Spakoj dla Kurapataŭ

Spakoj dla Kurapataŭ

Hramadzkija inicyjatyvy “Za ŭratavańnie memaryjału Kurapaty” i “Moładź u abaronu Kurapataŭ” zaćvierdzili kancepcyju prajektu pamiatnaha kompleksu ŭ Kurapatach. Kab nie zaciahnuć spravy, prapanujecca skončyć abmierkavańnie da 1 traŭnia. Na pačatku 90-ch žury na čale z narodnym mastakom Biełarusi Vasilom Šaranhovičam razhledzieła bolš jak 50 prajektaŭ, ale nivodzin ź ich tak i nia byŭ realizavany z-za adsutnaści kancepcyi memaryjalizacyi.

Prajekt kancepcyi praduhledžvaje ŭstanoŭku płotu vakoł Kurapataŭ, uvachodnaj bramy, a taksama novych kryžoŭ, łavaŭ. Hałoŭnaje — nie parušyć spakoju jamaŭ-mahiłaŭ, miarkujuć aŭtary kancepcyi. Tamu pomnik na miescy zakładnoha kamienia nie pavinien być vialikim, a chramy kali j budavać, dyk lepiej raźmiaścić za miežami achoŭnaj zony.

Paśla zaćviardžeńnia kancepcyi planujecca abviaścić mižnarodny konkurs užo na sam prajekt memaryjału i tolki paśla vybaru najlepšaha pačać budaŭnictva.

Pytańnie nakont krynicaŭ finansavańnia budučaha memaryjału pakul nia vyrašanaje. Stvaralniki kancepcyi nie spadziajucca na dapamohu ŭładaŭ (letaś pałata pradstaŭnikoŭ tak i nia ŭniesła ŭ biudžet raschodaŭ na budaŭnictva pomnika ŭ Kurapatach) i raźličvajuć na ŭsienarodny zbor srodkaŭ. Adnak jany ŭśviedamlajuć, što padčas stvareńnia memaryjału daviadziecca kantaktavać jak ź miascovymi ŭładami, tak i ź dziaržaŭnymi prajektnymi instytutami, i miarkujuć, što hetaje supracoŭnictva budzie paśpiachovym i zmoža paspryjać kansalidacyi hramadztva.

Pakul raspracoŭščyki kancepcyi zaklikajuć usich nieabyjakavych dasyłać svaje prapanovy na adras: HA “Biełaruskaja arhanizacyja pracoŭnych žančyn”, pł.Svabody, 23, Miensk, 220030; e-mail: ngo@user. unibel.by; t.: 227-04-54, 227-13-16.

Budaŭnikam kalcavoj darohi, što prachodzić praz Kurapaty, narešcie zaćvierdzili plan raboty. Heta palahčaje kantrol za ichnymi dziejańniami z boku abaroncaŭ memaryjału.

Vałancioraŭ u kurapackim lahiery pamienieła z pryčyny epidemii hrypu. Chvoryja sychodziać, kab nie zarazić inšych. Tych, chto zastaŭsia va ŭročyščy, pa-raniejšamu padtrymlivajuć ludzi z usiaje Biełarusi. Dniami ŭ lahier zavitaŭ haradzienski kaval Juraś Macko, pryvioz abaroncam Kurapataŭ charčy. Narmalizavalisia j adnosiny “pałatačnikaŭ” z rajonnym laśnictvam, jakoje mieła da ich pretenzii.

Nad namiotam łunaje vializny bieł-čyrvona-bieły ściah. Nakont hetaha z AMONam dasiahnuty “poŭny kampramis”. Rasiejski chłopiec z Muramu, što žyvie ŭ lahiery ŭžo druhi miesiac, pačynaje havaryć pa-biełarusku. “Za Alimpijadaj my sočym pa radyjo. Kali biełaruskaja zbornaja vyjhravała ŭ amerykancaŭ ź likam 1:0, byŭ taki ŭzdym! — raskazvaje Aleś pa mianušcy Hietman, adzin z kiraŭnikoŭ abaroncaŭ Kurapataŭ. — A kali nam patelefanavaŭ naš chłopiec Juraś i skazaŭ, što na trybunach u Sołt-Łejk-Syty ŭźniatyja bieł-čyrvona-biełyja ściahi, — dyk i ŭvohule”.