭ z nakiravańniem na miedabśledavańnie, tak i nie viartaŭsia.

«NN»: Pa-vašamu, navošta jamu ŭsie hetyja skarhi pisać na Vas?

SK: Liču, heta jaho taki charaktar. Na ŭsie zaŭvahi, źviazanyja ź pieravozkaj materyjalnych kaštoŭnaściej, jon chvaravita reahavaŭ, zapalčyva.

«NN»: U svaich skarhach jon piša pra vybuch na zavodzie…

SK: Usie hetyja fakty praviaralisia. Možacie zrabić zapyty ŭ tyja struktury.

• 0
• 0
• 0
• 0
• 0
• 0
• 0
• 0