Не працягнулі кантракт пасля васямнаццаці гадоў працы

Віктар працаваў на Гомельскім вінаробным заводзе экспедытарам і кладаўшчыком. У кастрычніку летась яму не працягнулі кантракт. Па словах мужчыны, спачатку яго выклікаў да сябе дырэктар завода Сяргей Краўчанка. І сказаў, што месца экспедытара патрабуецца для работніка, які пацярпеў на вытворчасці. Віктару ж прапанавалі пайсці на месца таго чалавека — слесарам.

Адмаўляцца не выпадала, хаця новае месца і было паніжэннем. Віктар адправіўся праходзіць медыцынскую камісію. А там высветлілася, што ў яго гіпертанія. І працаваць слесарам ён не можа. Пакуль доўжылася абследаванне, паўторныя аналізы — 31 кастрычніка мужчыну звольнілі.

Сп. Рачкоў адзначае, што яго месца аддалі былому слесару, які пацярпеў падчас выбуху на заводзе 24 жніўня.

Рачкова ў выніку ў пракуратуры папярэдзілі аб адказнасці за распаўсюджванне хлуслівай інфармацыі. Апыталі работнікаў, дырэктара. Ніхто не пацвердзіў выбух. А сведкі Віктара — работнікі завода, звольненыя пасля 24 жніўня, — не зацікавілі пракуратуру. Мужчына адзначае, што нават да запісаў камер знешняга назірання не звярнуліся. А на іх, ён упэўнены, павінна быць зафіксавана, як у вокнах на трэцім паверсе вылятала шыба, як спалоханыя людзі выбягалі на вуліцу. З АУС Чыгуначнага раёна Гомеля наконт камер прыслалі адказ: «Выняць дадзеную інфармацыю [з камер] не бачыцца магчымым з-за адсутнасці спецыяльнага абсталявання». Звольненага работніка такі адказ абурае. «Якое ім патрэбна абсталяванне? Флэшка, дыск?»

Пасля звальнення жыхар Гомеля пачаў перапіску з дзяржорганамі: аблвыканкам, Камітэтам дзяржкантролю, Дэпартаментам інспекцыі працы. Зразумела, фармальна закон не парушаны.

Мужчына спрабаваў працаўлад-кавацца ў іншых месцах. Але праз праблемы са здароўем ён моцна абмежаваны ў выбары. У адной фірме знайшоў вакансію кладаўшчыка. Прайшоў сумоўе. Але праз два дні перазванілі і сказалі, што не возьмуць.

Віктар разумее, што вярнуцца на вінаробны завод ужо не здолее. Калі б і ўзялі назад, працаваць спакойна не далі б. Але сваімі скаргамі хоча дамагчыся назалежнага расследавання ўсіх парушэнняў, у іх указаных. Бо пісаў ён і пра злоўжыванні кіраўніка прадпрыемства. Ён хоча толькі, каб усё было па законе. І каб яго прыклад стаў падставай для пэўных змяненняў у адносінах працадаўцы-наймальніка.

***

Дырэктар завода: Зрабіце запыты ў тыя структуры

Рэдакцыя патэлефанавала дырэктару Гомельскага вінаробнага завода Сяргею Краўчанку.

«Наша Ніва»: З чым звязана, што Рачкову не працягнулі кантракт?

Сяргей Краўчанка: Апошняя яго праца — экспедытар. Гэта перавозка ў асноўным спірту. Да яго былі заўвагі. У 2010 ён быў сумнеўным чалавекам. Я на адзін год працягнуў яму кантракт. А летась вырашыў не працягваць.

«НН»: Якія былі заўвагі?

СК: Захаванасць матэрыяльных каштоўнасцей.

«НН»: За ім былі заўважаныя растраты?

СК: Так. Не грашовыя. Матэрыял — спірт харчовы. Там — 200 грамаў, там — паўлітра.

«НН»: Праверкі праводзілі ці запісы ў працоўную кніжку рабілі?

СК: Не… Калі быць паслядоўным, я яму ўсё-ткі прапанаваў застацца. Працаваць на растарцы. Але ён як пайшоў з накіраваннем на медабследаванне, так і не вяртаўся.

«НН»: Па-вашаму, навошта яму ўсе гэтыя скаргі пісаць на Вас?

СК: Лічу, гэта яго такі характар. На ўсе заўвагі, звязаныя з перавозкай матэрыяльных каштоўнасцей, ён хваравіта рэагаваў, запальчыва.

«НН»: У сваіх скаргах ён піша пра выбух на заводзе…

СК: Усе гэтыя факты правяраліся. Можаце зрабіць запыты ў тыя структуры.

• 0
• 0
• 0
• 0
• 0
• 0
• 0
• 0