U Minsku zatrymali žančynu, jakaja pryviezła svajo dzicia na vučobu ŭ pjanym stanie
Incydent adbyŭsia ranicaj 24 listapada kala himnazii № 16.
Ranicaj 24 listapada supracoŭniki staličnaj DAI, znachodziačysia na dziažurstvie kala navučalnaj ustanovy, zatrymali čarhovaha vadziciela, jaki kiravaŭ transpartnym srodkam u stanie ałkaholnaha apjanieńnia.
Jak paviedamili ŭ DAI HUUS Minharvykankama, kala 8.20 supracoŭniki Dziaržaŭtainśpiekcyi nieśli słužbu pablizu himnazii № 16 pa vulicy Lesi Ukrainki, 2. Dla pravierki dakumientaŭ była spyniena aŭtamašyna «BMV 530», jakoj kiravała žančyna 1969 hoda naradžeńnia (taksama ŭ aŭtamabili znachodziłasia dzicia). U supracoŭnikaŭ DAI uźnikła padazreńnie nakont fizičnaha stanu vadziciela, tamu apošniaja była dastaŭlena dla prachodžańnia miedycynskaha ahladu, jaki pakazaŭ, što ŭ momant kiravańnia žančyna była pjanaja (0,84 pramile).
Jak patłumačyła sama žančyna, napiaredadni viečaram jana vypiła butelku šampanskaha, a ranicaj viezła dzicia na zaniatki ŭ himnaziju.
Adznačym, što niahledziačy na masiravanyja adpracoŭki DAI pryškolnych terytoryj, jakija pačalisia paśla hibieli treciakłaśnika SŠ № 23 pad kołami «Parše Kajena» 13 listapada, vypadki zatrymańnia pjanych vadzicielaŭ, jakija padvoziać svaich dziaciej da navučalnych ustanoŭ, nie adzinkavyja.
Tak, ranicaj 22 listapada pablizu škoły № 37 na Staravilenskim trakcie ŭ Minsku byŭ spynieny aŭtamabil «Falksvahien Turan», jakim kiravaŭ54-hadovy vadziciel. Padčas miedycynskaha ahladu paćvierdziłasia, što vadziciel byŭ pjany.
U hety ž dzień na vulicy Siadych supracoŭniki DAI spynili dla pravierki dakumientaŭ «Nisan Mikra», za rulom jakoha znachodziłasia žančyna 1968 hoda naradžeńnia. Pry razmovie ź joju inśpiektary adčuli pach ałkaholu. Jak patłumačyła mnahadzietnaja maci (čaćviora dziaciej), jakaja viezła ŭ sadok svaju małodšuju dačku, viečaram z mužam jany vypili butelku harełki. Na miedycynskim ahladzie prybor pakazaŭ 0,18 pramile na pierapynienym vydachu i 0.20 na poŭnym. U adpaviednaści ź isnujučym zakanadaŭstvam žančyna była adpuščana.
Kamientary