Telesezon u Amerycy
Uvosień va ŭsim śviecie pačynajecca novy telesezon. Zakanadaŭcam mody ŭ šoŭ-industryi i najbujniejšym vytvorcam adpaviednaha materyjału zastajecca Ameryka. Leta ličycca tam sezonam bajevikoŭ – słavutyja studyi dazvalajuć sabie vypusk nieabciažaranych mastackimi vysiłkami karcinaŭ. I ŭ hetym sezonie hledačam padrychtavanyja vybuchi na ŭvieś ekran, chłopcy sa zbrojaj niezvyčajnaj vieličyni j mahutnaści dy – u jakaści adbitku rasiejskich katastrof – defektnyja padvodnyja łodki. Ale navat pavodle halivudzkich standartaŭ sioletni sezon pieranasyčany filmami, stvoranymi ŭ praciah viadomych hitoŭ (“Ludzi ŭ čornym-2”) ci pierarobkami słavutych multfilmaŭ dy komiksaŭ (jak “Skubi-du” ci “Čałaviek-pavuk”).
Apošnim časam papularnyja kinaaŭtary vyjaŭlajuć žadańnie supracoŭničać z telestudyjami – 13 seryjaŭ dajuć bolšyja mahčymaści dla samarealizacyi, čym dźviuchhadzinny kinafilm. U vyniku na amerykanskim ekranie ŭ hetym sezonie budzie bolej mastackaści j hłybokaha psychalahizmu. Telekanały abiacajuć šerah novych seryjałaŭ, siarod jakich “Saprany” (pra padvojnaje žyćcio bosa mafii) ci “24”. Kožny epizod apošniaha seryjału pryśviačajecca adnoj hadzinie z žyćcia supracoŭnikaŭ antyterarystyčnaha adździełu CRU ŭ Łos-Andžełasie, jakija vykryvajuć zmovu suprać kandydata na pasadu prezydenta. U seryjale vykarystoŭvajecca “padzieleny ekran” – kab adnačasova pakazvać roznyja linii siužetu. A seryjał “Šeść futaŭ u hłybiniu”, źniaty ŭ styli “čornaj kamedyi”, raspaviadaje pra žyćcio siamji, jakaja trymaje pachavalny salon. Nie škadujučy hladackich nervaŭ, kamera pakazvaje praces apracoŭki mierćviakoŭ pierad pachavańniem i dramatyčnyja kanflikty pamiž siamiejnikami. U žanry tok-šoŭ sensacyjaj sezonu mahła b stacca novaja štodzionnaja pieradača ź Biłam Klintanam u jakaści viadučaha, pra što ź im viali pieramovy až dva kanały amerykanskaj televizii. Urešcie Klintan admoviŭsia, bo duža ciapier zaniaty dabračynnaściu. Ale spadzieŭ na budučyniu pakinuŭ.
Michał Čarvinski
Ciapier čytajuć
«Byŭ hałodny, jak z Aśviencima, nie jeŭ ni miasa, ni harodniny». Što viadoma pra śmierć babrujskaha žurnalista, na jakoha zaviali kryminalnuju spravu ŭ Polščy1717
Kamientary