TIBO'2002

TIBO'2002

“Golden Software” prezentavała svaju čarhovuju raspracoŭku — kamputarnuju systemu dla handlaroŭ aŭtazapčastkami. Hety viadomy biełaruski raspracoŭščyk prahramnaha abstalavańnia čaćvierty hod zapar afarmlaje stend vyklučna pa-biełarusku. Da taho ž klasyčnym pravapisam. Pahadziciesia, heta varta było pabačyć.

Z 2 da 5 krasavika ŭ vystavačnym paviljonie na Janki Kupały adbyłasia 9-ja vystava infarmacyjnych technalohijaŭ “TIVO'2002”. Jašče hady try-čatyry tamu Biełaruś mieła dźvie bujnyja kamputarnyja vystavy na hod: uviesnu — “TIVO” i ŭvosień — “Sučasny ofis i bank”, ale potym z apošniaj pačało rabicca niešta niezrazumiełaje. Spačatku jana była abjadnanaja z novaj vystavaj PTS (“Perspektyŭnyja technalohii j systemy”), potym źjaviłasia jašče adna vystava — “Infabieł”. Na tle henych pieraturbacyjaŭ “TIVO” pryvablivała svajoj stabilnaściu, što ŭrešcie i dazvoliła joj stać najbujniejšaj padziejaj u kamputarnym žyćci Biełarusi.

Sioleta ŭdzielnikaŭ vystavy pabolšała, padvysilisia j ichnyja vydatki na afarmleńnie stendaŭ. Asabliva ŭraziŭ stend kampanii “Date Stream”, zrobleny z hablavanych došak i niejkaha chmyźniaku. Adno što nazoŭ kampanii prybili zavysoka. Kab razhledzieć, prychodziłasia adychodzicca ad paviljonu.

Kantynhient udzielnikaŭ vystavy dosyć stabilny i amal nie źmianiajecca na praciahu apošnich hadoŭ. Heta pravajdery sotavaj suviazi, Internet-pravajdery, bujnyja kamputarnyja kampanii j vytvorcy dy pradaŭcy prahramnaha abstalavańnia.

Kampanija “Velcom”, adziny aperatar sotavaj suviazi ŭ standarcie GSM, narešcie dała mahčymaść uładalnikam mabilnikaŭ karystacca Siecivam pa WAP. Cikava, što jašče kolki miesiacaŭ tamu kampanija zajaŭlała, što na hetuju pasłuhu ŭ Biełarusi popytu nia budzie, ale procilehłyja zajavy z boku inšaha aperatara — MTS, što pavinien pačać pracavać užo ŭ hetym miesiacy, prymusili “Velcom” radykalna źmianić svaje pohlady.

“Adkryty kantakt”, rehistratar damennych imionaŭ u zonie .by, adčyniŭ paštovy servis mail.by. Raniej hety damen znachodziŭsia ŭ stop-liście — nichto nia moh zarehistravać takoje imia, navat za hrošy. Dobra być manapalistam: chočaš — zabaraniaješ, chočaš — dazvalaješ. Sabie... Hetaja ž kampanija źjaŭlajecca ŭładalnikam paśpiachovaj placoŭki elektronnych kramaŭ — shop.by. Na vystavie jana paabiacała chutka razharnuć elektronnuju płaciežnuju systemu, ale, aznajomiŭšysia z detalami, ciažka pavieryć u pośpiech hetaje spravy. Padpisvać asobnuju damovu z bankam i adkryvać specyjalny rachunak — zašmat turbotaŭ, kab apłacić jakuju kružełku ci knihu. Praściej i tańniej raźličycca hatoŭkaj z kurjeram, jak heta robicca ciapier.

Kamputarnyja kampanii ničym asablivym nie ździvili. Amal usio demanstravanaje načyńnie — zvyčajnaje, jaho možna nabyć na luboj firmie. Padvyšanaja cikavaść była da maleńkich fłeš-kartaŭ pamiaci z USB-interfejsam. Heta nadziejny srodak dla zachoŭvańnia sakretnaj finansavaj i nia tolki infarmacyi: ustaviŭ u kamputar, papracavaŭ, dastaŭ, pakłaŭ u kišeniu. Infarmacyja nadziejna šyfrujecca — nijakaja padatkovaja nie dakapajecca.

Kolkaść saftvernych kampanijaŭ-udzielnikaŭ pamienieła. Zastalisia tolki samyja bujnyja — “Galactic” dy “Golden Software”, a taksama pradstaŭnictva bujnoj zachodniaj, ale nia vielmi viadomaj u nas “Hansa Software”. Apošniaja pradstaŭlała buchhalteryju navat pad “makintoš” i “linuks”, ale mocnaj cikavaści heta nia vyklikała. Dla Biełarusi “linuks” nia budzie aktualnym, pakul apošniuju versiju Windows u Ždanovičach možna prydbać za try dalary.

“Golden Software” (“Załatyja prahramy”) prezentavała svaju čarhovuju raspracoŭku — kamputarnuju systemu dla handlaroŭ aŭtazapčastkami. Hety viadomy biełaruski raspracoŭščyk prahramnaha abstalavańnia ŭžo čaćvierty hod zapar afarmlaje stend vyklučna pa-biełarusku. Da taho ž klasyčnym pravapisam. Pahadziciesia, na heta varta pahladzieć.

Na hanarovaje adkryćcio dy furšet arhanizatary zvyčajna zaprašajuć biełaruski muzyčny kalektyŭ ci śpievaka. Ale kali raniej heta byli, tak by mović, “naminalnyja” biełarusy kštałtu Iny Afanaśjevaj ci “Biełaruskich pieśniaroŭ”, što stvarali niezaŭvažny fon i nia duža pieraškadžali pahłynańniu chalaŭnych smakotaŭ dy mocnych napojaŭ, dyk hetym razam śpiavaŭ “Pałac”. Dy tak, što ŭ skoki puścilisia navat charvaty ad Eryksana. Voś jana — moc biełaruskaha.

A.K.