Jeŭraparłamient zaklikaŭ pamiłavać Kanavałava i Kavalova
16 lutaha była pryniataja admysłovaja rezalucyja.
Siońnia Eŭraparlament pryniaŭ rezalucyju, jakaja asudžaje praktyku śmiarotnaha pakarańnia ŭ Biełarusi i zaklikaje ŭłady ŭvieści maratoryj na vykanańnie hetaha pakarańnia.
Eŭrapiejskija deputaty zaklikali biełaruski režym pamiłavać Dźmitryja Kanavałava i Ŭładzisłava Kavalova, asudžanych na śmierć za terakt u mienskim metro, dy pravieści «poŭnaje, spraviadlivaje i biesstarońniaje raśśledavańnie» vybuchu ŭ metro. Jany taksama zaklikali aficyjny Miensk vyzvalić usich palitviaźniaŭ, uklučna ź Mikałajem Statkievičam, Andrejem Sańnikavym i Alesiem Bialackim.
«Eŭraźviaz pavinien praciahvać ekanamičnyja i vizavyja sankcyi dy zamarožvańnie aktyvaŭ Łukašenki i jahonych pamahatych, a taksama padtrymlivać patrabavańnie Eŭraparlamentu i Senatu ZŠA pieranieści čempijanat śvietu pa chakiei ŭ 2014 hodzie. Hetyja dziejańni pavinny dapamahčy ŭ vyzvaleńni ŭsich palityčnych viaźniaŭ i palepšyć stan demakratyi ŭ Biełarusi» ― skazaŭ našamu radyjo eŭradeputat Petar Šciastny, u minułym viadomy słavacki chakieist.
Pavodle parlamentara Justasa Paleckisa, hetaj rezalucyjaj Eŭraparlament znoŭ daje šaniec aficyjnamu Miensku: «Kali nabližajucca parlamenckija vybary, heta šaniec usio ž pierajści da dyjalohu i rabić kroki nasustrač».
Staršynia stałaj kamisii Pałaty pradstaŭnikoŭ pa zakanadaŭstvie i sudova-pravavych pytańniach Mikałaj Samasiejka, siabra kamisii pa pamiłavańni pry prezydencie, zajaviŭ karespandentu «Svabody», što vystupaje za admienu śmiarotnaj kary ŭ Biełarusi.
«Kali b nie pazycyja Eŭropy, mahčyma, my b užo mieli maratoryj. Prajaŭleńnie Eŭropaj čarhovym razam padvojnych standartaŭ, ja maju na ŭvazie reakcyju na vybary prezydenta i padziei, jakija byli paśla, zatarmaziła vielmi mnohija prahramy. U tym liku — jakija tyčacca admieny śmiarotnaha pakarańnia. Biełaruski narod u pryncypie nie prymaje niejkaha cisku. Tut uźnikaje pačućcio dežaviu. U tym planie, što rabočaja hrupa pa prablematycy śmiarotnaha pakarańnia pavinna była być stvorana jašče letam 2009 hodu. Ale była pryniataja rezalucyja Parlamenckaj asamblei Rady Eŭropy. U joj vystaŭlena ŭmova, što status speczaprošanaha budzie viernuty tolki paśla ŭviadzieńnia maratoryju ci admieny śmiarotnaj kary. Paśla hetaha praces stvareńnia hetaj hrupy zatarmaziŭsia. Toje ž samaje i ciapier».
Samasiejka ličyć, što terakt u mienskim metro pavialičyŭ kolkaść prychilnikaŭ śmiarotnaj kary i vyrašać hetaje pytańnie ciapier «było b bluźnierstvam». Uličvajučy, što byŭ referendum, «było b nielahična, spytaŭšy adzin raz u narodu, nie spytać druhi».
«Nu, a Eŭropa niachaj narakaje na siabie. Kab nia ŭsie hetyja ŭltymatumy i patrabavańni, maratoryj užo byŭ by ŭviedzieny».
