Słavamir Adamovič. Hod zacišša pierad hodam bury

 Słavamir Adamovič

Hod zacišša pierad hodam bury

U paraŭnańni ź minułym 1999-m hodam, tak zvanym hodam Satany, albo Źviera, znakam jakoha źjaŭlajecca ličba 666 (pierakulenyja try dziaviatki), hod 2000-y prajšoŭ adnosna cicha. Praŭda, siakija-takija padziei ŭsio ž adbylisia. Ich možna ličyć fizyčnaj zaradkaj pierad startam u treciaje tysiačahodździe. Adznačaju nastupnyja zdareńni cotnaha hodu.

Pačaŭ vychodzić novy časopis “Skaryna”.

Spoŭniłasia 100 hadoŭ z dnia naradžeńnia opernaha śpievaka M.Zabejdy-Sumickaha i 900 hadoŭ Davyd-Haradku.

Teatar “Volnaja scena” — pałova trupy razam ź niaźmiennym kiraŭnikom V.Mazynskim — vyjšaŭ z padparadkavańnia Minkultu.

Dva mierapryjemstvy, jakija nia stali padziejami i ŭžo amal zabylisia — Kanhres demsiłaŭ i Ŭsiebiełaruski źjezd. Jak na majo ćviordaje pierakanańnie, hetyja schody hramadzianaŭ nijak nie paŭpłyvali na nacyjanalnaje žyćcio j dziaržavatvorčy praces. Na žal.

Voś jašče padzieja — biełarusy stvaryli supertank “2T”. Heta padzieja našaha biudžetu. Zastajecca tolki naładzić nadziejny kanał zbytu, znajšoŭšy papiarednie nadziejnaha pakupnika.

Sumnaja niepaźbiežnaść — adyšła sapraŭdnaja aktrysa Stefanija Staniuta, bieź piaci hadoŭ roŭnia XX st.

Teror akupacyjnych sił na vulicach Miensku ŭ dzień 25 Sakavika i źniknieńnie videaaperatara Źmitra Zavadzkaha — čornyja mietki ŭ vyzvolnym ruchu.

Kaniec Samojłava — boskaja kara za słovy i dziejańni suprać usiaho biełaruskaha. Śmierć — zaŭsiody padzieja. Śmierć voraha — padzieja festyvalnaja. I nieistotna, chto ŭzmachnuŭ miačom pomsty.

Nu, i jašče adno mierapryjemstva, jakoje nia stała padziejaj — vybary 14 kastryčnika. Tut i dadać niama čaho.

Pieraličyŭšy akcyi i padziei, jakija mieli toj ci inšy rezanans u hramadztvie, zhadajem i subjektyŭna-pryvatnyja. Voś tut sapraŭdy cikava. Tut, brat ty moj, takija padziei, ad jakich tak prosta nie admachniešsia.

I sapraŭdy, navat padzieńnie Łukašenki nia stała b u tvaim pryvatnym žyćci bolšaj padziejaj, čym toj fakt, što ŭ ciabie naradziłasia dzicia — dačka, pra jakuju ty tak doŭha maryŭ.

A nabyćcio pieršaj u tvaim žyćci ŭłasnaj, za svaje hrošy kuplenaj kvatery! Takaja padzieja ŭ pryvatnym žyćci biełaruskaha nacyjanalista nia mienš važnaja, čym viartańnie na mienski Dom uradu nacyjanalnaha hierbu “Pahonia”.

...2000-y hod zavieršany. Dumajem ciapier, jakimi padziejami napoŭnić 2001-y. Prynamsi, adnoj padziei my čakajem z asablivym nieciarpieńniem. Ale dla taho, kab jana stała nieŭniknionym faktam, nacyjanalna-vyzvolny ruch pavinien pravieści samuju šyrokuju mabilizacyju ŭsich nieabchodnych dla pieramohi sił i resursaŭ. I pra heta ŭ našych dalejšych razvahach.