Irakcy, zdradžanyja ŭ 1991-m, nie śpiašajucca padtrymać ZŠA ŭ novym zmahańni z tyranijaj. Amerykancy spadziavalisia na blickryh i «vivaty» vyzvalenych šyitaŭ. Jany raźličvali vyjhrać vajnu biez kantaktnaha ŭdziełu amerykanskaj piachoty, jak u Juhasłavii ci Aŭhanistanie. Vašynhtonskija analityki niedaacanili značeńnie nacyjanalnaha suverenitetu dla žycharoŭ Iraku. «Šokam i žacham» marskich piechacincaŭ staŭ zaciaty supraciŭ Respublikanskaj hvardyi. Amerykanskija telekanały prajhrajuć infarmacyjnuju vajnu «Al-Džaziry». U dadatak časta pamylajecca amerykanskaja vyviedka i kiepska kaardynujucca dziejańni brytanskich sajuźnikaŭ, što hublajuć pad «siabroŭskim ahniom» mašynu za mašynaj.
Vojski kaalicyi sutykajucca z varožaściu nasielnictva. I heta dratuje ichnych kamandziraŭ bolš za piasčanyja bury i pazielaniełyja tvary pałonnych tyłavikoŭ na teleekranach. Kali vajna ŭ Iraku nie vyzvolnaja, jaje robicca ciažka apraŭdać. Mahutny prapahandyscki aparat amerykancaŭ vyjaviŭsia vielmi datklivym u baraćbie z padstupnaj despatyjaj. Tony atrutnych hazaŭ nia źniščanyja Sadamam, ale ich treba prademanstravać śvietu, kab toj zrazumieŭ maštab niebiaśpieki. Štaby Chusejna źmiaščajucca to pad dziciačym domam, to pad hałoŭnym špitalem, ale jak heta dakažaš?
Čakałasia, što bitva za Bahdad stanie pieršaj suchaziemnaj vajnoj novaha pakaleńnia. Zamiest hetaha jana pieratvarajecca ŭ hihanckuju miasarubku. Ministar abarony Vialikaj Brytanii Džefry Chun pryznaŭ, što «straty cyvilnaha nasielnictva buduć pavialičvacca, ale heta nie adabjecca na chodzie aperacyi».
Amerykancy prasoŭvajucca napierad, raŭnujučy pazycyi praciŭnika ź ziamloju. Tak było ŭnačy z aŭtorka na sieradu pad Nadžafam, dzie zahinuli niekalki socień irackich bajcoŭ.
U Nasiryi bai la pierapravy cieraz Eŭfrat praciahvajucca piać dzion, «džy-aj» vymušanyja pieratrasać budynak za budynkam u pošukach fedainaŭ. U sieradu bambiožki praciahvalisia, niahledziačy na bury. U vyniku rakiety papali ŭ bahdadzki bazar. Amerykancy śpiašajucca padyści da Bahdadu za sakavik. 1 krasavika poŭnia, jakaja palehčyć tankavyja dy pavietranyja ataki. Nadychodzić i letniaja śpiakota.
Nie adbylisia paŭstańni šyitaŭ i kurdaŭ, jakija pradrakała irackaja apazycyja. U 1991-m poŭdzień i poŭnač krainy ŭźnialisia suprać sunita Chusejna. Ale amerykanskija vojski tady spynilisia pad Basraj i Nasiryjaj, kab paśla adstupić u Kuvejt, a z paŭstancami raspraviłasia Respublikanskaja hvardyja. Ameryka Buša-baćki bajałasia nehatyŭnych nastupstvaŭ raspadu Iraku i svaich ludzkich strataŭ.
Buš-syn achviaraŭ nie baicca. Ale ŭ kantaktnaj vajnie, a pahatoŭ vajnie partyzanskaj, bajcy kaalicyi nie pačuvajucca tak upeŭniena, jak u vysokatechnalahičnaj pavietranaj.
Ad pośpiechu pieršych dvuch dzion u sajuźnikaŭ zakruciłasia hałava. Ciapier ža składajecca ŭražańnie, što Chusejn nie padpaliŭ śvidraviny tolki tamu, što raźličvaje jašče sam ź ich skarystacca. Uładnyja elity Bahdadu daravali jamu i bolšyja parazy, čym ciapierašniaja, kali na kožnaha zabitaha amerykanca prypadaje z sotniu irakcaŭ.
Pramarudžvańnie ŭ vajnie ŭžo vyklikała spad aktyŭnaści na suśvietnych biržach. Pravał aperacyi nia tolki padkasiŭ by papularnaść samaŭpeŭnienaje amerykanskaje administracyi, ale i abvaliŭ suśvietnuju ekanomiku.
Na śvitanku 13 lutaha 1991 h. dva amerykanskija bambaviki F-117 skinuli pa 1000-kilahramovaj bombie na bunkier u Zachodnim Bahdadzie. Mierkavałasia, što tam mieścicca kamandny punkt Sadama Chusejna. U vyniku zahinuli bolš za trysta čałaviek, u tym liku kala sotni dziaciej. Bunkier akazaŭsia zvyčajnym bambaschoviščam. Ci, prynamsi, takoje bambaschovišča raźmiaščałasia nad im. Heta była najbolšaja trahiedyja papiaredniaj vajny.
Ciapier amerykancy stavili zadaču luboj canoj paźbiehčy takich pamyłak. Canoj stali žyćci amerykanskich sałdat. Donald Ramsfeld adpraŭlaje ŭ Mesapatamiju dadatkovyja 30 tys. piechacincaŭ.
Amerykancy chočuć pazbavić Sadama ŭłady i zakłaści ŭ Iraku asnovy demakratyčnaha ładu. Tamu aperacyja mieła być uzornaj. Paśla pieršaha tydnia vajny źjavilisia sumnievy ŭ kančatkovym pośpiechu pačatkovaha planu.
Mikoła Buhaj
Chočacie žyć doŭha — šukajcie rajon z narmalnymi drevami. Navukoŭcy vyśvietlili, što drevy ratujuć ad infarktaŭ, a hazony mohuć navat naškodzić zdaroŭju22
Kamientary