Pavodle staršyni AHP Anatola Labiedźki, movu ŭltymatumaŭ u źniešniaj palitycy, maŭlaŭ, «budziem stajać da apošniaha», pieršym abraŭ aficyjny Miensk. I rezalucyja Eŭraparlamentu — heta reahavańnie srodkami aficyjnaha Miensku. Taksama jana pakazvaje, što biełaruskaje pytańnie znachodzicca ŭ hałoŭnym paradku dnia.
«Kali kazać, šklanka poŭnaja ci pustaja, to treba kazać, što jana ŭsio ž taki bolš schilnaja da napaŭnieńnia jaje sankcyjami, čym da źmiakčeńnia sytuacyi. Heta taki trend. Zanadta mnoha ŭžo zajaŭlena, skazana. I luboje adstupleńnie ad hetaj pazycyi dla Eŭraźviazu, dla inšych mižnarodnych arhanizacyj budzie sa znakam minus. Padajecca, što sfarmulavany minimalny pakiet. I
voś pa hetych punktach — vyzvaleńnie i reabilitacyja palityčnych viaźniaŭ, svabodnyja vybary i admiena ci maratoryj śmiarotnaha pakarańnia — treba demanstravać niejkija kroki, vyniki. Tolki tady možna havaryć pra razmarozku stasunkaŭ pamiž Bruselem i aficyjnym Mienskam».
Pravaabaronca Ludmiła Hraznova ŭchvalaje rezalucyju Eŭraparlamentu. Jana ličyć, što ŭ biełaruskim hramadztvie raście kolkaść prychilnikaŭ admieny śmiarotnaj kary. U tym liku adnosna Kanavałava i Kavalova. Ludzi dahetul padpisvajucca pad petycyjami.
«Heta śviedčyć pra toje, što heta vielmi balučaje pytańnie dla ŭsich nas. Takoha nikoli nie było ŭ Biełarusi, kab byli takija vybuchi i kab rabiłasia demanstratyŭnaje, nachabnaje raśśledavańnie. Nam nibyta kazali, što vy tut nichto i ništo. Navat abyjakavyja ludzi nia vierać u hety vyrak i padpisvajuć petycyi. Usie bačać, što hetaja sprava była šyta biełymi nitkami. Toje, što Eŭraparlament stavić hetaje pytańnie klučavym, aznačaje, što jon vyratuje nia tolki žyćcio hetych chłopcaŭ, ale i ŭsich nas ad takich voś niedarečnych spraŭ. Biełaruskamu kiraŭnictvu jość šaniec prajavić miłaść, pamiłavać hetych chłopcaŭ. Dla ŭsich heta było b vielmi dobra. Taksama dziela pačatku pracesu dyjalohu pamiž Biełaruśsiu i Eŭropaj».
Maci Ŭładzisłava Kavalova Luboŭ vykazała spadziavańnie, što takaja reakcyja z eŭrapiejskaha boku zachavaje žyćcio jaje synu. A taksama prymusić uładu naahuł pajści na admienu śmiarotnaha pakarańnia.Kavalova zajaviła, što raniej źviarnułasia pa padtrymku i dapamohu ŭ mižnarodnyja struktury.
«Uład pisaŭ u prašeńni ab pamiłavańni — nia tolki pamiłavać, ale i źniać kryminalnuju adkaznaść. Bo Ŭład zusim vypadkovy čałaviek u hetaj spravie. Treba abaviazkova ŭvieści maratoryj z nastupnaj admienaj śmiarotnaj kary. Atrymlivajecca, dziaržava ad našaha imia robić zabojstva. Heta strašna. I treba pravieści pravilnaje, spraviadlivaje raśśledavańnie i znajści sapraŭdnych vinavatych u hetym vybuchu. Było b spraviadliva nakiravać spravu na novaje raśśledavańnie. Heta nia prosta termin, a vyšejšaja miera. Značyć, bajacca, kab chłopčyki zastalisia adzinymi śviedkami fabrykacyi kryminalnaj spravy. Mnohija padtrymlivajuć mianie. Ludzi stali na bok dziaciej. Va ŭsiakim razie, bolšaść».
Stała viadoma, čamu pieramožca biełaruskaha adboru «Mis Suśviet» nie jedzie na konkurs. Jana znajšłasia ŭ SIZA14
Kamientary