Stolinščyna — hurkovaje carstva Biełarusi, a Łuninieččyna — kłubničnaje. Repartaž.
Ciopły klimat, uradlivaja ziamla i pracavitaść miascovych žycharoŭ dazvalajuć nie tolki svaje patreby zadavolić u praduktach ziemlarobstva, ale i na ekspart adpravić sotni hružanych sałodkim tavaram mašyn.
U vioscy Dvarec Łuninieckaha rajona rynak kłubnic (truskavak) raźmiaściŭsia naŭprost na trasie. Paabapał darohi staić bieźlič mašyn — tut i fury, i mikraaŭtobusy, i lehkaviki. Miascovyja žychary niasuć pierakupščykam svoj pryhožy tavar viodrami.
— Zavicie mianie Džon — heta pa-vašamu, — havoryć pryvietlivy azierbajdžaniec kala mašyny z rasijskimi numarami. Raskazvaje, što kłubnicy kuplaje, kab potym zavieźci ich na Maskvu.
Pra prybytkovaść hetaha biźniesu pierakupščyki asabliva nie chočuć raspaviadać. Adkazy amal va usich niekankretnyja — “iak atrymajecca, raz na raz nie prychodzicca”.
Internet pakazvaje, što ciapier u Maskvie kiłahram kłubnic kaštuje 40-90 rasijskich rubloŭ. To bok 8 000—18 000 biełaruskich rubloŭ. Kłubnicy -- tavar dalikatny. Siońnia kupili, zaŭtra rankam musić užo być na pryłaŭku.
Ciapier kłubnicy skuplajuć pa 12-14 tysiač za kiłahram.Spadarynia Tamara źbiraje ŭradžaj jahady na dzialancy pobač z rynkam. Havoryć, što jašče tydzień tamu kłubnicy skuplali pa 8 tysiač biełaruskich rubloŭ za kiłahram.
Žančyna pracuje vieterynaram u miascovym saŭhasie. Havoryć, što kłubnicy — heta mahčymaść dadatkovaha zarobku:
— Ja zarablaju ŭ saŭhasie 1,3 miljona rubloŭ. A ŭ mianie dźvie dački — adna ŭžo vučycca va univiersitecie, chutka i druhaja pastupić.
Muž spadaryni Tamary nie pracuje ŭ saŭhasie, a jeździć na zarobki ŭ Rasiju. U hety dzień jon razam z žonkaj vybiraŭ kłubnicy na dzialancy.
— Vy pra śmiećcie raskažycie abaviazkova! — aburana prosić mužčyna. — Pahladzicie vakoł, kolki śmiećcia pakidajuć paśla siabie hetyja handlary! Nichto nie prybirajecca. Kiraŭnictva saŭhasa byccam by vydzieliła paru čałaviek, jaki naprykancy dnia trochi prybirajuć tut. Ale kolki jaho raźlatajecca pa vakolicy!
Uzbočyny darohi sapraŭdy zaśmiečanyja — valajucca pałamanyja skrynki, papiera.
Pytajusia, kolki ž zarablajuć na kłubnicach miascovyja žychary?
— Ciapier jahady adychodziać, a krychu raniej pradavała pa piać viadzior u dzień. Ale jość i takija, što pa piaćdziesiat pryvozili. Dyk kaniešnie zarobki našy adroźnivajucca!
O, u nas jość ludzi, u jakich pa 30-50 sotak kłubnicami zasadžana! — dzielicca infarmacyjaj pra abjom tavarazvarotu Tamara
U Łuninieckim rajonie kłubnicy — pieršyja ŭ čarzie ekspartnaha praduktu. Ich piestujuć — ukryvajuć ad marazoŭ spandbondam dziesiatki sotak, bo harantyja ŭradžaju — heta nie žartački.
Miascovyja žychary raskazvajuć, što jašče dva tydni tamu jany mieli na stale “druhi chleb” novaha ŭradžaju. Ciapier kłubnicy adychodziać, na čarzie — bulba na ekspart.
Kamientary