Pamierła Aryna Viačorka

Jana pajšła z žyćcia ŭ Vilni 9 krasavika.

Aryna Viačorka (Iryna Paładzieŭna Połzik).

14 krasavika 1961, Miensk — 9 krasavika 2012, Vilnia.

Biełaruski piedahoh, hramadskaja i kulturnaja dziajačka, inicyjatarka adradžeńnia rycarskaha ruchu i histaryčnaj muzyki Biełarusi.

Pa adukacyi matematyk. Skončyła aśpiranturu pry BDU pa śpiecyjalnaści «historyja piedahohiki»; Vyšejšuju škołu hramadskich prafiesij pa śpiecyjalnaści «menedžarka kultury» (Poznań).

Pracavała ŭ biełaruskich škołach Mienska, u Łabaratoryi fiłasofii i historyi adukacyi Nacyjanalnaha instytuta adukacyi. Aŭtarka artykułaŭ pa historyi biełaruskaj piedahohiki, historyi matematyki i techniki Biełarusi dla «Encykłapiedyi historyi Biełarusi», «Historyi biełaruskaj navuki i techniki». Układalnica dvuchtomnaj biblijahrafii historyi biełaruskaj piedahohiki.

Suzasnavalnica pieršaha biełaruskaha niefarmalnaha zhurtavańnia novaha času «Biełaruskaja śpieŭna-dramatyčnaja majstroŭnia» (1980–1985). Udzielnica ruchu za adradžeńnie biełaruskaj škoły z 1983 hoda. Suzasnavalnica moładzievaha adradženckaha zhurtavańnia «Tałaka» (1986–1988).

Adna z arhanizatarak dziciačaha letnika «Hrunvald» (1992).

Z 1993 zasnavalnica rycarskaha ruchu Biełarusi. Stvaralnica i kiraŭnica Biełaruskaha rycarskaha kłuba, paźniej kłuba «Vialikaje kniastva» (1996–2007).

Arhanizatar pieršaha rycarskaha turniru ŭ Łošyckim parku, moładzievaha etna-histaryčnaha śviata «Łošycki fest»; vyjezdaŭ na rycarski turnir u Hołub-Dobžyń (1995); na insceniroŭku Hrunvaldskaj bitvy (1996), u Čechiju (Młazavice, 1997), pieršaj pajezdki delehacyi biełaruskich rycarskich kłubaŭ na Hrunvaldskuju bitvu (Olštyn, 1998), śviatkavańnia ŭhodkaŭ Hrunvaldskaj bitvy u Minsku z 1996 pa 1999 hh. Stvaralnica pieršaha prajekta histaryčnaj muzyki «Lehiendy Bialikaha Kniastva» (2000–2001), alboma histaryčnaj muzyki «Staražytnaja ziamla» (2005), sieryi «Biełaruskaja muzyčnaja kalekcyja»: «Postfolk», «Muzyka Vialikaha Kniastva Litoŭskaha», «Biełaruski muzyčny avanhard», «Śpievy Biełarusi», «Miedyjeval», «Viaskovaja liryka» (2007–2009) i šerah inšych.

Arhanizatarka bolš jak sta kancertaŭ staradaŭniaj i falkłornaj muzyki «Lehiendy Vialikaha Kniastva», «Staradaŭniaja muzyka Biełarusi i Jeŭropy» dy inšych. Pradjusarka hurtu «Stary Olsa», muzyčnaha prajekta «Vir». Kansultantka muzyčnaha prajekta «Histaryčny epas», filma «Staradaŭnija muzyčnyja instrumienty Biełarusi».

Adna z arhanizataraŭ nacyjanalnych konkursaŭ maładych vykanaŭcaŭ staradaŭniaj muzyki «U honar karalevy Bony» (Miensk, Navahradak, 2005–2006).

Adna z zasnavalnikaŭ Biełaruskaha kłuba lutnistaŭ (2008).

Namieśnica dyrektara AAT «Novaja muzyčnaja kampanija» (2007–2009), namieśnica dyrektara vydaviectva «Kaŭčeh» (z 2009). Kaardynatarka mižnarodnych prajektaŭ Doma sustrečaŭ «Mikuševa» (Polšča, z 2011). Adna z kiraŭnikoŭ etnahistaryčnaha centru «Javar», supracoŭničała ź Biełdziaržfiłarmonijaj, «Moładzievym teatram estrady». Aŭtar prajektu «Noč muzyki» ŭ Biełdziaržfiłarmonii (2010).

Dzieci — Radasłava, juryst; Franak — žurnalist, hramadski aktyvist; Ružana — školnica. Unuk Daniła.

• 0
• 0
• 0
• 0
• 0
• 0
• 0
• 0