Дзень, калі ў Варшаве мусіў адбыцца канцэрт «NRM», распачаўся для мяне зь невялікага шоку: у «Gazecie Wyborczej» пабачыў ажно цэлую старонку, прысьвечаную гэтаму гурту і ўвогуле сытуацыі на беларускай рок-сцэне. І гэта пры тым, што матэрыялы пра «NRM» напярэдадні зьявіліся яшчэ ў «Rzeczypospolitej», «Newsweek Polska». Таму сьціплыя словы Лявона Вольскага пра тое, што «ў Польшчы мы гурт невядомы», у панядзелак 22 сакавіка напэўна ўжо не адпавядалі сапраўднасьці...
Далей — яшчэ сюрпрызы. Па дарозе на канцэрт, у гарадзкім аўтобусе, сустрэў Зьмітра Вайцюшкевіча. За пяць хвілінаў пачуў, што ў бліжэйшы час у яго заплянаваныя прынамсі некалькі праектаў: беларуска-японскі, беларуска-італьянскі (кавалак «Бывайце здаровы» па-італьянску ён нават потым засьпяваў). «NRM» упершыню пачала сваё турнэ канцэртамі ў Беластоку і Варшаве («Нарэшце мы праедземся па ўсёй тэрыторыі ВКЛ, бо будзе яшчэ Смаленшчына і Вільня», — сказаў Піт), а Вайцюшкевіч запісвае нэапалітанскія песьні — прынамсі за гэтых выканаўцаў можна парадавацца...
Канцэрт у варшаўскім клюбе «Proxima» — гэта рэч сур’ёзная і прэстыжная. Тут выступаюць зоркі рок-музыкі: супэрпапулярны польскі «Kult» ці ня менш папулярныя заходнія «Machine Head», «U.D.O.». Канцэрт «NRM» адбыўся ў межах імпрэзы «Беларуская музычная партызанка». Беларусы і палякі — аматары беларушчыны месяц таму пасьпяхова наладзілі ў Варшаве дыскатэку з цалкам беларускай музыкай. Цяпер вось пайшлі далей.
Арганізатары прыкметна хваляваліся. Ці прыйдзе дастаткова людзей на беларускі гурт, каб і канцэрт глядзеўся добра, і, што хаваць, каб хапіла аплаціць шалёныя цэны арэнды залі?!
У 20.15, калі на сцэну, упрыгожаную вялізным бел-чырвона-белым сьцягам, падняўся адзін зь беларусаў ды абвесьціў, што падзея прысьвечаная Дню Волі, усё ўжо было зразумела — імпрэза ўдасца.
Поўны варыянт артыкулу глядзіце ў газэце "Нашa Ніва".
Аляксей Дзікавіцкі, Варшава
Цяпер чытаюць
Мікола Статкевіч павіншаваў беларусаў з Днём Волі, запісаўшы першае ВІДЭА пасля вызвалення7
Каментары