BT vačyma biełarusa
Pseŭdadebaty
Z hetaha tydnia pačynajecca novy «kruty» teleprajekt. «Superdemakratyčnyja pieradvybarčyja teledebaty kandydataŭ u deputaty» z «prasunutaj moładździu», jak havaryłasia ŭ anonsie. My ŭbačym razmovy ŭ studyi – pytańni viadučaha, pramovy kandydataŭ, pytańni z zali dy ŭstaŭki zapisanych na vulicy apytańniaŭ. U pieršaj prahramie buduć razmaŭlać, jak moładź na vybary zaciahnuć.
Udzielničać u debatach buduć tolki pradstaŭniki tych partyjaŭ, što vyłučyli svaich kandydataŭ na vybarach – kamunisty dvuch hatunkaŭ, ahraryi, sacyjał-spartoŭcy, respublikancy, patryjoty i sacyjał-demakraty taksama dvuch hatunkaŭ, pryčym udzieł Statkieviča pad pytańniem, a realny supiernik Łukašenki na budučych prezydenckich vybarach liberał-demakrat Hajdukievič udzielničać admoviŭsia. Nivodnuju sapraŭdy apazycyjnuju partyju da ŭdziełu ŭ debatach nie dapuskajuć. U studyi budzie tolki moładź – jak zvyčajna, žurfakaŭcy, pradstaŭniki klubaŭ pa intaresach, kamsamolcy, a najbolš — kursanty vajskovych i milicejskich ustanovaŭ dy RNIEšniki. Žurnalistam niedziaržaŭnych, «apazycyjnych», jak toj vyražajecca, ŚMI, uvachod u studyju zabaronieny.
U vyniku prahrama budzie dyjaloham adnych maryjanetak z druhimi maryjanetkami ŭ zadadzienaj formie. Ad pieradvybarčaj baraćby ŭ efiry heta budzie hetak ža daloka, jak siabroŭskija nam Kuba z Kitajem — ad Rady Eŭropy. Nu, moža i zadaść chto z moładzi paru vostrych pytańniaŭ, ale naŭrad ci zdoleje zrabić heta surjozna, abhruntavana. Dy nia fakt, što chto-niebudź, akramia prysutnych na zapisie, toje pytańnie dy adkaz pačujuć. Bo debaty – voś biełaruski narodny marazm! – pojduć u zapisu, a nie ŭžyvuju.
Što heta ŭvohule za teledebaty, kali jany — u zapisu?! Cikavaść takich debataŭ dla hledača, jaki chacieŭ by z hetymi vybarami dla siabie razabracca, možna paraŭnać ź cikavaściu hledača francuskich prahramaŭ da sposabu zdabyčy marskich ahurkoŭ, pra što nam u subotu doŭha raspaviadali ŭ pieradačy kanału SFI.
Paŭstaje pytańnie — jaki sens tady ad taho telešoŭ — čarhovaha pramyvańnia mazhoŭ narodu pad demakratyčnaju šyldaju?
Arciom Łukjanovič
Ciapier čytajuć
Ejsmant: Łukašenka nie zmoža palacieć na Samit miru ŭ ZŠA, bo pavietranaja prastora Jeŭropy dla jaho zakrytaja12
Kamientary