Palityki ź siłami

Palityki ź siłami

Tolki kandydaty, za jakimi stajali arhanizavanyja palityčnyja siły, sabrali 100 tysiačaŭ podpisaŭ

Čyhir, Kazłoŭski, Jarašuk, Sinicyn, Marynič, ani Paźniak, ani inšyja “samotnyja palityki” ci “palityzujučyja” biznesmeny takoha vyniku dasiahnuć nia zdoleli.

Łukašenka zdaŭ 396 tys. podpisaŭ, Domaš — 161 tys., Hajdukievič — 136 tys., Hančaryk — 123 tys. Jak ni dziŭna, hetuju ličbu — čatyry pretendenty — pradkazaŭ jašče miesiac tamu Siamion Domaš. Jon kazaŭ pra “troch-čatyroch” zdolnych nabrać 100 tys.

Pa ironii losu, jakraz jaho “piaciorka” zrabiła hetym čaćviertym, dubloram Hančaryka.

Ci nia ŭsie inšyja kandydaty prysiahajuć, što sabrali pa 80—90 tys. podpisaŭ na svaju karyść. Heta padazrona. Viedajučy, što hetaja infarmacyja nia budzie praviaracca, bo patrebnaj ich kolkaści hałasoŭ pretendent tak i tak nie nabraŭ… Ci nie padaŭ chto ź ich lipavych podpisaŭ, kab zrabić lepšuju minu pry zusim aby-jakoj hulni?

Pa sabranych podpisach možna mierkavać pra realny ŭpłyŭ taje ci inšaje palityčnaje siły. Partyja ŭłady zastajecca pa-za kankurencyjaj pa svaich arhanizacyjnych zdolnaściach.

Ź inšych siłaŭ najlepš pakazała siabie kaalicyja niedziaržaŭnych supołak niezaležnickaha charaktaru, tradycyjna nazyvanaja “niezaležnym biełaruskim hramadztvam”, jakaja zhurtavałasia vakoł Domaša.

Domaš staŭsia adzinym, akramia Łukašenki, kandydatam, vyniki zboru podpisaŭ za jakoha bolš-mienš roŭnyja pa ŭsioj Respublicy. Trochi bolej na Haradzienščynie (27 tys.) i ŭ Miensku (31 tys.), trochi mieniej na Mahiloŭščynie (15 tys.). Siarednija ličby na Bieraściejščynie (24 tys.), Homielščynie (23 tys.), Mienščynie (21 tys.) i Viciebščynie (20 tys.). Cikava, što ŭ krainie ŭsiaho 29 (sa 116) rajonaŭ, dzie Domaš nie sabraŭ nivodnaha podpisu. 8 takich — na Mienščynie (čamuści takija nacyjanalistyčna nastrojenyja rehijony, jak Miadzieł, Vałožyn, Kapyl, Stoŭpcy, Bierazino, Lubań, Smalavičy, Staryja Darohi). 6 — na Homielščynie (Brahin, Vietka, Jelsk, Naroŭla, Chojniki, Karma — usio spres čarnobylskija rajony, kudy idzie najbolš zachodniaj humanitarnaj dapamohi i dzie aktyŭna dziejničaje Fond Hrušavoha). 9 — na Mahiloŭščynie (Bychaŭ, Hłusk, Kaściukovičy, Starcy (Kiraŭsk), Klimavičy, Krasnapolle, Čerykaŭ, Kruhłaje, Chocimsk — iznoŭ ža pieravažna paciarpiełyja ad radyjacyi rajony). 4 — na Viciebščynie (Lepiel, Dokšycy, Rasony, Sianno). 2 na Haradzienščynie (bahatyja i tradycyjna paźniakoŭskija Kareličy, Iŭje). Nivodnaha takoha rajonu na Bieraściejščynie.

Kab pryjšoŭ Domaš da zhody z Paźniakom i Hrušavym, ličba sabranych im hałasoŭ mahła b być bolšaj jašče na paŭsotni tysiačaŭ. (Choć palityčnaja mlavaść rajonaŭ, što siadziać na ihołcy zamiežnaje humanitarnaje dapamohi vidavočnaja. Tam zusim mała nabrali i Paźniak (3,5 tys. podpisaŭ tamsama), i Hančaryk (4,8 tys. na Homielščynie), i padtrymany Hrušavym Kazłoŭski (2,5 tys. na Mahiloŭščynie). Dzie nie pracujuć na siabie, tam nie abaraniajuć i svaich intaresaŭ.)

