Barys Tumar. Prorva

dziaržaŭny intares

Prorva

Alimpijada čarhovy raz zaśviedčyła, što Biełaruś ad Rasiei adździalaje prorva. I prorva hetaja — nia ŭ kolkaści medaloŭ.

Rasieja ŭ ahulnym alimpijadnym zaliku čaćviertaja z 16 medalami, pobač z Aŭstryjaj, a biełarusy tolki ŭ druhim dziasiatku. Tym nia mienš, my z pakoraju pryniali žorstkija miery MAKu da Paŭłovič i Baryčki. A nizkaja “pradukcyjnaść” rasiejcaŭ spravakavała skandały i demaršy.

Viačernija Viesti na RTR byli padobnyja na paviedamleńni z frontu. U studyju zaprašali dalokich ad sportu palitykaŭ i kulturnikaŭ, jakija klajmili niačesnych sudździaŭ, MAK, ZŠA i ceły śviet. Rabotnik estrady Zadornaŭ prosta ŭ studyi pierakreśliŭ amerykanskuju vizu. Duma ŭ piatnicu ŭsio pasiadžeńnie pryśviaciła Alimpijadzie, zahadaŭšy rasiejskim alimpijcam razam ź biełarusami (!) pakinuć hulni. Dziakuj bohu, što Pucin “paraiŭ” zastacca. Tolki kali paŭtorny dopinh-test paćvierdziŭ, što rasiejskija łyžnicy ŭžyvali darbipaecin, analah erytrapaecinu, preparat, jaki mocna padvyšaje kolkaść hiemahlabinu ŭ kryvi, rasiejskaja delehacyja źviała.

U Biełarusi na hetyja skandały hladzieli ź ironijaj i vidavočna z pazycyi “cyvilizavanaha śvietu”. Pavał Jakubovič u kaloncy redaktara Sovietskoj Biełoruśsii pakpiŭ z rasiejskaj histeryi: “Surjoznyja ludzi pavinny ŭsio-tki adroźnivacca ad padletkaŭ-fanataŭ”. Były alimpijski čempijon Ŭładzimier Parfianovič byŭ jašče bolš kateharyčny: “Kab rasiejcy nie ŭžyvali zabaronienych preparataŭ, nia mieli b prablemaŭ”. “Kali biełaruskaja kamanda sabrałasia i raźbiła švedaŭ, dyk sprava zusim nie ŭ arbitrach”, — zaviaršaje Jakubovič svoj kamentar viečnych narakańniaŭ rasiejskich spartoŭcaŭ i palitykaŭ na antyrasiejskaść sudździaŭ.

U takim ža duchu aśviatlała skandały i pieramohi Alimpijady i astatniaja biełaruskaja presa. Na hetym fonie dysanansam hladzielisia chiba acenki radyjo “Svaboda”, jakoje nastojliva davodziła, što biełarusy na Alimpijadzie cierpiać poŭny pravał.

Pośpiech biełaruskich chakieistaŭ (pieramohi ŭ indyvidualnym zaliku robiać słavu ŭ bolšaj stupieni samomu spartoŭcu, čym dziaržavie, jakuju jon pradstaŭlaje) prymusiŭ śviet pabačyć Biełaruś na mapie. I heta kamanda, vyhadavanaja na dźviuch-troch ladovych placoŭkach savieckaje pary! Možna tolki ŭjavić patencyjał budučych biełaruskich zbornych, kali daduć svoj plon ciapierašnija chakiejnyja pałacy. Biełaruś usio ž — kraina Poŭnačy.

Tolki nia varta piajać chvału biełaruskim chakieistam, što adkryli śvietu niezaležnuju Biełaruś. Varta piajać chvału Biełarusi, što zavajavała i adstajała niezaležnaść i tym samym adkryła śvietu biełaruskich chakieistaŭ.

Barys Tumar

Mierkavańni aŭtaraŭ-kalumnistaŭ mohuć nie supadać ź mierkavańniem redakcyi