12.02.2004
2500 za Valeta
Alaksiej Dudaraŭ adstojvaje aŭtarskija pravy ŭ sudzie. Jon damahajecca, kab «Biełaruśfilm» vypłaciŭ jamu 2500 dalaraŭ za kamercyjnaje vykarystańnie filmu «Biełyja Rosy». Arhument kinastudyi: da 1996 hodu, kali nabyŭ moc zakon ab aŭtarskim pravie, byli źniatyja tysiačy filmaŭ. Što ž budzie, maŭlaŭ, kali ŭsie aŭtary zapatrabujuć hanararaŭ? Čysta saviecki adkaz na cyvilizacyjnaje pytańnie.
Vybaram dali «Hremi»
Bił Klintan i Michaił Harbačoŭ atrymali muzyčnuju premiju «Hremi» za ŭdzieł u ahučvańni kazki Prakofjeva «Piecia i voŭk» na novy kštałt. Sioleta «Hremi» było nadzvyčaj zapalityzavanaje. Navat r'n'b-śpiavačka Bejans Noŭles, jakaja ŭziała až piać załatych hramafončykaŭ i musiła b być hałoŭnaj hierainiaj, apynułasia ŭ cieni chutkich prezydenckich vybaraŭ u ZŠA. Hurt «Coldplay» pryśviaciŭ svaju pieśniu «Clocks» (najlepšy synhł 2003 hodu) Džonu Kiery, Džordž Buš daŭ specyjalnuju ŭznaharodu hurtu «The Beatles». Hiłary Klintan naminavałasia ŭ katehoryi «najlepšy albom» z hukavoj versijaj svajho bestseleru «Living History», ale «Hremi» nie atrymała. Chopić i adnaho hramafona ŭ siamji.
Nie hadujcie benhalskich tyhraŭ
Majk Tajsan pryznany bankrutam. Nabyćcio darahich mašynaŭ i benhalskich tyhraŭ, razvod z žonkaj, jakaja adsudziła sabie i dzieciam dva Tajsanavy damy, a najbolš — sudy, sudy j sudy ŭ spravach zhvałtavańnia, abrazaŭ, bojek, mitalahičnaha ŭžo vucha Holifiłda źjeli hanarary Majka. Siońnia bakser maje 150 tys. dalaraŭ i vinien 14,5 młn. Advajavać usio adnym chukam, čarhovy raz «viarnuŭšysia» na rynh, žalezny Majk naŭrad ci zdoleje. Jamu 37 hadoŭ. I vobraz «najhoršaha čałavieka na ziamli» ŭžo nie ratuje. Dzie ciapier imidžmejkiery, jakija jaho stvarali? Dzie ty, chutkapłynnaja spartovaja słava?
Prapahandysty zapeŭnivajuć, što 196 palitviaźniaŭ užo na svabodzie9
Kamientary