pazytyvy
Ščaście chakieista
Kab sonca zahlanuła ŭ vakonca, treba mieć vakonca. Kali vakoncaŭ niekalki, dy nie na paŭnočny bok, naohuł niakiepska.
Samyja vialikija chaty ŭ Eŭropie ŭ belhijcaŭ. Mienšyja čym u nas — tolki ŭ datčanaŭ. Ale ŭ nardyčnych narodaŭ u adnoj chacie mała ludziej žyvie. Najbolšyja siemji ŭ turkaŭ, słavakaŭ dy palakaŭ. A pa žyllovaj płoščy na čałavieka my — na apošnim miescy ŭ kantynentalnym rejtynhu.
Mo tamu, što biednyja? Nie. Mo tamu, što słavianie? Taksama nie. Prosta «niastomny kłopat partyi i ŭradu ab žyllovaj prablemie» nia byŭ nadta ščyrym. Kolkaść kvateraŭ, pabudavanych na 1000 žycharoŭ za hod, nie demanstruje tendencyi da pavyšeńnia:
Čverć haradzkich žycharoŭ i kožny piacidziasiaty viaskoviec jak stajali, tak i stajać u čarzie na atrymańnie žytła. Čarha asabliva nie raście, bo dziaciej i maładych ludziej u krainie robicca ŭsio mieniej.
Na malunku dobra vidać, što saviecki sacyjalizm ekanamična i arhanizacyjna vyčarpaŭ siabie ŭ 80-ja hady. Dobra vidać i toje, što nia ŭsie ziemlaki pieršaha źjezdu RSDRP u toje pavieryli. Niekatoryja namalavali šmat nuloŭ i ŭkinuli tyja nuli ŭ žyllovaje budaŭnictva. Zaviravała ŭsio navokał. Dziakuj Bohu, kamunizm nie viarnuŭsia, ale tyja nuli, jak i miełasia być, pavyłazili ŭ našych kišeniach. Dalar padaražeŭ u 75 razoŭ. Zamiest vartych žalu 77 tryljonaŭ rubloŭ prybytku 1995 hodu hramadzianie atrymali za minuły hod ažno 1800 tryljonaŭ. Tryljonaŭ raźviałosia stolki, što ich musili denaminavać. Mabyć, dajšło da archistratehaŭ, što dabrom hrošadrukavańnie dla domabudavańnia nia skončycca.
Buduć skaročanyja abjomy ilhotnaha kredytavańnia žylla, — skazaŭ vice-premjer sp. H.Navicki ŭ Mahilovie. Z ulikam skaračeńnia abjomaŭ ilhotnaha kredytavańnia značnaja častka vykanańnia žyllovaj prahramy budzie znoŭ uskładzienaja na pramysłovaść. Dziaržaŭny dziejač jašče raz paćvierdziŭ datu zaviaršeńnia budaŭnictva ŭ Mahilovie Ladovaha pałacu — sioleta ŭ traŭni.
Heta jakraz toje, čaho nie chapaje, kab pramysłovaść zdoleła dahnać sielskuju haspadarku. Bo, pa-pieršaje, pramysłovaść pieravykanała prahnoz Łukašenki ad 15.01.1999 h. №25 na 4,7%, a pa-druhoje, kali ŭsim pradpryjemstvam addaduć hrošy ŭsie, chto im pavinien, dyk kab raźličycca sa svaimi daŭhami, nia chopić niejkaj drobiazi — 253 000 000 000 000 (dźvieście piaćdziesiat try tryljony) niedenaminavanych rubloŭ.
Choraša budzie chakieistam i «ačarodnikam». I nichto ŭžo nia skaža, što my durniejšyja za belhijcaŭ.
Michał Zaleski
Prapahandysty zapeŭnivajuć, što 196 palitviaźniaŭ užo na svabodzie9
Kamientary