Viestki ź Litvy

 Viestki ź Litvy

Za stałom — tolki prezydenty

Pryčym usie — adnaje krainy. I pamiž saboju nia svaracca. Mabyć, etykiet nie dazvalaje. A reč u tym, što na minułym tydni ŭ Vilni niekalki dzion praviała Staršynia Rady BNR Ivonka Surviłła. Vizyt mieŭ na mecie pieramovy ź Siamionam Šareckim, jaki ciapier naminalna vykonvaje abaviazki prezydenta Biełarusi. Darečy, kab paćvierdzić hety naminał, sp.Surviłła razam z S.Šuškievičam i prezydentam zhurtavańnia «Baćkaŭščyna» R.Hareckim napisali Zvarot da narodu Biełarusi, da parlamentaŭ i ŭradaŭ demakratyčnych krain. A jašče darečy, vyhladaje, što jany ŭsie i pryjaždžali dla taho, kab hety zvarot padpisać. Naš karespandent zaŭvažyŭ, što paśla pieramovaŭ sa sp.Šareckim sp.Surviłła vyhladała niby rasčaravanaju. Moža, prosta zanadta roznyja ludzi, a žyćcio prymušaje kazać pra adzinstva pahladaŭ i metaŭ.

U Lavona Muraški słaŭny jubilej

Lavon Muraška — heta słavuty bas Vilenskaj opery, jakoha ŭ Vilni ŭsie viedajuć i lubiać. I ŭsie viedajuć, što jon biełarus. Nia tolki tamu, što naradziŭsia 75 hadoŭ tamu ŭ miastečku Siniaŭka (ciapier Klecki rajon). Baćka Lavona byŭ charavym rehientam i jašče da vajny razam ź siamjoju pierajechaŭ u Vilniu. Jakraz u baćkavym chory Lavon i pačaŭ śpiavać. Paźniej jon vučyŭsia ŭ śpievaka «La Skały» Siarhieja Ŭścinoviča, jaki byŭ rodam z Ašmian, a zatym — u słynnaha litoŭskaha tenara Kiprasa Piatraŭskasa. Ale jašče ŭ himnazii jamu davaŭ uroki znakamity kampazytar Kanstancin Hałkoŭski. Siońnia ŭ repertuary sp.Muraški sotni tvoraŭ, z vystupami jon abjeździŭ paŭśvietu. Paśla 25 hadoŭ pracy ŭ Vilenskaj opery sp.Muraška kiruje choram u Śviataduchavym sabory kala Vostraj Bramy. A jašče jon — prezydent Zhurtavańnia Biełaruskich Hramadzkich Arhanizacyjaŭ Litvy. Palitykaj nie zajmajecca, zatoje dbaje, kab biełaruskuju siaredniuju škołu pierarabić na himnaziju, kab adnavić Vilenski biełaruski muzej, kab raźvivałasia toje, što dla kultury i budučyni. Vinšujem!

Dyplamaty na biljardzie

Jak pahladzieš, kolki narodu siadzić u pasolstvie RB u Litvie, dyk dumaješ — božački, što ž hety ŭvieś narod tam robić! Nu, čuvać było, što za kuplonuju enerhiju pieramaŭlalisia, bo nie zapłacili, albo što zaapiekavalisia mastackaj vystavaj, abo — što vysočvajuć niejkija «antybiełaruskija arhanizacyi». Ale ž nia stolki tych dyversantaŭ, kab takija štaty trymać! A voś ža jość zaniatak. Dniami dyplamaty RB u Litvie hulali na biljardzie z kalehami z Kazachstanu, Rasiei i Hruzii. Turnir ciahnuŭsia dziesiać hadzin. Pieršaje miesca zaniaŭ hruzin, druhoje kazach, a za treciaje bilisia miž saboju pasłancy RB Tadevuš Čačkoŭski i Vital Nikanoraŭ. Pieramoh Nikanoraŭ. Kali dadać piataje miesca vajskovaha ataše pasolstva RB Alaksandra Bužana, dyk kamanda RB razam nabrała 45 bałaŭ i stała pieramožcaj. Na druhim miescy — Kazachstan, na trecim — rasiejcy. Kamu cikava, hulali amerykanskija partyi ŭ rasiejski biljard. Nia viedaju, što heta takoje, ale symbolika zachaplaje.

Litoŭskija škoły za miažoj

Sioleta ŭ krainach Eŭropy pracuje 80 litoŭskich vychavaŭčych ustanovaŭ roznaha kštałtu. Najbolšy prahres u hetaj spravie adbyvajecca ŭ Kalininhradzie i ŭ Biełarusi. Bolej stała litoŭskich vučniaŭ u biełaruskich vioskach Rymdziuny i Pielasa, adkryvajucca novyja niadzielnyja škoły ŭ Lidzie i vioscy Vajniuny. Litoŭcam nadta zaležyć, kab ichnyja dzieci za miažoj vučylisia pa-litoŭsku — hrošy na toje vydzialajucca naŭprost ź dziaržaŭnaha biudžetu. Jak na maju hałavu, dyk chaj by bolej było ŭ nas litoŭskich škołaŭ. Bo tam i da biełaruskaj movy zusim inšyja adnosiny, čym u našych, savieckich.

Lićvin