Z usioj krainy
Kantrabanda kambajnaŭ
Supracoŭniki specsłužbaŭ zatrymali pablizu vialikaje vioski Lelikava Kobrynskaha rajonu kambajn “Niva” biez rehistracyjnych numaroŭ, jaki vakolnymi ściežkami jechaŭ da biełaruska-ŭkrainskaje miažy. Dva zatrymanyja mechanizatary — ukrainski j biełaruski — pryznalisia, što chacieli ciškom pierahnać kambajn na Vałyń, unikajučy myta. U toj samy dzień u adnym z dvaroŭ Lelikava byli znojdzienyja jašče dźvie “Nivy”, padrychtavanyja da adpraŭki.
Muzykaŭ “Apuščeńnia” zatrymali
U Biełaaziorsku muzykaŭ biarozaŭskaha rok-hurta “Apuščeńnie” zatrymali prosta na kancercie, bo tyja vyjšli vystupać na scenu ŭ adnych majtkach i na zaŭvahu dziažurnaha milicyjanta admovilisia apranucca. U zali adłučyli elektryčnaść, a muzykaŭ zabrali ŭ pastarunak.
Likvidataraŭ źlikvidavali
Niadaŭna była likvidavanaja Bieraściejskaja haradzkaja arhanizacyja “Invalidy Čarnobylu”, jakaja naličvała bolej za 450 siabroŭ. Pryčyna prostaja: niama srodkaŭ na jejnaje ŭtrymańnie.
I.Chviedarovič, Bieraście
Cahlina na pamiać
Dziŭnym sposabam źbirajuć srodki na budaŭnictva pravasłaŭnaj carkvy ŭ Viciebsku. Za tysiaču rubloŭ, achviaravanych na chram, imia “fundatara” pišuć na cahlinie, jakaja zaraz ža kładziecca ŭ mur. Asabliva modna siarod viciebskich zakachanych udvaich “kuplać” adnu cahlinu.
Pierapis knihalubaŭ
Viciebski krajaznaŭčy fond imia A. Sapunova pačaŭ źbirać źviestki pra miascovych amataraŭ knižak i ŭładalnikaŭ asabistych biblijatek. Dziela hetaha žycharam Viciebsku prapanavana ŭziać udzieł u ankietavańni. Pa vynikach zboru źviestak planujecca vydać daviednik “Biblijafiły i knihaluby Viciebsku XX st.” Kab atrymać ankietu, možna źviarnucca ŭ abłasnuju biblateku, kniharniu “Bukinist” albo patelefanavać pa numary 36-92-84.
Michał Čarvinski, Viciebsk
Adkryŭsia MDUCH
U Mahilovie źjaviŭsia treci ŭniversytet. Nie na pustym miescy — jaho zahadam Ministerstva adukacyi zrabili z technalahičnaha instytutu. Praŭda, pierš čym atrymać vysoki tytuł supracoŭnikaŭ Mahiloŭskaha dziaržaŭnaha ŭniversytetu charčavańnia, instytuckija kadry dobra ŭparylisia ŭ časie trochmiesiačnaj atestacyi. MDUCH siońnia — adzinaja ŭ Biełarusi navučalnaja ŭstanova, jakaja rychtuje specyjalistaŭ hramadzkaha charčavańnia pa 9 specyjalnaściach.
Pakroŭski, Mahiloŭ
Metearyt
U vioscy Kryčaŭ-2 dniami zvaliŭsia ništavaty metearyt. Achviaraŭ i razbureńniaŭ, aproč paŭmetrovaje jaminy ŭ harodzie miascovaj žycharki spn.Pryvałavaj, niama. Kabieta raspaviadaje, što, korpajučysia na hradach, pačuła, jak štości zaśvistała, zahuło, potym niby małanka blisnuła. Praz kolki chvilinaŭ žančyna ŭžo trymała ŭ rukach jašče haračaha “kaśmičnaha hościa”. Žalezna-kamienny metearyt važyć 455 hramaŭ. Jon — šosty, znojdzieny na našaj ziamli za ŭsiu historyju Biełarusi. Nieviadoma, ci atrymaje spn. Pryvałava 25% ad jahonaha koštu.
Andrej Kuźmin, Kryčaŭ
Pamiać pra Biehina
U Bieraści budzie ŭšanavanaje imia našaha znakamitaha ziemlaka Menachiema Biehina, byłoha premjer-ministra Izrailu, laŭreata Nobeleŭskaje premii. Ab hetym paviedamiŭ namieśnik Centru pa vyvučeńni jahonaje spadčyny Jechiel Fišzon, jaki dniami naviedaŭ Bieraście.
I.Chviedarovič, Bieraście
Pensija pad pahrozaj
Na krasavik zapazyčanaść baranavickich pradpryjemstvaŭ pierad pensijnym fondam skłała bolš za miljard rubloŭ. U studzieni było tolki 522 miljony. Najbolš zavinavaciŭsia zavod stankapryładaŭ — 340 młn.rubloŭ, ź jakich 79 młn. — pienia.
Rusłan Raviaka, Baranavičy
Łoviacca ščupaki
Takoha Višnieŭskaje voziera, što ŭ vakolicach Smurhoniaŭ, jašče nia bačyła: 508 čałaviek z usioj krainy pryjechali siudy, kab vyprabavać rybackaje ščaście. Spabornictva, zładžanaje hazetami “Rybałoŭ” i “Miadźviedź”, praciahvałasia z 10.30 da 15.30. Tolki 34 rybaki viarnulisia z ułovam. Samy vialiki byŭ u smurhonca Paŭła Ambrasieviča — ščupak vahoj 3,9 kh i 2,9 kh drabniejšaj ryby. Pavał staŭsia čempijonam Biełarusi siarod amataraŭ i atrymaŭ firmovy łodačny ruchavik. Druhoje miesca zaniaŭ miančuk Uładzimier Ćviacinski — jahonyja ščupaki važyli 4,4 kh.
Taciana Skarynkina, Smurhoni
Čas źbirać kamiani
U luksavym numary novaha hatelu “Drybin” 25 krasavika musiŭ spynicca na noč biełaruski premjer-ministar. Čakajučy vysokaha hościa, miascovaja administracyja naviała nia tolki źniešni, ale j idealahičny marafet: usich patencyjnych apazycyjaneraŭ adpravili ŭ toj dzień na zbor kamianioŭ na kałhasnyja paletki.
Siarhiej Murzin, Drybin
Śmierć milicyjanta
U Hłusku skončyŭ žyćcio samahubstvam małady milicyjant. Niadaŭna jon straciŭ žonku, što čakała dzicia. Lekary nie zmahli vyratavać joj žyćcio.
S.P., Hłusk
Bahatyja lekary
Siaredni zarobak pracaŭnikoŭ Białynickaha rajonu ŭ sakaviku skłaŭ 113943 rubli. Praŭda, na siońnia hrošy dali tolki ŭ ličanych kalektyvach. Astatnija dahetul ablizvajucca. Najvyšejšyja zarobki ŭ rajonie za hety miesiac naličanyja lekaram — u siarednim pa 266673 rubli. Heta bolš, čym u bankiraŭ i čynoŭnikaŭ. A medsiostry, felčary j sanitary zarabili ŭ siarednim pa 73067 rubloŭ.
Bazyl Litvinovič, Białyničy
Kamientary