Naviny

Naviny

Pieršy švajcarski bank

U krainie adčyniŭsia švajcarski bank: statutny fond “UBS Banku” (5 młn. eŭra) całkam naležyć švajcarcam. Da jahonaha stvareńja było čatyry banki z stopracentnym zamiežnym kapitałam: UP “Zamiežny bank “Maskva—Miensk” (Rasieja), ZAT “Astanaeksimbank” (Kazachstan), ZAT “Paŭnočny investycyjny bank” (skandynaŭskija krainy) dy AAT “Łorabank” (Ameryka supolna z Łatvijaj).

“Biełarus” omski

Traktary “Biełarus” buduć źbirać u Omsku dy Jełabuzie (Tatarstan): MTZ damoviŭsia z Omskim zavodam transpartnaha mašynabudavańnia dy Jełabuhaŭskim aŭtazavodam. Štohod Rasieja maje patrebu ŭ 10 tys. biełaruskich traktaroŭ.

Hłuskuju meblu — u ZŠA

Hłuski drevaapracoŭčy zavod z 1 śniežnia pačnie pradavać meblu ŭ ZŠA. Štomiesiac planujuć zarablać 100 tys. dalaraŭ. Vałodaje zavodam maskoŭski pradprymalnik Uładzimier Samaščaŭ, jaki nabyŭ fabryku, kali jana była na miažy bankructva. Na zavodzie pracujuć 173 čałavieki, uładalnik planuje naniać jašče 30. Akramia zavodu, u rajonie meblu na ekspart vyrablaje j cech lesapierapracoŭki miascovaj lasnoj haspadarki, atrymlivajučy za toje 300 tys. dalaraŭ štohod.

Natryj u lichtarach

Jašče da novaha hodu damy na ŭsim praspekcie Skaryny i vuł. Enhielsa ŭ Miensku buduć padśvietlenyja. Aproč taho, u stalicy raspačali zamianiać rtutnyja lichtary na natryjevyja. Heta dapamoža aščadzić 30% elektryčnaści.

Biznesoŭcam — biaspłatna

Ilhoty dla indyvidualnych pradprymalnikaŭ vyznačyŭ “Biełarusbank”. Adčyniać i začyniać rachunki, pieravodzić srodki ŭ biełaruskich rublach tut buduć biaspłatna. Za pryjomku hatoŭki daviadziecca płacić 0,5%, a za vydaču hatoŭki z rachunku — 1% ad sumy.

Palčatki z alenia

Haradzienskaje pradpryjemstva “Akcent” pačało vyrablać palčatki z farbavanaj skury alenia i kazy. Bolšaść syraviny nabyvajecca ŭ Rasiei. Miarkujecca štomiesiac rabić da 3 tys. paraŭ palčatak. Kaštavać jany buduć kala 15 tys. rubloŭ. 25% palčatak źbirajucca ekspartavać u Rasieju, astatnija buduć realizavanyja ŭ Biełarusi.

ličby tydnia

1000 NOVYCH TRAKTAROŬ atrymajuć kałhasy i saŭhasy. Raźličvacca za ich buduć praź lizinh (apłata raściahnutaja na 5 hadoŭ), bo kožnaja mašyna kaštuje pad 40 młn. rubloŭ. Letaś hetkim čynam vioscy pradali 200 traktaroŭ.

675 RUBLOŬ kaštuje ciapier litar benzynu A-76 na aŭtazapraŭkach “Biełnaftachimu”. A-92 kaštuje 845, A-95 — 970, litar dyzpaliva — 650 rub.

250 000 TONAŬ charčovaj pšanicy planuje nabyć za miažoj biełaruski ŭrad. U Biełarusi sabrali 255 tys. tonaŭ — hetaha chopić tolki na 5 miesiacaŭ. Kuplać pšanicu dumajuć u Rasiei pa 40—60 dalaraŭ za tonu. Furažnaj pšanicy chapaje — jaje nazapašana 2 młn. 800 tys. tonaŭ.

4 500 000 PLASTYKAVYCH PŁACIEŽNYCH KARTAK majuć na rukach biełarusy. Štohod pradajecca kala 3 młn. telefonnych kartak, miljon kartak dla metro, 250 tys. kartak dla płaty za benzyn. Biełaruskija banki vypuścili ŭžo 300 tysiačaŭ kartak, jakimi možna karystacca ŭ 225 bankamatach dy 984 tys. punktach vydačy najaŭnych hrošaj. 1411 pradpryjemstvaŭ handlu dy sfery pasłuhaŭ dazvalajuć raspłačvacca pa bankaŭskaj kartcy.

170 RUBLOŬ kaštuje talončyk na prajezd u mahiloŭskim transparcie. Sabiekošt adnoj pajezdki tam składaje 200 rubloŭ. Transpartniki prapanoŭvali pavialičyć canu talončykaŭ ad 150 da 180 rubloŭ, ale staršynia abłvykankamu Barys Batura zapiarečyŭ.

4000 RUBLOŬ za kožnyja sutki šmatdzionnaj kamandziroŭki ŭ miežach Biełarusi buduć atrymlivać supracoŭniki biudžetnych ustanovaŭ. Za adnadzionnuju kamandziroŭku — 2000, a za noč biez kvitka z hatelu — 1200 rub.

41 000 000 DALARAŬ vinavatyja biełaruskija pradpryjemstvy Rasiei za elektryčnaść. Z pačatku hodu zapazyčanaść źmienšyłasia ŭdvaja.

1 000 000 PLAŠAK HAREŁKI majuć ekspartavać biełaruskija pradpryjemstvy ŭ Rasieju. Heta stałasia mahčymym z-za admieny akcyzaŭ na alkahol dla Biełarusi. Ciapier biełaruskaja harełka na rasiejskim rynku patańnieje ŭtraja.

A.K., S.I., A.M.