Dzień, kali ŭ Varšavie musiŭ adbycca kancert «NRM», raspačaŭsia dla mianie ź nievialikaha šoku: u «Gazecie Wyborczej» pabačyŭ ažno cełuju staronku, pryśviečanuju hetamu hurtu i ŭvohule sytuacyi na biełaruskaj rok-scenie. I heta pry tym, što materyjały pra «NRM» napiaredadni źjavilisia jašče ŭ «Rzeczypospolitej», «Newsweek Polska». Tamu ścipłyja słovy Lavona Volskaha pra toje, što «ŭ Polščy my hurt nieviadomy», u paniadziełak 22 sakavika napeŭna ŭžo nie adpaviadali sapraŭdnaści...
Dalej — jašče siurpryzy. Pa darozie na kancert, u haradzkim aŭtobusie, sustreŭ Źmitra Vajciuškieviča. Za piać chvilinaŭ pačuŭ, što ŭ bližejšy čas u jaho zaplanavanyja prynamsi niekalki prajektaŭ: biełaruska-japonski, biełaruska-italjanski (kavałak «Byvajcie zdarovy» pa-italjansku jon navat potym zaśpiavaŭ). «NRM» upieršyniu pačała svajo turne kancertami ŭ Biełastoku i Varšavie («Narešcie my prajedziemsia pa ŭsioj terytoryi VKŁ, bo budzie jašče Smalenščyna i Vilnia», — skazaŭ Pit), a Vajciuškievič zapisvaje neapalitanskija pieśni — prynamsi za hetych vykanaŭcaŭ možna paradavacca...
Kancert u varšaŭskim klubie «Proxima» — heta reč surjoznaja i prestyžnaja. Tut vystupajuć zorki rok-muzyki: superpapularny polski «Kult» ci nia mienš papularnyja zachodnija «Machine Head», «U.D.O.». Kancert «NRM» adbyŭsia ŭ miežach imprezy «Biełaruskaja muzyčnaja partyzanka». Biełarusy i palaki — amatary biełaruščyny miesiac tamu paśpiachova naładzili ŭ Varšavie dyskateku z całkam biełaruskaj muzykaj. Ciapier voś pajšli dalej.
Arhanizatary prykmietna chvalavalisia. Ci pryjdzie dastatkova ludziej na biełaruski hurt, kab i kancert hladzieŭsia dobra, i, što chavać, kab chapiła apłacić šalonyja ceny arendy zali?!
U 20.15, kali na scenu, upryhožanuju vializnym bieł-čyrvona-biełym ściaham, padniaŭsia adzin ź biełarusaŭ dy abvieściŭ, što padzieja pryśviečanaja Dniu Voli, usio ŭžo było zrazumieła — impreza ŭdasca.
Poŭny varyjant artykułu hladzicie ŭ hazecie "Naša Niva".
Alaksiej Dzikavicki, Varšava
Ciapier čytajuć
«U mianie na stale piać hadoŭ lažała papiera ź pieradačaj prava apieki nad synam». Volha Sieviaryniec — pra hady strachu, antydepresanty i nadzieju7
Kamientary