Klimaŭ nia maje šancaŭ
Paśla vyzvaleńnia deputata Andreja Klimava z turmy ŭ Biełarusi nie zastaniecca palitviaźniaŭ, zatoje na palityčnaj arenie źjavicca novy hulec.
Biznesmen Klimaŭ byŭ adnym z samych rašučych u zakanadaŭčym schodzie Biełarusi padčas kanstytucyjnaha pieravarotu 1996 h. Heta jon adkryta prapanoŭvaŭ aryštavać Łukašenku za zamach na kanstytucyjny ład. Za toje i papłaciŭsia. Šantažyscki režym maje kampramat na ŭsich takich Klimavych, hetym i žyvie.
U adroźnieńnie ad Lavonava ci Kudzinava, Klimavu nie paščaściła pabačyć volu da vybaraŭ. Ułady vidavočna pabojvalisia hetaha vypusknika Lvoŭskaje pažarnaje vučelni. Čałaviek, jaki nia hrebavaŭ kantaktami z kryminalnym śvietam i viedaŭ mienskija biznes-koły jak svaju kišeniu, moh zbłytać chadu vybarčaje kampanii. Tamu Papłaŭskaja ź Cichanovičam letaś musili pa-raniejšamu śpiavać dla siabra prosta ŭ kalonii na Kalvaryjskaj.
Ciapier jon vychodzić, i čuvać prapanovy: a čamu b z Klimava nie zrabić lidera apazycyi? Enerhičny, małady, mučanik, ambitny, svoj dla hrašovych tuzoŭ…
Klimaŭ nia maje šancaŭ stać nacyjanalnym lideram. Pa-pieršaje, jon pašpartny ŭkrainiec. U Biełarusi ź jaje maładym nacyjanalnym pačućciom heta surjozny handykap. Pa-druhoje, jon mieŭ suviazi z kryminalnym biznesam. Niepraŭdapadobna, kab za takim mahli pajści šyrokija masy biełarusaŭ.
6 hadoŭ isnavańnia niezaležnaha biełaruskaha hramadztva ŭ padpolli zarazili jahonych palityčnych lideraŭ syndromam pasiŭnaści. Bolšaść ź ich dumaje, što ŭsio na hetym śviecie možna vyrašyć kuluarna, pry dapamozie zamiežnych suviaziaŭ i novych kaalicyjnych paśjansaŭ. Hałoŭnaje, miarkujuć jany, — heta suviazi i srodki! Navat pravalnaje vyłučeńnie kandydata ad apazycyi na prezydenckich vybarach mała čamu hetych ludziej navučyła. Jany fatalna niedaaceńvajuć značeńnie niepasrednaje kamunikacyi z vybarcami. Dabicca pieramohi z dapamohaj kryminalnych ci zamiežnych kapitałaŭ — nievierahodny dla Biełarusi varyjant. Prezydentam zrobicca toj, chto budzie havaryć jasnaj i dastupnaj movaj, mieć śvietły tvar, strojnuju pastavu i čystaje sumleńnie.
Niemahčyma “kłanavać” nacyjanalnaha lidera. Jon musić naradzicca naturalnym šlacham.
Barys Tumar
Jak za biełaruskimi apazicyjanierami špijoniła madel Onlifans1
Kamientary