Pytańnie biełaruskich palitviaźniaŭ dla Jeŭropy zastajecca aktualnym
Minsk naviedali pradstaŭniki słužby źniešniepalityčnaj dziejnaści ES
Minsk naviedali pradstaŭniki słužby źniešniepalityčnaj dziejnaści Jeŭrasajuza Džon Kjajer i Styvien Tresinh.
12 červienia jany sustrelisia z pradstaŭnikami biełaruskaj apazicyi. Jak raskazaŭ BiełaPAN adzin z udzielnikaŭ sustrečy, lidar Abjadnanaj hramadzianskaj partyi Anatol Labiedźka, supracoŭnikaŭ Jeŭrapiejskaj słužby źniešnich dziejańniaŭ cikavili, u asnoŭnym, dva pytańni: pierśpiektyvy raźvićcia jeŭrapiejskaha dyjałohu pa madernizacyi Biełarusi i manitorynh situacyi pierad vosieńskimi parłamienckimi vybarami.
«Na padstavie sustreč u Minsku jany pradstaviać dakład ab situacyi ŭ Biełarusi, jaki budzie pakładzieny ŭ asnovu rašeńniaŭ Savieta ministraŭ krain ES adnosna našaj krainy», — paviedamiŭ Labiedźka.
Pavodle słoŭ palityka, padčas sustrečy pradstaŭniki ES padkreślivali: Jeŭrasajuz vitaje vyzvaleńnie palitźniavolenych Źmitra Bandarenki i Andreja Sańnikava, ale heta nie aznačaje, što pytańnie palitźniavolenych źniataje z paradku dnia.
«Pakul u Biełarusi nie zastaniecca nivodnaha palitviaźnia, da tych por jano budzie pryjarytetnym dla Jeŭropy», — raskazaŭ Labiedźka.
Što da manitorynhu situacyi napiaredadni parłamienckich vybaraŭ, to, jak adznačałasia na sustrečy, vybarčaja kampanija pavinna prajści pa jeŭrapiejskich standartach. «Jeŭropa ŭvažliva adsočvaje situacyju napiaredadni vybarčaj kampanii i padčas jaje. Jość standarty ABSIE i, kali jany buduć poŭnaściu vykonvacca, Jeŭropa budzie ich vitać», — skazaŭ lidar AHP.
Vykładajučy pradstaŭnikam ES svaju pazicyju, Anatol Labiedźka vykazaŭ mierkavańnie, što «ŭ ciapierašniaj situacyi ŭłada nie moža sumlenna vyjhrać vybary». «Tamu ciapier važnaja kampanija „Za sumlennyja vybary biez Łukašenki“, pry hetym vyzvaleńnie palitźniavolenych — tolki adna ź pieradumoŭ dla praviadzieńnia sumlennych vybaraŭ», — zajaviŭ palityk.
Padčas sustrečy taksama abmiarkoŭvalisia pytańni spraščeńnia vizavaha režymu dla hramadzian Biełarusi. Pradstaŭniki apazicyi vykazvalisia za adnabakovaje spraščeńnie Jeŭrasajuzam paradku atrymańnia i źnižeńnia koštu viz, niezaležna ad pahadnieńniaŭ ab readmisii.
«Adnak nam zajavili, što ŭsie prapanovy pa hetym pytańni ŭžo nakiravanyja biełaruskamu boku, miač ciapier na poli aficyjnaha Minska, i ad biełaruskaj ułady ciapier zaležyć, jak jana adreahuje na prapanovy ES», — raskazaŭ Labiedźka.
Na ŭčarašniaj sustrečy, akramia lidara AHP, prysutničali sustaršynia arhkamiteta pa stvareńni partyi «Biełaruskaja chryścijanskaja demakratyja»,
Ci sustrakalisia supracoŭniki Jeŭrapiejskaj słužby źniešnich dziejańniaŭ z pradstaŭnikami biełaruskich uładaŭ, nieviadoma. U pradstaŭnictvie ES u Minsku kamientaraŭ adnosna vizitu pakul nie dajuć. Viadoma tolki, što vizit užo zavieršany.
Siarhiej Pulša, BiełaPAN.
Kamientary