Historyja: źjechać u Maskvu na $6000, tracić $3000 na žyćcio, ale stryhčysia ŭ Minsku

Ci apraŭdalisia ich čakańni i ci jość sens pakidać radzimu ŭ pošukach lepšaha ščaścia? Nie sakret, što bolšaść biełarusaŭ vybirajuć maskoŭski kirunak u pošukach śvietłaj doli. Budaŭniki, menedžary, prahramisty, inžyniery — Maskva, jak čornaja dzirka, pahłynaje ŭsich, abmieńvajučy vialikija mahčymaści na niahody miehapolisa, ale i vysokija zarpłaty. Siońnia apovied ad Kanstancina ź miesiačnym zarobkam da $6000. Jon pracuje kansałtynhavym śpiecyjalistam u naftahazavaj śfiery.

«Ja z tych biełarusaŭ, što vyrašyli papracavać pa-za siniavokaj, a mienavita ŭ Maskvie. Pajechaŭ ja tudy nie ŭślapuju — była kankretnaja prapanova ab pracy, jakuju ja pryniaŭ. I voś užo paŭtara hoda jak pakinuŭ rodny kraj. Praz paru miesiacaŭ paśla majho adbyćcia da mianie dałučyłasia žonka. Pieršy hod svajho žyćcia tut jana nie pracavała. Nie toje kab nie mahła znajści pracu — z hetym tut prablem niama, — prosta zachacieła pasprabavać siabie ŭ roli chatniaj haspadyni, nu, a ja nie staŭ piarečyć. Voś pra hety pieryjad i pojdzie moj apovied. Spadziajusia, jon spatrebicca tym, chto tolki płanuje takija pieramieny ŭ svaim žyćci.

Trata № 1 — kvatera. My zdymajem adnapakajoŭku za 5 chvilin chady ad mietro. Nie centr, viadoma, ale i nie samaja ŭskraina. Dom dastatkova novy, kvatera niemaleńkaja, kanśjerž unizie, videanazirańnie. Kaštuje hetaja radaść $1000 u miesiac plus $10–15 za śviatło i vadu. Adrazu parada: lepš trochi pierapłacić za kvateru, ale źniać jaje bližej da miesca pracy. Maskva nie Minsk, i tut pry niaŭdałym raźmiaščeńni žylla možna paprostu marnavać pa niekalki hadzin u dzień na darohu da pracy i stolki ž — nazad. Jano vam treba?

Trata № 2 — telekamunikacyi. Internet — $17 za 20-miehabitny anlim. Sotavaja suviaź z rehularnymi zvankami rodnym i siabram u Minsk vychodzić kala $30 u miesiac na mianie i na žonku. Razam — prykładna $50.

Trata № 3 — ježa. Prykładna raz na tydzień-paŭtara my zakuplajemsia ŭ „Ašanie“ miasam, rybaj i morapraduktami, krupami, makaronami, usiakimi smačnaściami i čym-niebudź u svoj bar. Na heta sychodzić dalaraŭ 60–120. Ale tut treba mieć na ŭvazie, što kuplajem my ŭsio, na što voka ŭpadzie, u tym liku i niatannyja dalikatesy. Časam u hetuju sumu ŭklučajucca i haspadarčyja tavary: pralny parašok, myjnyja srodki i h.d. Akramia hetaha my rehularna kuplajem u kramach kala doma tavary štodzionnaj patreby: vadu (vada z-pad krana nieprydatnaja dla pićcia), małako, kiefir, harodninu, znoŭ ža, smačnaści roznyja. Na heta sychodzić jašče kala $200 u miesiac. Razam na pachody pa ježu ŭ miesiac tracicca kala $500.

Trata № 4 — adzieńnie. Na vopratku my tracim dalaraŭ 150–200 u miesiac. Nie toje kab tak usio było treba, ale kali zachodziš u kramu, a tam źnižki pa 30–50% na dobryja rečy, ciažka ŭtrymacca i nie paddacca šopinhavaj lichamancy.

Trata № 5 — zabavy. Samaja pryjemnaja častka vydatkaŭ. Vielmi vialikuju rolu tut hraje dastupnaść infrastruktury. Pobač z domam šmat restaranaŭ, baraŭ, za piać chvilinaŭ chady — piacizalny 3D-kinateatr. Takim čynam, na restarany my tracim kala $250 u miesiac — paru razoŭ schadzić, paru razoŭ zamović ježu dadomu. Bary: schadzić ź siabrami ŭ piatnicu papić piva — asnova śvietapohladu ofisnaha płanktonu! Na heta tracicca dalaraŭ 200. Kancerty: raz na miesiac stabilna kudyści vybirajemsia. Cikavyja hurty vystupajuć u stalicy rehularna. Uvachodnyja kvitki plus papić piva, kaktejlaŭ na kancercie — kala $200. Kino: adno naviedvańnie na dvaich — $20. U miesiac razy dva vybirajemsia, razam $40. Muziei: kala $30 na dvaich u siarednim — raz u miesiac. U sumie na zabavy tracicca $720 u miesiac. Oho! Sam ździŭleny.

Trata № 6 — katy (u nas ich dva). Korm, vitaminy, cacki, napaŭnialnik — u siarednim dalaraŭ 20 u miesiac.

Trata № 7 — pajezdki dadomu. Raz na miesiac vybirajemsia da rodnych i siabroŭ na histaryčnuju radzimu ŭ Minsk. Zvyčajna jeździm płackartam (nie nastolki ŭ kupe lepš, nakolki daražej). Na kvitki sychodzić na dvaich kala $200. Nu i kinuć sabie hrošaj na biełaruskija telefony, schadzić ź siabrami kudy-niebudź, pakinuć hrošaj baćkam — jašče niedzie stolki ž. Akramia taho, stryhčysia my taksama starajemsia ŭ Minsku — nadta ž ceny ŭ Maskvie kusajucca. Jašče dalaraŭ 50 (z ulikam farby dla žonki). Razam pajezdka ŭ Minsk — $450.

Trata № 8 — transpart. Prajazny na mietro na 60 pajezdak kaštuje $40. Na miesiac jaho prykładna i chapaje. Maršrutka kaštuje prykładna $0,8. Takim čynam, kali na pracu treba jašče ad mietro padjazdžać na maršrutcy, u miesiac na jaje tracicca $0,8×40 = $32. Razam na transpart sychodzić prykładna $70.

Trata № 9 — kaśmietyka dla žonki. Tut ja, kali ščyra, hublajusia. Žonka ŭ mianie kaśmietykaj nie złoŭžyvaje, ale na tym, čym karystajecca, nie ekanomić. Štomiesiačny vydatak tut acanić ciažkavata, ale ŭ cełym, ja dumaju, dalaraŭ 70 na miesiac prypadaje.

Usie astatnija hrošy nazapašvajucca na depazicie. Na adpačynak asobna nie adkładajem — adnoj miesiačnaj zarpłaty ŭ pryncypie chopić, kab źjeździć kudy zachočacca.

Razam na całkam sabie sytaje i nasyčanaje žyćcio ŭ Maskvie tracicca kala $3100.

Vidavočna, što kali zadacca metaj ekanomić, to hetuju sumu možna značna pamienšyć. Adnak pry hetym nielha zabyvać, što Maskva (u adroźnieńnie ad Minska) prapanuje šyrokija mahčymaści vydatkavać svaje hrošy, i ŭlivańnie ŭ śviet niastrymnaha spažyvańnia materyjalnych dabrot adbyvajecca lohka i niezaŭvažna. A da dobraha chutka pryvykaješ».

• 0
• 0
• 0
• 0
• 0
• 0
• 0
• 0