Najbolej hałasoŭ Domaš sabraŭ u Biarozie, Hancavičach, Darahičynie, Ivacevičach na Bieraściejščynie; Mahilovie i Kryčavie na Mahiloŭščynie; Žłobinie, Rahačovie i ŭ samim Homli na Homielščynie; Voranavie, Dziatłavie, Smurhoniach, Ščučynie, Vaŭkavysku, samoj Horadni na Haradzienščynie; Navapołacku, Voršy, Tałačynie, Pastavach na Viciebščynie; Barysavie, Žodzinie, Klecku, Vialejcy na Mienščynie.

Za Hajdukievičam staić Liberalna-demakratyčnaja partyja i, kažuć, “šery” biznes. Kolkaść sabranych za jaho podpisaŭ na ŭschodzie Respubliki bolšaja, čym na zachadzie. Krynicy ŭ Administracyi prezydenta nie vyklučajuć, što kandydat Hajdukievič moža nie dajści da finišu prezydenckaje honki.

Ułoŭ Hančaryka niebahaty, kali ŭličyć, što ŭ Federacyi prafsajuzaŭ miljony farmalnych siabroŭ. Zusim mała podpisaŭ sabrała jahonaja kamanda na Homielščynie i Haradzienščynie, zatoje vyjšła na pieršaje miesca siarod demakrataŭ na Bieraściejščynie. Praŭda, u štabie Hančaryka śćviardžajuć, što ŭsiaho za lidera prafsajuzaŭ sabrali 216 tys. podpisaŭ, ale zdali tolki nieabchodny minimum pravieranych.

Kampanija zboru podpisaŭ vyvieła ŭ bujnuju palityku inšaha prafsajuznaha lidera, Alaksandra Jarašuka. U hetaha ŭradženca Kamianieččyny 76 tys. podpisaŭ, i jon maje ŭsie šancy stać značnaj fihuraj palityčnaj sceny na piać nastupnych hadoŭ.

A voś zorki Kazłoŭskaha, Čyhira, Maryniča hasnuć. Čyhir, vidać, tak i zastaniecca ŭ encyklapedyjach “biełaruskim palitykam kanca XX st.” U apazycyjnym lahiery zhadka pra ich budzie vyklikać lohkaje razdražnieńnie: razdrabili demakrataŭ i ŭkrali hazetnuju płošču ŭ macniejšych kandydataŭ.

Bujnyja biznesmeny zasłužyli pryznańnie ŭładaŭ svajoj admovaj padtrymać pravych i demakratyčnych kandydataŭ. Tym samym jany źviazali svoj los z Łukašenkam. Pravasłaŭnyja pakazali muskuły vyłučeńniem dyrektara Kałuhina, za jakoha choćki-niachoćki źbirali podpisy rabotniki jahonaha zavodu chaładzilnikaŭ.

Biełaruskamoŭnym balić pravał Paźniaka. Navat praciŭnikam škada jahonaha vychadu z honki. Niezaležniki zastajucca niby biaz hołasu na hetych vybarach. Biazdarna, biez ahieńčyku praviedzienaja kampanija naskrebła 75 tys. podpisaŭ, zamiest 104-ch, deklaravanych Papkovym. Ciapier telefon presavaha sakratara partyi, Valerja Bujvała, bieznadziejna maŭčyć.

Voś kab Paźniak stvaryŭ mocnuju pravuju kaalicyju… Adnak hetaha z emihracyi nia zrobiš. Vidać, čas jahonaha palityčnaha zaniapadu stanie adnačasova paroju šyrokaha pryznańnia jahonych zasłuh pierad Biełarusiaj.

Vyjaviłasia, što štab tolki adnaho kandydata ŭ pracesie zboru podpisaŭ nie zavyšaŭ ich kolkaści — Domašaŭ. Sumlennaść zaŭsiody źviartaje na siabie ŭvahu ŭ mutnaj vadzie postsavieckaje palityki. Vybarcy heta jašče aceniać.

Mikoła