Administracyja prezidenta adkazała na zvarot maci asudžanaha da śmierci Kavalova

U Administracyi prezidenta ličać metazhodnym praviadzieńnie pravavoha analizu zakanadaŭstva pavodle zvarota maci asudžanaha da śmiarotnaha pakarańnia Uładzisłava Kavalova.

Jak raniej paviedamlaŭ BiełaPAN, 1 lutaha Luboŭ Kavalova źviarnułasia ŭ Kanstytucyjny sud (KS) Biełarusi z prośbaj razhledzieć na adpaviednaść Kanstytucyi Kryminalna-vykanaŭčy kodeks, jaki nie praduhledžvaje prypynieńnie śmiarotnaha pakarańnia ŭ suviazi sa zvarotam asudžanaha ŭ mižnarodnyja instancyi ŭ metach abarony svaich pravoŭ.

U suviazi z hetym Kavalova aścierahajecca, što prysud u dačynieńni da jaje syna, abvinavačanaha pa spravie ab terakcie ŭ minskim mietro, moža być pryviedzieny ŭ vykanańnie da kančatkovaha razhladu ŭ Kamitecie AAN pa pravach čałavieka, kudy źviarnulisia jana i jaje dačka.

U KS žančynie adkazali, što prava na zvarot u Kanstytucyjny sud majuć tolki admysłova ŭpaŭnavažanyja Kanstytucyjaj orhany.

6 lutaha Kavalova razasłała listy ŭ arhanizacyi, jakija zakonnaje prava źviartacca ŭ KS, — Saviet ministraŭ, abiedźvie pałaty Nacyjanalnaha schodu, Viarchoŭny sud i kiraŭniku dziaržavy. Jana prasiła ich nakiravać u KS zaklučeńnie ab nieadpaviednaści nazvanaha kodeksa Kanstytucyi krainy i fakultatyŭnaha pratakołu da Mižnarodnaha paktu ab hramadzianskich i palityčnych pravach.

Adkaz pastupiŭ pakul tolki z adździeła pa pytańniach hramadzianstva i pamiłavańnia Administracyi prezidenta — 18 lutaha. U im skazana, što pa prapanovie Kavalovaj «metazhodny kompleksny pravavy analiz zakanadaŭstva z udziełam kampietentnych dziaržaŭnych orhanaŭ», paviedamiŭ BiełaPAN pravaabaronca Raman Kiślak, jaki kansultuje Kavalovu pa pravavych pytańniach.

Nahadajem, śmiarotny prysud Uładzisłavu Kavalovu byŭ vyniesieny 30 listapada 2011 h. Viarchoŭnym sudom. 7 śniežnia asudžany padaŭ prašeńnie ab pamiłavańni na imia Alaksandra Łukašenki.

Maci i siastra Kavalova nakiravali ŭ Kamitet AAN pa pravach čałavieka skarhu ab parušeńni prava na žyćcio. U joj ukazvałasia na parušeńnie pryncypaŭ spraviadlivaha sudovaha razboru. Skarha była aficyjna zarehistravanaja ŭ Kamitecie AAN pa pravach čałavieka 15 śniežnia. Kamitet AAN, u svaju čarhu, źviarnuŭsia da ŭładaŭ Biełarusi z prośbaj nie pryvodzić u vykanańnie śmiarotny prysud Kavalovu, pakul skarha nie budzie razhledžanaja pa sutnaści.

16 lutaha Jeŭraparłamient pryniaŭ rezalucyju, u jakoj zaklikaŭ Alaksandra Łukašenku pamiłavać Uładzisłava Kavalova i druhoha fihuranta kryminalnaj spravy Dźmitryja Kanavałava, jaki, pavodle aficyjnaj infarmacyi, z prašeńniem ab pamiłavańni da prezidenta nie źviartaŭsia. Jeŭradeputaty taksama zaklikali ŭłady Biełarusi abjavić maratoryj na śmiarotnaje pakarańnie.

17 lutaha MZS Biełarusi vykazaŭ abureńnie pazicyjaj Jeŭraparłamienta. «Rezalucyja Jeŭraparłamienta ab prymianieńni śmiarotnaha pakarańnia ŭ Biełarusi vyklikaje paprostu abureńnie: Jeŭraparłamient de-fakta stanovicca na bok terarystaŭ, niekampietentna padviarhajučy sumnievu vysnovy, śledstva i rašeńni biełaruskaha suda pa spravie ab teraktach. Jeŭraparłamient taksama, što nie robić jamu honaru, hruba ŭmiešvajecca ŭ ažyćciaŭleńnie pravasudździa ŭ suvierennaj dziaržavie», — zajaviŭ MZS.

Biełaruś zastajecca adzinaj u Jeŭropie krainaj, dzie ŭsio jašče ŭžyvajecca śmiarotnaje pakarańnie.

• 0
• 0
• 0
• 0
• 0
• 0