Śpiavak žłobskaje nacyi

***

Novy albom Šałkieviča: “Dobraj ranicy”

Narešcie majem kampilacyju ź lepšych zapisaŭ Šałkieviča ažno za dziesiać hadoŭ, vydadzienuju na CD.

Ludzi rahočuć, słuchajučy Šałkievičavy pieśni. Z čaho, zdavałasia b, tam možna rahatać? Što my — “Žłobskaja nacyja”, ulubiony styl jakoj — “Smutny biełaruski bluz”? Ja nieadnarazova byŭ śviedkam taho, jak aburalisia tutejšyja, słuchajučy “Žłobskuju nacyju”. Maŭlaŭ, heta karykatura złosnaja, my zusim nie takija, my hordyja, svabadalubnyja, my, my, my... I ja b aburyŭsia, kali b toje praśpiavaŭ pra nas jaki Jury Šaŭčuk. A to ž skazaŭ naš, miascovy, sam taki ž, jak i my ŭsie. Jamu možna, jon maje na toje prava.

Z 19 numaroŭ albomu, jaki hučyć pad 80 chvilinaŭ, tolki iraničny manaloh pad aryhinalnaj nazvaju “Bonus-track” raniej nie vydavaŭsia. Rešta — pieśni z roznych prahramaŭ. Patreby vystrojvać ich pavodle jakoha siužetu nie było: da tvorčaści Šłakieviča možna padbiracca ź luboha boku.

Dyłana ja zhadaŭ nievypadkova. Šałkievič pašyraje dyjapazon ułasna bardaŭskaje pieśni, jak i amerykanski Bob, unosiačy ŭ hety žanr časam vielmi vostraje rokavaje hučańnie. Tyja haradzienskija aražavańni miescami ŭzornyja! A kali Šałkievič zredku kidaje muzykaŭ ułasnaha bendu (nia ŭvieś ža čas hanararami ź imi dzialicca!), ahulnaje ŭražańnie ad jahonych piesień nie źnikaje. Dastatkova pasłuchać praśpiavany pad hitaru praśvietlena-sumny šedeŭryk “My jechali da Mahilova”, kab pierakanacca, što lubić jon tuju žłobskuju nacyju nadzvyčaj mocna. I mahiloŭskich jaje pradstaŭnikoŭ — taksama!

Kab u Biełarusi isnavała tradycyja kabare, Šałkievič byŭ by tut pieršym numaram, bo ŭpłyŭ na jahonuju stylistyku z boku viadomych polskich artystaŭ (prykładam — Andžeja Rasieviča) adčuvalny. Ale heta nia plažyć aryhinalnaść taho, što robić Šałkievič. Niezdarma ž muzyčny krytyk Vitaŭt Martynienka va ŭstupie da albomu zaznačyŭ, što “słuchač znojdzie tut i šerah prosta nievierahodnych siurpryzaŭ”. Ja pakryŭdžany: Słuchač treba pisać ź vialikaje litary!

P.S. Nie mahu nie adznačyć aryhinalnuju znachodku “BMAgroup” — reklamny trek u kancy albomu, zapisany z hołasam Pamidorava. Jość tolki adzin tonki momant: kab pačuć tuju reklamu, treba kupić dysk Šałkieviča. A jak kupić dysk, kali reklamy toj nidzie bolš nie čutno?

Słuchač z-pad Kałožy

20 listapada ŭ Pałacy kultury veteranaŭ (Miensk, vuł.Kupały, 21) adbudziecca prezentacyja albomu Viktara Šałkieviča “Dobraj ranicy”, vydadzienaha “BMAgroup”. Pačatak a 19-j.

• 0
• 0
• 0
• 0
• 0
• 0
• 0
• 0